ލޯކަލް ކައުންސިލްތަކުގެ ސެކްރެޓަރީ ޖެނެރަލް (އެސްޖީ)ގެ މަޤާމަށް ކުރމަތިލެއްވި 272 މީހެއްގެ ނަން ޝޯޓްލިސްޓް ކޮށްފައިވާކަމަށް ސިވިލް ސާރވިސް ކޮމިޝަނުން ބުނެފިއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އެންމެ ފަހުން ގެނައި އިސްލާހުތަކުގައިވާގޮތުން، ކައުންސިލްތަކުގެ އިދާރީ ހިންގުމުގެ އެންމެ އިސްވެރިޔަކީ ސެކްރެޓަރީ ޖެނެރަލުންނެވެ. މިއާއެކު 200 ސެކްރެޓަރީ ޖެނެރަލުން ހޯދުމަށް ސިވިލް ސާރވިސް ކޮމިޝަނުން ކުރި އުލާނާއި ގުޅިގެން އެމަޤާމަށް 511 މީހަކު ކުރިމަތިލިއެވެ.
ސިވިލް ސާރވިސް ކޮމިޝަނުން ބުނީ ސެކްރެޓަރީ ޖެނެރަލްގެ މަޤާމަށް ކުރިމަތިލި 272 މީހެއްގެ ނަން ޝޯޓްލިސްޓް ކޮށްފައިވާކަމަށެވެ. އަދި މިމަހުގެ ފަހުކޮޅު ނުވަތަ އަންނަ މަހު ކައުންސިލްތަކަކުގެ ސެކްރެޓަރީ ޖެނެރަލްގެ މަޤާމަށް އައްޔަންކުރެވޭނެކަމަށްވެސް ސިވިލް ސާރވިސް ކޮމިޝަނުން ބުންޏެވެ.
ކައުންސިލްތަކުގެ އިދާރީ އެންމެ އިސްވެރިޔާކަމަށްވާ ސެކްރެޓަރީ ޖެނެރަލްގެ މަޤާމަކީ ފަސް އަހަރު ދުވަހުގެ މަޤާމެކެވެ. އެގޮތުން ރަށު ކައުންސިލްތަކުގެ އެސްޖީގެ މަޤާމަށް ކުރިމަތިލާ މީހުންގެ ޝަރުތަކީ، ބެޗްލާސް ޑިގްރީއާއެކު ހަތަރު އަހަރުގެ ތަޖުރިބާ ނުވަތަ މާސްޓާސް ޑީގްރީއަކާއެކު މަގާމުގެ މަސައްކަތާގުޅޭ ދެ އަހަރުގެ ތަޖުރިބާ ހުރުމެވެ. އަދި އަތޮޅު ކައުންސިލްގެ އެސްޖީގެ މަޤާމަށް ކުރިމަތިލާ މީހުންގެ ޝަރުތަކީ، ބެޗްލާސް ޑިގްރީއާއެކު ހަ އަހަރުގެ ތަޖުރިބާ ނުވަތަ މާސްޓާސް ޑިގްރީއާއެކު މަސައްކަތާ ގުޅޭ ހަ އަހަރުގެ ތަޖުރިބާހުރުމެވެ.
ސިވިލް ސާރވިސް ކޮމިޝަނުން މީގެ ކުރިން ވަނީ 200 ސެކްރެޓަރީ ޖެނެރަލުން ހޯދުމަށްވެސް އިއުލާންކޮށްފައެވެ. އޭގައިވާގޮތުން ރަށު ކައުންސިލްގެ ސެކްރެޓަރީ ޖެނެރަލްގެ މުސާރައަކީ މަހަކު 9،300 ރުފިޔާއާއި، އެގްޒެކެޓިވް އެލަވަންސްގެ ގޮތުގައި 8،870 ރުފިޔާއެޗެ. އަތޮޅު ކައުންސިލްގެ ސެކްރެޓަރީ ޖެނެރަލަކަށް މުސާރައިގެ ގޮތުގައި 12،130 ރުފިޔާ ކަނޑައަޅާފައިވާއިރު، އެގްޒެކެޓިވް އެލަވަންސްގެ 8،870 ރުފިޔާ ލިބޭނެއެވެ. އަދި ސިޓީ ކައުންސިލްގެ ސެކްރެޓަރީ ޖެނެރަލްގެ މުސާރައަކީ މަހަކު 20،500 ރުފިޔާއެެވެ. އަދި އެގްޒެކެޓިވް އެލަވަންސްގެ ގޮތުގައި 15،000 ރުފިޔާ ލިބޭނެއެވެ.
ކައުންސިލްތަކުގެ ސެކްރެޓަރީ ޖެނެރަލްގެ މަޤާމަށް ބޭފުޅުން އައްޔަންކުރެވޭނީ ކައުންސިލްގެ ރުހުމާއެކުއެވެ. އެގޮތުން 60 އިންސައްތައަށްވުރެ މަތިން މާކްސް ލިބޭ މީހުންގެ ނަންނަތައް ސިވިލް ސާރވިސް ކޮމިޝަނުން ކައުންސިލްތަކާއި ހިއްސާކުރާނެއެވެ. އަދި ކައުންސިލުން އެސްޖީގެ މަޤާމަށް އައްޔަންކުރާނެ މީހެއް ކަނޑއަޅާ ސިވިލް ސާރވިސް ކޮމިޝަނަށް ފޮނުވަންޖެހެއެވެ.
