ޓިއުނީޝިއާއަށް އައިސްފައިވާ ސިޔާސީ ހަލަބޮލިކަމުގެ ތެރޭގައި، އެގައުމުގެ ރައީސަށް ފާޑުކިޔަމުންއައި އެގައުމުގެ ގާނޫނުހަދާ މަޖިލިހުގެ މެމްބަރަކު، ޓިއުނީޝިއާގެ އަސްކަރިއްޔާއިން ހައްޔަރު ކޮށްފިއެވެ.
އަސްކަރިއްޔާއިން ހައްޔަރުކުރި، ގާނޫނުހަދާ މަޖިލިސް މެމްބަރު ޔާސިން އަޔާރިގެ އަނބިކަމަލުންނާއި އަދި އޭނާގެ ގާނޫނީ ވަކީލު ވިދާޅުވެފައިވަނީ، އޭނާ ދިރިއުޅުއްވާ ގޭގަ ހުއްޓާ ސިފައިން އޭނާ ހައްޔަރު ކޮށްފައިވަނީ، ޓިއުނީޝިއާގެ ރައީސް ކައިސް ސައީދު އެގައުމުގެ ގާނޫނު ހަދާ މަޖިލިސް ސަސްޕެންޑްކޮށް، އަދި ބާރުތައް މުށުތެރެއަށް ލައްވައިގެން އުޅުއްވަނީ ގެނެވުނު ބަޢާވާތަކުން ކަމަށް މަޖިލިސް މެމްބަރު އޭނާގެ ފޭސްބުލް އެކައުންޓުގައި ލިޔުމާއި ގުޅިގެން ކަމުގައެވެ.
ޔާސިން އަޔާރިއަކީ ޓިއުނީޝިއާގެ ގާނުނު ހަދާ މަޖިލިހުގައި ހިމެނޭ ކުޑަ ޕާޓީއަކަށް ނިސްބަތްވާ މެމްބަރެކެވެ. އަދި އޭނާއަކީ، ފާއިތުވެދިޔަ ހަފްތާގައި ބޮޑުވަޒީރު މަގާމުން ދުރުކޮށް، އަދި ގާނޫނުހަދާ މަޖިލިސް ސަސްޕެންޑް ކޮށްފައިވާ ޓިއުނީޝިއާގެ ރައީސަށް ތަކުރާރުކޮށް ފާޑުކިޔަމުން އައި މެމްބަރެކެވެ.
ގާނޫނު ހަދާ މަޖިލިސް މެމްބަރު ހައްޔަރު ކުރުމާއި ގުޅޭގޮތުން ޓިއުނީޝިއާގެ ސަލާމަތީ ބާރުތަކުންވެސް އަދި ޝަރުޢީ ދާއިރާއިންވެސް މިހާތަނަށް އެއްވެސް ކޮމެންޓެއް ކޮށްފައެއް ނުވެއެވެ.
ޔާސިން އަޔާރިގެ އަނބިކަބަލުން ރޮއިޓާސްއަށް މައުލޫމާތު ދެމުން ބުނެފައިވަނީ، ރައީސްގެ ސަލާމަތީ ކަންކަން ބަލަހައްޓާ ފަރާތްތަކަމަށް ބުނާ، އާދައިގެ ހެދުމުގައި ތިބި 20 މީހަކު ދެމަފިރިން ދިރިއުޅޭ ގެއަށްވަދެ، އެގެ ބަލާފާސްކޮށްފައިވާ ކަމަށެވެ. އަދި ޔާސިން އަޔާރި ހައްޔަރުކޮށްފައިވަނީ، ހަމަނުޖެހުން ހިންގުމަށްފަހުގައި ކަމަށެވެސް އޭނާ ބުނެފައިވެއެވެ.
"އެމީހުން ޔާސިން އަޔާރި ހައްޔަރުކޮށްގެ ގެންގޮސްފައިވަނީ ގަދަބާރުން، އޭނާގެ މަންމަ ރޮމުން ދަނިކޮށް،" ޔާސިން އަޔާރިގެ އަނބިކަބަލުން ރޮއިޓާސްއަށް މައުލޫމާތު ދެމުން ބުނެފައި ވެއެވެ.
