ބޮލީވުޑްގެ ކާމިޔާބު ބަތަލާ ޝިލްޕާ ޝެއްޓީގެ ދިރިއުޅުމުގައި ހިތާމައަކަށް ފަހު ހިތާމައިގެ ރާޅު ދަނީ ބިންދަމުންނެވެ. އޭނާގެ ދިރިއުޅުން އެފުށް މިފުށަށް ޖެހިފައިވަނީ އޭނާގެ ފިރިމީހާ ބިޒަންނަސް ޓައިކޫން ރާޖް ކުންދުރާ ޖުލައި 19 ވަނަ ދުވަހު، ބަރަހަނާ ފިލްމް ހެދުމާއި ވިޔަފާރިކުރުމުގެ ކުށުގައި ހައްޔަރުކުރުމާއި އެކުގައެވެ.
ރާޖްގެ ކޭސްގެ އެންމެ ފަހުގެ އަޕްޑޭޓަށް ބަލާއިރު އޭނާ އިތުރަށް ކަސްޓަޑީގައި ބެހެއްޓުމަށް ކޯޓުން ވަނީ އަމުރު ކޮށްފައެވެ. މި އަމުރާއި އެކު އޯގަސްޓް 20 އާއި ހަމައަށް ރާޖް ހުންނާނީ ފުލުހުންގެ ބެލުމުގެ ދަށުގައެވެ.
މި ކަންކަމާ ބޯގޮވާފައިވަނިކޮށް އަނެއްކާވެސް މިވަނީ ޝިލްޕާގެ ރިހޭފައި މައްޗަށް ފޮއި ވެއްޓިފައެވެ. މިފަހަރު ޝިލްޕާ އާއި އޭނާގެ މަންމަ ސުނަންދާ ޝެއްޓީގެ މައްޗަށް މަކަރާއި ހީލާތުގެ ތުހުމަތުކޮށް މައްސަލައެއް ވަނީ ފުލުހުންނަށް ހުށަހަޅާފައެެވެ.
ޖިއޯތުސްނާ ޗޯހަނާއި ރޯހިތު ވީރު ސިންގް ކިޔާ ދެމީހެއް ފުލުހަށް ހުށައެޅި މައްސަލާގައިބުނެފައިވަނީ ޝިލްޕާ އާއި އޭނާގެ މަންމަ ސުނަންދާގެ ވެލްނެސް ސެންޓަރުގެ ބްރާންޗެއް ހުުވުމުގެ ނަމުގައި އެދެމީހުން އަތުން އެތަށް ކަރޯޑްއެއްގެ އިންޑިއާ ރުފީސް ނަގާފައިވާކަމަށެވެ.
މި މައްސަލަ ފުލުހުންނަށް ރިޕޯޓްކުރީ، ދެމައިން ގުޅިގެން މަކަރާއި ހީލަތުން ފައިސާ ހޯދި ކަމަށް ތުހުމަތުކޮށްފައެވެ. އެ މައްސަލާގައި މިހާރު އުއްތުރަޕްރަދޭޝްގެ ފުލުހުންގެ ޓީމެއް މުމްބާއީއަށް ގޮސް ޝިލްޕާ އާއި މަންމައާ ސުވާލުކޮށް، ބަޔާން ނަގައި އެމީހުން ދިރިއުޅޭގެ ބަލާފާސްކޮށްފައި ވެއެވެ.
މީގެ ކުރިން ވެސް ޝިލްޕާގެ ވެލްނެސް ސެންޓަރުން ހިންގި ކަމަށް ބުނާ މަކަރާއި ހީލަތުގެ މައްސަލަތަކެއް ފެންމަތިވެފައިވެއެވެ. އެއީ އޭނާ އާއި ރާޖް މީހެއްގެ އަތުން ފަހުން ދައްކާ ގޮތަށް ނެގި ފައިސާތަކެއް ނުދީ ހިޔާނާތްތެރިވި ކަމަށް ބުނެއެވެ.
