ފިނޭންސް މިނިސްޓްރީން ޔޫއޭއީއަށް ކުރާ ދަތުރުގެ ބޭނުމަކީ އިޤްތިޞާދީ ގޮތުން ރާއްޖެއަށް ލިބިފައިވާ ކުރިއެރުން ކިޔައި ދިނުން ކަމުގައި ފިނޭންސް މިނިސްޓްރީން ބުނެފިއެވެ.
ރަސްމީ ދަތުރުފުޅެއްގައި ފިނޭންސް މިނިސްޓަރ އިބްރާހިމް އަމީރާއި، މިނިސްޓްރީގެ ޓީމެއް ޔޫއޭއީއަށް ފަށާފައިވާ ދަތުރާއި ގުޅިގެން ފިނޭންސް މިނިސްޓްރީން ބުނެފައިވަނީ ދަތުރުގެ މައިގަނޑު ބޭނުމަކީ މެދުއިރުމަތީގެ އިންވެސްޓަރުންނާއި އޮންނަ ގުޅުން ބަދަހިކުރުމާއި އިގްތިސާދީ ގޮތުން ރާއްޖެއަށް ލިބިފައިވާ ކުރިއެރުމުގެ ވާހަކަ ކިޔައިދިނުންކަމަށެވެ.
މިނިސްޓަރުގެ މި ދަތުރުފުޅުގައި ތަރައްގީގެ ބައިވެރިންނާއި ބޭންކުތަކުގެ އިސްވެރިންނާއި އިންވެސްޓަރުންނާއި ބައްދަލުކުރައްވާނެކަމަށް ފިނޭންސް މިނިސްޓްރީން ވަނީ ބުނެފައެވެ. ފިނޭންސް މިނިސްޓްރީން ބުނެފައިވަނީ ދައުލަތުގެ މުދަލެއް ރަހުނުކޮށްގެން މިހާތަނަށް ދަރަންޏެއް ނަގާފައި ނުވާނެ ކަމަށާއި ކުރިޔަށްއޮތް ތަނުގައިވެސް އެގޮތަށް ދަރަންޏެއް ނެގުމަށް މިނިސްޓަރް އަމީރު ވިސްނުންފުޅެއް ނުގެންގުޅުއްވާ ކަމަށެވެ.
ދައުލަތުގެ މާލީ ޙާލަތާ ގުޅޭ ގޮތުން ހަފުތާއަކު އެއްފަހަރު ފިނޭންސް މިނިސްޓްރީން އާންމުކުރާ ހިސާބުތަކަށް ބަލާއިރު، ޖުލައި މަހުގެ 29 ވަނަ ދުވަހާ ހަމައަށް ދައުލަތަށް އާމްދަނީގެ ގޮތުގައި ލިބިފައިވަނީ 9.9 ބިލިއަން ރުފިޔާއެވެ.
އާމްދަނީގެ ގޮތުގައި 9.9 ބިލިއަން ރުފިޔާ ލިބުނުއިރު ދައުލަތުންވަނީ 15.2 މިލިއަން ރުފިޔާ ޚަރަދުކޮށްފައެވެ. އާމްދަނީއަށް ބަލާއިރު އެންމެ ބޮޑު އާމްދަނީއެއް ލިބުނީ ޓެކުހުންނެވެ. ޓެކްސްގެ ގޮތުގައި ޖުމްލަ 7.4 ބިލިއަން ރުފިޔާ ލިބިފައިވެއެވެ. އަދި ޓެކުސް ނޫން އާމްދަނީން ލިބިފައިވަނީ 2.3 ބިލިއަން ރުފިޔާއެވެ. ހިލޭ އެހީގެ ގޮތުގައި މިހާތަނަށް 87.2 މިލިއަން ރުފިޔާއެވެ.
އާމްދަނީގެ ގޮތުގައި 9.9 ބިލިއަން ރުފިޔާ ލިބުނުއިރު، 15.2 ބިލިއަން ރުފިޔާ ޚަރަދުކޮށްފައިވާއިރު، އާމްދަނީގެ އިތުރަށް ޚަރަދުކުރި 5.2 ބިލިއަން ރުފިޔާއަކީ އެކި ގޮތްގޮތުން ދައުލަތަށް ނަގާފައިވާ ދަރަނިން ޚަރަދުކޮށްފައިވާ ފައިސާއެވެ.
