2011 ވަނަ އަހަރު، މުޅި އަރަބިކަރަޔަށް އައި އަރަބި ބަހާރުގައި، ގައުމުތަކުގައި އޮތް ޒަމާންވީ ޚުދުމުޚުތާރު ވެރިކަންތަކާ ދެކޮޅަށް ގައުމުތަކުގެ ރައްޔިތުން ދެތުވެ ގެނައި އިންގިލާބުތަކުގައި، ހަގީގީ ޑިމޮކްރަޓިކް ބަދަލު އައި އެއްގައުމަކަށް ވެގެން ދިޔައީ ޓީއުނީޝީއާއެވެ.

މިގޮތުން އަރަބި ލީގުގައާއި، އެފްރިކަން ޔޫނިއަންއާއި، އަދި އޯގަނިޒޭޝަން އޮފް އިސްލާމިކް ކޯޕަރޭޝަންގެވެސް މެމްބަރު ގައުމެއް ކަމުގައިވާ، ޓިއުނީޝިއާއަށް ގެނެވުނު އިންގިލާބުގައި، 20 އަަހަރުވަންދެން އެގައުމުގައި ވެރިކަން ކުރަމުންއައި ޒައިން އަލް އާބިދީން ބިން އަލީ ވެރިކަމުން ދުރުކޮށް، އެގައުމަށް ޑިމޮރްސީ އައީ، 2014ވަނަ އަަހަރު ބޭއްވިގެން ދިޔަ ބަރުލަމާނީ އިންތިޚާބާ ހަމައިންނެވެ.

217 މެމްބަރުންގެ މައްޗަށް އެކުލެވޭ، ޓީއުނީޝިއާގެ މަޖިލިސް އެއިންތިޚާބުގައި 85 ގޮޑިއާއެކު ކާމިޔާބުކުރި ސެކިއުލަރ ޕާޓީއެއްކަމުގައިވާ ނިދާ ތޫނިސް ޕާޓީންނެވެ.

އެއަށްފަހު ފާއިތުވި 10 އަހަރުތެރޭގައި ޓިއުނީޝިއާ ހިމެނިގެންދިޔައީ، އަރަބި ބަހާރަށްފަހު ގައުމުތަކުގެ ވެރިކަންތަކަށް އައި ބަދަލުތަކާއެކު، ފުރިހަމަ ޑިމޮކްރަސީއެއްގައި ހިފަހައްޓާލެވުނު ހަމައެކަނި ގައުމުކަމުގައެވެ.

އެހެންނަމަވެސް، ޓިއުނީޝީއާގެ މިހާރުގެ ރައީސް ކައިސް ސައީދުވަނީ، މިހަފްތާގެ އާދީއްތަދުވަހުގެ ރޭ އެގައުމުގެ ގާނޫނު ހަދާ މަޖިލިސް 1 މަސްދުވަހުގެ މުއްދަތަށް ސަސްޕެންޑްކޮށް، ބޮޑުވަޒީރު މަގާމުން ދުރުކޮށްފައެވެ.

ނަތީޖާއެއްގެ ގޮތުން، ޚުދުމުޚްތާރު ވެރިކަމަކުން ސުލްހަވެރިކާމާއެކު ޑިމިކްރަސީއަކަށް ރުޖޫޢަވި، މިގައުމުގެ ސިޔާސީ މަސްރަހު ހަލަބޮލިވެ، ދުނިޔޭގެ ގައުމުތައްވެސް މިހާރު އިންތިޒާރު ކުރަމުންދަނީ އެގައުމުގެ ރައީސް އަޅުއްވަމުން ގެންދަވާ ފިޔަވަޅުތަކާއެކު އެގައުމުގެ ޑިމޮކްރަސީއަށް ދެން ވެގެންދާނެ ގޮތްތަކާއި އަންނާނެ ބަދަލުތަކަށެވެ.

ތިރީގައި މި ބަޔާން ކުރަނީ، ޓިއުނީޝީއާގެ ހަލަބޮލިވެފައިވާ ސިޔާސީ މަސްރަހުގައި އެންމެ މުހިންމު ދައުރެއް އަދާކުރަމުންދާ ސިޔާސީ އިސް ފަރާތްތަކަށެވެ.

