އާރަށް ވިއްކާލައިގެން ލިބުނު ފައިސާ ރައީސް ޔާމީންގެ އެކައުންޓަށް ޖަމާކުރި މައްސަލާގައި ފުލުސް އޮފީހަށް އެމަނިކުފާނު ޙާޒިރުވުމަށް އަންގައިފިއެވެ.
ވ. އަތޮޅު އާރަށް ވިއްކާލައިގެން ލިބުނު 1 މިލިއަން ޑޮލަރު ނުވަތަ 15 މިލިއަން ރުފިޔާ ރައީސް ޔާމިންގެ އެކައުންޓަށް ޖަމާކުރި މައްސަލައިގައި، އެމަނިކުފާނު ފުލުހުންގެ އިދާރާއަށް ޙާޒިރުވުމަށް އަންގާފައިވަނީ މިއަދު މެންދުރު 02:00އަށެވެ. އާރަށު މައްސަލާގައި ރައީސް ޔަމީން ފުލުހުންގެ އިދާރާއަށް ޙާޒިރުވުމަށް އަންގާފައިވާއިރު، އެ މައްސަލައިގެ ތަހުޤީގު ނިންމައި ދައުވާކޮށްދިނުމަށް އެދި ޕްރޮސިކިއުޓަރ ޖެނަރަލްގެ އޮފީހަށް މިހާރު ވަނީ ފޮނުވާފައެވެ.
އާރަށަކީ ޑީއާރްޕީގެ ކުރީގެ ލީޑަރު އަދި މެލޭޝިޔާގައި ހުންނަވާ ސަފީރު ވިސާމް އަލީގެ ފިރިކަލުން އަހުމަދު ތަސްމީން އަލީގެ ހިއްސާ އޮތް ކުންފުންޏަކަށް ދީފައި އޮތް ރަށެކެވެ. 2015 ވަނަ އަހަރު އެރަށްވަނީ އެއަތޮޅު ފެލިދޫ ކައުންސިލާ ހަވާލުކޮށްފައެވެ. އަދި ޓޫރިސްޓް ރިސޯޓެއްގެ ގޮތުގައި އެރަށް ތަރައްގީކުރުމަށް ޓޫޖީ މޯލްޑިވްސް ކިޔާ ކުންފުންޏަކާވަނީ ފަހުން ހަވާލުކޮށްފައެވެ. އަދި އޭގެ ފަހުންވަނީ އެރަށް ބޭރުގެ ކުންފުންޏަކަށް ވިއްކާލާފައެވެ.
އާރަށު މައްސަލާގައި މީގެ ކުރިންވެސް ރައީސް ޔާމީން ފުލުސް އޮފީހަށް ޙާޒިރުކޮށްފައިވެއެވެ.
އާރަށް ވިއްކައިގެން ލިބުނު ފައިސާ ރައީސް ޔާމީންގެ އަމިއްލަފުޅު އެކައުންޓަކަށް ޖަމާކޮށްފައިވާކަން ހާމަވެފައިވަނީ އެމްއެމްޕީއާރްސީގެ ބޮޑު ޚިޔާނާތުގެ ތަހުޤީގުގެ ތެރެއިންނެވެ. އެއްމިލިޔަން ޑޮލަރުގެ މައްސަލައިގައި ރައީސް ޔާމީންގެ މައްޗަށް ދައުވާކުރުމަށް ފޮނުވާފައި މިވަނީ މަނީލޯންޑަރިންގެ ކުށް ސާބިތުވެ، އެމަނިކުފާނުގެ މައްޗަށް 2019 ވަނަ އަހަރު 5 އަހަރުގެ ޖަލު ހުކުމެއް އިއްވައި އެޙުކުން ތަންފީޒުކުރައްވަމުން ގެންދަވަނިކޮށެވެ.
ދަށުކޯޓުގެ އެ ނިންމުން ހައިކޯޓުގައި އިސްތިއުނާފުކުރުމަށްފަހު ރައީސް ޔާމިންގެ ފަރާތްޕުޅުން މިހާރުވަނީ އެމައްސަލަ އިސްތިއުނާފްކުރުމަށް ސުޕްރީމް ކޯޓަށްވެސް ހުށައަޅާފައެވެ.
މީގެ އިތުރުން ރ. ފުއްގިރި ވިއްކައިގެން ލިބުނު މިލިއަނަކަށްވުރެ ގިނަ ޑޮލަރު އަމިއްލަފުޅު އެކައުންޓަކަށް ޖަމާކުރި މައްސަލައިވެސް ރައީސް ޔާމީންގެ މައްޗަށް ކްރިމިނަލް ކޯޓުގައިދަނީ ޝަރީޢަތް ހިންގަމުންނެވެ. އެ މައްސަލާގައި އިއްޔެވެސް އަޑުއެހުމެއް ބާއްވާފައިވެއެވެ.
ރައީސް ޔާމީން ފުލުސް އޮފީހަށް މިއަދު ޙާޒިރުވުމަށް އަންގާފައިވާއިރު، މާދަމާ މަރު ކޮމިޝަނަށް ޙާޒިރުވުމަށްވެސް ވަނީ އަންގާފައެވެ.
