ޕަބްލިކް ސާވިސް މީޑިއާ ޕީއެސްއެމްގެ ޚަބަރު ވެބްސައިޓް ޑައުންކޮށްލައިފި އެވެ.
ޕީއެސްއެމުން ނަންހާމަކުރަން ނޭދޭ ފަރާތަކުން ޚަބަރު އޮންލައިނަށް މައުލޫމާތު ދެމުން ބުނީ އެ ކުންފުނީގެ ވެބްސައިޓް ޑައުންކޮށްފައިވަނީ ވެބް އޮޕަރޭޓަރަށް ދައްކަންޖެހޭ ގިނަ އަދަދެއްގެ ފަައިސާ ނުދައްކާ ހުރުމުން ކަމަށެވެ.
އަދި އަލުން ވެބްސައިޓް އަޕްކުރުމަށް މަދުވެގެން 2000 ޑޮލަރު ދައްކަން ޖެހޭ ކަމަށާއި އެ ފައިސާ ހަަމަޖައްސަން ހަތަރުވަރަކަށް ދުވަސް ވާނެކަމަށް ކުންފުނީފެ ފައިނޭނސް ޑިޕާޓްމަންޓުން ބުނެފައި ވާކަމަށްވެސް މައުލޫމާތު ހިއްސާކުރި ފަރާތުން ވަނީ ބުނެފަ އެވެ. ޑިވެލޮޕަރަށް ދައްކަންޖެހޭ ފައިސާ ނުދައްކާނަމަ ވެބްސައިޓް ޑައުންކޮށްލާނެކަން ކުރިން އަންގާފައި ވާކަމަށްވެސް މައުލޫމާތު ހިއްސާކުރި ފަރާތުން ވަނީ ބުނެފަ އެވެ.
މިކަމާ ގުޅިގެން އޮންލައިން ނޫސް "ސަން" އިން ކުރި ސުވާލަކަށް ޖަވާބުދެއްވަމުން ޕީއެސްއެމްގެ މެނޭޖިން ޑިރެކްޓަރު އަލީ ޚާލިދު ވިދާޅުވީ އެފަދަ އެއްވެސް ކަމެއް ނުހިނގާ ކަމަށާއި ދިމާވެގެން އުޅެނީ ޓެކްނިކަލް މައްސަލައެއް ކަމަށެވެ.
ނަމަވެސް ޕީއެސްއެމުން ޚަބަރު އޮންލައިނާ ވާހަކަދެއްކި، މި މައުލޫމާތު އެނގޭ އެކަކަށްވުރެ ގިނަ މީހުން ވަނީ އެމްޑީގެ މި ވާހަކަތައް ދޮގުކޮށްފަ އެވެ.
ޕީއެސްއެމްއަކީ ކޮންމެ އަހަރަކުވެސް ދައުލަތުގެ ބެޖެޓުން ބޮޑު އަދަދެއް ޚަރަދުކޮށްގެން ހިންގާ ކުންފުންޏަކަށް ވާއިރު މިފަދަ ހާލަތަކަށް ކުންފުނީގެ ހާލަތު ދިއުމުން ގިނަބަޔަކު ގެންދަނީ ކުންފުނި ހިންގަން ތިއްބެވި ވެރިންގެ ގާބިލިއްޔަތުކަމާމެދު ސުވާލު އުފައްދަމުންނެވެ. ރާއްޖޭގައި ސްޕޮންސަރުން މީޑިއާތަކަށް ކުރާ ހޭދައިގެ ބޮޑު އިންސައްތައެއްވެސް ހޭދަކުރާ ކުންފުންޏަކީ ދައުލަތުގެ މީޑިއާއެވެ.