ރައީސް ކައިސް ސައީދު

ހުރިހާ ގޮތަކުން ބެލިކަމުގައިވި ނަމަވެސް، ޓިއުނީޝިއާގައި މިހާރު އުފެދިފައިވާ ސިޔާސީ ކާރިސާގެ މެދުގައި ހުންނެވީ ރައީސް ސައީދުއެވެ.

އޭނާ މިހަފްތާގެ އާދީއްތަދުވަހުގެ ރޭ، ޓިއުނީޝިއާގެ ގާނޫނުހަދާ މަޖިލިސް އުވާލާ، އަދި ބޮޑުވަޒީރު މަގާމުން ދުރުކުރި ހިސާބުން، ގައުމުގެ އެކި ހިސާބުތަކުގައި، އޭނާގެ މިނިންމުމާ ދެކޮޅު ހެދުމުގެ ގޮތުންނާއި އަދި އޭނާއަށް ތާއީދު ކުރުމުގެ ގޮތުންވެސް ދަނީ މުޒާހިތާތައް ކުރެވެމުންނެވެ.

މިހާރުގެ ރައީސް ސައީދުއަކީ، 2019ގެ ޓިއުނީޝިއާގެ ރިޔާސީ އިންތިޚާބުގައި ވާދަކުރުމުގެ ޝައުގުވެރިކަން އެންމެ ފުރަތަމަ ފާޅުކުރެއްވި ކެނޑިޑޭޓޭވެ. އޭނާ އެ އިންތިޚާބުގައި ވާދަކޮށްފައިވަނީ އެއްވެސް ސިޔާސީ ޕާޓީއަކާއި ގުޅިވަޑައިގެނެއް ނޫނެެވެ. ނަތީޖާއެއްގެ ގޮތުން، ސިޔާސީ ފަރާތްތަކުގެ ޗަރުކޭސްތަކުގެ މަތިން ފޫހިވެފައިވާ އެތަކެއް ރައްޔިތުންނެއްގެ ތާއީދު އޭނާއަށް ލިބިގެން ދިޔައެވެ. އަދި ވަކީން ޚާއްސަކޮށް، ޓިއުނީޝިއާގެ ޒުވާން އާބާދީގެ ބޮޑު އިންސައްތައެއްގެ ތާޢީދުވެސް އޭނާއަށް އެ އިންތިޚާބުގައި ލިބިގެން ގޮސްފައި ވެއެވެ.

ހާޝިމް މަޗީޗީ

ހާޝިމް މަޗީޗީއަކީ، މި ހަފްތާގެ އާދީއްތަ ދުވަހު، ރައީސް ސައީދު މަގާމުން ދުރު ކުރެއްވި ބޮޑުވަޒީރެވެ. އޭނާ ޓިއުނީޝިއާގެ ބޮޑުވަޒީރުކަން ކުރައްވާފައިވަނީ އަހަރެއްހާ ދުވަހުގެ މުއްދަތަކަށެވެ.

އުމުރުން 47 އަހަރުގެ މަޗީޗިވަނީ، ރައީސް ސައީދުގެ ލީގަލް އެފެއާޒްގެ އެންމެ މަތީ މުޝީރުކަން 2020 ވަނަ އަހަރުގެ ފެބުރުއަރީ މަހުންފެށިގެން، އެއަހަރުގެ ސެޕްޓެމްބަރު މަހު އެގައުމުގެ ބޮޑުވަޒީރުކަމަށް އައްޔަން ވަންދެން އަަދާ ކުރައްވާފައެވެ.

ރަޝިދު ޢަނޯޗި

ރަޝިދު ޢަނޯޗިއަކީ، ޓިއުނީޝިއާގެ ގާނޫނު ހަދާ މަޖިލިހުގެ ރައީސްއެވެ. އަދި އޭނާއަކީ، ގާނޫނު ހަދާ މަޖިލިހުގައި ހިމެނޭ އެންމެ ބޮޑު ޕާޓީކަމުގައިވާ އެންނަހުދާ ޕާޓީގެ ވެރިޔާވެސްމެއެވެ.