ޔާސިން އަޔާރިގެ ގާނޫނީ ވަކީލު ބައެއް މީޑިއާތަކަށް މައުލޫމާތު ދެމުން ބުނެފައިވަނީ، އާދައިގެ ހެދުމުގައި ތިބި ބަޔަކު، ޔާސިން އަޔާރިގެ ގެއަވަދެ ގަދަބާރުން އޭނާ ހައްޔަރުކޮށްގެން ގެންގޮސްފައިވާ ތަނެއް އެއްވެސް މީހަކަށް މިހާތަނަށް އެގިފައި ނުވާކަމަށެވެ.
2011 ވަނަ އަހަރު، މުޅި އަރަބިކަރަޔަށް އައި އަރަބި ބަހާރުގައި، ގައުމުތަކުގައި އޮތް ޒަމާންވީ ޚުދުމުޚުތާރު ވެރިކަންތަކާ ދެކޮޅަށް ގައުމުތަކުގެ ރައްޔިތުން ދެތުވެ ގެނައި އިންގިލާބުތަކުގައި، ހަގީގީ ޑިމޮކްރަޓިކް ބަދަލު އައި އެއްގައުމަކަށް ވެގެން ދިޔައީ ޓީއުނީޝީއާއެވެ.
މިގޮތުން އަރަބި ލީގުގައާއި، އެފްރިކަން ޔޫނިއަންއާއި، އަދި އޯގަނިޒޭޝަން އޮފް އިސްލާމިކް ކޯޕަރޭޝަންގެވެސް މެމްބަރު ގައުމެއް ކަމުގައިވާ، ޓިއުނީޝިއާއަށް ގެނެވުނު އިންގިލާބުގައި، 20 އަަހަރުވަންދެން އެގައުމުގައި ވެރިކަން ކުރަމުންއައި ޒައިން އަލް އާބިދީން ބިން އަލީ ވެރިކަމުން ދުރުކޮށް، އެގައުމަށް ޑިމޮރްސީ އައީ، 2014ވަނަ އަަހަރު ބޭއްވިގެން ދިޔަ ބަރުލަމާނީ އިންތިޚާބާ ހަމައިންނެވެ.
217 މެމްބަރުންގެ މައްޗަށް އެކުލެވޭ، ޓީއުނީޝިއާގެ މަޖިލިސް އެއިންތިޚާބުގައި 85 ގޮޑިއާއެކު ކާމިޔާބުކުރި ސެކިއުލަރ ޕާޓީއެއްކަމުގައިވާ ނިދާ ތޫނިސް ޕާޓީންނެވެ.
އެއަށްފަހު ފާއިތުވި 10 އަހަރުތެރޭގައި ޓިއުނީޝިއާ ހިމެނިގެންދިޔައީ، އަރަބި ބަހާރަށްފަހު ގައުމުތަކުގެ ވެރިކަންތަކަށް އައި ބަދަލުތަކާއެކު، ފުރިހަމަ ޑިމޮކްރަސީއެއްގައި ހިފަހައްޓާލެވުނު ހަމައެކަނި ގައުމުކަމުގައެވެ.
އެހެންނަމަވެސް، ޓިއުނީޝީއާގެ މިހާރުގެ ރައީސް ކައިސް ސައީދުވަނީ، ފާއިތުވެދިޔަ ހަފްތާގެ އާދީއްތަދުވަހުގެ ރޭ އެގައުމުގެ ގާނޫނު ހަދާ މަޖިލިސް 1 މަސްދުވަހުގެ މުއްދަތަށް ސަސްޕެންޑްކޮށް، ބޮޑުވަޒީރު މަގާމުން ދުރުކޮށް، ބާރުތަށް އަތްޕުޅަށް ނަންގަވާފައެވެ.
ނަތީޖާއެއްގެ ގޮތުން، ޚުދުމުޚްތާރު ވެރިކަމަކުން ސުލްހަވެރިކާމާއެކު ޑިމިކްރަސީއަކަށް ރުޖޫޢަވި، މިގައުމުގެ ސިޔާސީ މަސްރަހު ހަލަބޮލިވެ، ދުނިޔޭގެ ގައުމުތައްވެސް މިހާރު އިންތިޒާރު ކުރަމުންދަނީ އެގައުމުގެ ރައީސް އަޅުއްވަމުން ގެންދަވާ ފިޔަވަޅުތަކާއެކު އެގައުމުގެ ޑިމޮކްރަސީއަށް ދެން ވެގެންދާނެ ގޮތްތަކާއި އަންނާނެ ބަދަލުތަކަށެވެ.
