ވަގައްނަގައި ގެއްލުވާލާފައިވާ ނޫސްވެރިޔާ ރިޟްވާން ޢަބްދުﷲގެ މައްސަލާގައި ސަރުކާރަށް ގިނަ ސުވާލުތަކެއް އަމާޒުކުރައްވައި ކުރީގެ ނައިބު ރައީސް ޑރ. މުޙައްމަދު ޖަމީލް އަޙްމަދު ސަރުކާރަށް ވަރަށްބޮޑަށް ފާޑުވިދާޅުވެއްޖެއެވެ.
ރިޟްވާންގެ މައްސަލާގައި ޖަމީލު ސަރުކާރަށް ފާޑުވިދާޅުވެ ވާހަކަދައްކަވާފައި ވަނީ ގެއްލުވާލާފައިވާ މީހުންނާއި މަރުތައް ބަލަން ރައީސް އުފައްދަވާފައިވާ ރިޔާސީ ކޮމިޝަނަށް ރައީސް ޔާމީން މާދަމާ ހާޒިރުވުމަށް އަންގާފައި ވަނިކޮށެވެ.
ޔާމީންގެ އިންސާފު ނޫން އިންސާފެއް އިދިކޮޅަށް ނެތީތޯ ސުވާލު އުފައްދައި ރާއްޖޭގެ އޮންލައިން ނޫހެއްގައި ޝާޢިއުކޮށްފައިވާ ލިއުމަކަށް ރައްދުދެއްވާ، ރައީސް ޔާމީންގެ ގާނޫނީ ވަކީލު ޑރ. ޖަމީލް ވަނީ ރައީސް އިބްރާހީމް މުޙައްމަދު ޞާލިޙްގެ ރިޔާސީ ކެންޕެއިންގައި ވައުދުވެވަޑައިގެންނެވި ގޮތަށް ރިޟްވާނަށް އިންސާފު ހޯދައިދެވުނީތޯ ސުވާލު އުފައްދަވާފައެވެ.
މީގެ އިތުރުން ސިޔާސީ ތަހުގީގު ހިންގުމާއި ޕްރޮޮޕެގެންޑާ ލިޔުންތަކުން ރިޟްވާންގެ އާއިލާއަށް ތަސައްލީ ލިބެނީތޯވެސް ޑރ. ޖަމީލް ވަނީ ސުވާލު އުފައްދަވާފައެވެ. އަދި ރިޟްވާން މައްސަލާގައި ރައީސް ޔާމީންގެ ވެރިކަމުގައި ދައުވާ އުފުލުނު މީހުން ރައީސް ޞާލިޙްގެ ކައިރީގައި ނެތްތޯ އާއި 24 ގަޑިއިރުން ކުރަން ވައުދުވި ކަންތަކަށް 3 އަހަރާއި ކައިރިނުވޭތޯވެސް ޖަމީލު ވަނީ ސުވާލު އުފައްދަވާފައެވެ.
"ނާޤާބީލްކަމުގެ ރަންވަނަ ރައީސް ޞާލިޙް އަށް ލިބިއްޖެ"
– ޑރ. ޖަމީލް
މަރުކޮމިޝަންގެ މެމްބަރަކު ވިދާޅުވީ ރައީސް ޔާމީން ކޮމިޝަނަށް ހާޒިރުވުމަށް ދަންނަވާފައިވަނީ މ. ޝަނިންސްޓަރ އަޙްމަދު ރިޞްވާން އަބްދުﷲ ގެއްލުވާލި މައްސަލާގައި ކޮމިޝަނުން ކުރަމުންދާ ތަހުގީގުގައި ސުވާލު ކުރުމަށްކަމަށެވެ.
ރިޞްވާން ވަގައްނަގައި ގެއްލުވާލާފައި ވަނީ ރައީސް ޔާމީންގެ ވެރިކަމުގައި ނަމަވެސް މި މައްސަލައާއި ރައީސް ޔާމީންއާ ގުޅުމެއް ވާކަމެއްވެސް ނުވަތަ ނޫންކަމެއްވެސް ތަހުގީގީ އިދާރާއަކުންވެސް ނުވަތަ މަރު ކޮމިޝަނުންވެސް އަދި ހާމަކޮށްފައެއް ނުވެއެވެ.
މިނިވަން ނޫހުގެ ނޫސްވެރިޔާ ރިޟްވާން ގެއްލުވާލިތާ 6 އަހަރަށްވުރެ ގިނަ ދުވަސްވެފައިވާއިރު، އެ މަރުގެ މައްސަލައަށް އިންސާފް ހޯދައިދެއްވުމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެކެވެ. ރިޟްވާން ގެއްލުވާލި މައްސަލަ ބޭރުގެ އިންވެސްޓިގޭޓަރެއްގެ އެހީއާއިއެކު ތަޙްޤީގުކުރަމުންދާކަން މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަންނުން ހާމަކުރައްވަފައިވެއެވެ.