އިސްލާމިސްޓް ޕާޓީއެއްކަމުގައިވާ އެންނަހުދާ ޕާޓީއަކީ ގާނޫނުހަދާ މަޖިލިހުގެ އެންމެ ބޮޑު ޕާޓީއަށް ވެގެން ގޮސްފައިވަނީ، ސުވާލު އުފެދޭ ގޮތަކަށެވެ. އަދި ގިނަ ބަޔަކު ގަބޫލުކުރާ ގޮތުގައި، ގާނޫނު ހަދާ މަޖިލިހުގެ އެންމެ ބޮޑު ޕާޓީކަމުގައި މިޕާޓީ ވެގެން ގޮސްފައިވަނީ، މިފާޓީ އުފެއްދިއިރު، ޓިއުނީޝިއާގައި މަދު ޕާޓީތަކެއް އެކަނި އުފެދިފައި ވާތީއެވެ.

މީގެ ހެއްކެއްގެ ގޮތުން، 2019ވަނަ އަހަރު ޓިއުނީޝިއާގައި ބޭއްވުނު ގާނޫނުހަދާ މަޖިލިސް އިންތިޚާބުގައި މި ޕާޓީއަށް ހާސިލް ކުރެވިގައިވަނީ އެންމެ %40 އެވެ.

މިހާރު ސަސްޕެންޑް ކުރެވިގައިވާ ގާނޫނުހަދާ މަޖިލިހުގައި އެންމެ ގިނަ ގޮޑި ތަމްސީލުކުރާ ޕާޓީގެ މައްޗަށް މިހާރުވެސް ދަނީ، 2019ވަނަ އަހަރުގެ މަޖިލިސް އިންތިޚާބަށް ބޭރުގެ ފަރާތްތަކުން ފަންޑު ހޯދުމުގެ ކުށުގައި ޚާއްސަ ތަހުގީގެއް ހިންގެމުންނެވެ.

ނަބީލް ކަރޯއި

ނަބީލް ކަރޯއިއަކީ، ޓިއުނީޝިއާގެ ގާނުނު ހަދާ މަޖިލިހުގެ ކުރީގެ މެމްބަރެކެވެ. އަދި އޭނާއަކީ، ގާނޫނު ހަދާ މަޖިލިހުގެ ބޮޑު މެޖޯރިޓީއެއް ތަމްސީލުކުރަމުންދާ ހާރޓްސް އޮފް ޓިއުނީޝިއާ ޕާޓީގެ އިސް ލީޑަރުވެސްމެއެވެ. ސަސްޕެންޑް ކުރެވިފައިވާ މަޖިލިހުގައި ހިމެނޭ އެންމެ ބޮޑު ޕާޓީކަމުގައިވާ އެއްނަހުދާ ޕާޓީއާއި ޖެހިގެން ދެން އެންމެ ގިނަ ގޮޑި ތަމްސީލު ކުރަމުންދަނީ ނަބީލް ކަރޯއިގެ ހާރޓްސް އޮފް ޓިއުނީޝިއާ ޕާޓީއެވެ.

އަބިރު މުއްސި

އަބިރު މުއްސިއަކީ، ޓިއުނީޝިއާގެ މަޝްހޫރު ސިޔާސީ ޝަޚުސިއްޔަތެކެވެ. އަދި އޭނާ ފާހަގަވެގެން ގޮސްފައިވަނީ، އިސްލާމިސްޓް އެންނަހުދާ ޕާޓީއާއި އިދިކޮޅަށް އަޑު އުފުއްލެވުމުގައި އެންމެ ކުރީގައި ހުންނަވާ ބޭފުޅާކަމުގައެވެ.

އަދި އޭނާ ގެންދަވަނީ، ޓިއުނީޝިއާގެ ސިޔާސީ ޕާޓީއެއްކަމުގައިވާ ފްރީ ޑެސްޓުއަރިއަން ޕާޓީގެ ލީޑަރުކަން 2016ވަނަ އަހަރުން ފެށިގެން ކުރައްވަމުންނެވެ.