ވެލާނާ އިންޓަނޭޝަނަލް އެއާޕޯޓް، ވީއައިއޭ އިން މިރޭ ފުރި ގަތަރު އެއާވޭސްގެ ފްލައިޓަކަށް ޓެކްނިކަލް މައްސަލައެއް ދިމާވެގެން އެމަޖެންސީކޮށް ޖައްސައިފި އެވެ.
ވީއައިއޭ އިން ދޯހާ އަށް މިރޭ 7:45 ގައި ފުރި ގަތަރު އެއާވޭސްގެ ފްލައިޓު އަންބުރާޖެއްސީ މީގެ ކުޑައިރުކޮޅެއް ކުރިންނެވެ.
މައުލޫމާތު ލިބިފައިވާ ގޮތުގައި ފްލައިޓް އެމަޖެންސީކޮށް ޖެއްސީ ދަތުރުކުރަމުން ދަނިކޮށް އޭގެ ބިއްލޫރިގަނޑެއް ތަޅައިގެން ދިއުމުންނެވެ. ތަޅައިގެން ދިޔައީ ފްލައިޓްގެ ކޮކްޕިޓްގެ ވާތް ފަޅިން ބިއްލޫރިގަނޑެއް ކަމަށްވެސް މައުލޫމާތު ލިބެއެވެ. ފްލައިޓް އެމަޖެންސީކޮށް ޖައްސާފައި ވާއިރު ދަތުރުކުރި އެއްވެސް މީހަކަށް އަނިޔާއެއް ލިބިފައި ނުވެއެވެ.
ބޯއިންގް 777 މަރުކާގެ މި ބޯޓުން ދަތުރުކުރި އެންމެން ރައްކާތެރިކަމާއެކު ބޯޓުން ބާލާފައި ވާކަމަށްވެސް މައުލޫމާތު ލިބިފައެވެ.
ފްލައިޓް ޖެއްސިވަގުތު ވީއައިއޭ އޮތީ އެފަދަ ހާލަތްތަކުގައި ޢަމަލުކުރާ ފަދައިން ކުއްލި ހާލަތަށް ގެނެސް ދިމާވެދާނެ ނުރައްކާތެރި ހާލަތެއްގައި ސަލާމަތީ އެހީތެރިކަން ދިނުމަށް ތައްޔާރުވެފަ އެވެ.
ރާއްޖޭގެ މައި އެއަރޕޯޓް އޮޕަރޭޓްކުރާ އެމްއޭސީއެލްގެ ބަހެއް އަދި މިހާތަނަށް މިކަމުގައި ލިބިފައެއް ނުވެއެވެ.
