ހިތްތަކުގައި ލޯތްބާއި އިޙްތިރާމް ޤާއިމްކުރެވޭނީ ކުށަކާއިނުލާ ހައްޤުތައް ނިގުޅައިގަނެވިފައިވާ އެތަށް ބަޔަކަށް އިންސާފު ޤާއިމު ކޮަށްދެއްވުމުން ކަމުގައި ހެލްތު މިނިސްޓްރީގެ ކުރީގެ ޑިޕއުޓީ މިނިސްޓަރ ނިޝާމާ މުހައްމަދު ވިދާޅުވެއްޖެއެވެ.
ނިޝާމާއަކީ ވެންޓިލޭޓަރުތަކުގެ މައްސަލައިގައި މަޤާމުގެ މަސްޢޫލިއްޔަތުތަކުން އެކަހެރި ކުރުމަށްފަހު، މިއަހަރުގެ މޭ މަހުގެ ތެރޭގައި މަޤާމުން ވަކިިކުރައްވާފައިވާ ބޭފުޅެކެވެ. ނިޝާމާއަކީ ރައީސް އިބްރާހިމް މުހައްމަދު ޞާލިހު ވެރިކަމަށް ގެނައުމަށް ކޯލިޝަން ޕާޓީތަކުގެ ތެރެއިން ޖުމްހޫރީ ޕާޓީގައި ވަރަށް އިސްދައުރެއް އަދާކުރެއްވި ކަނބަލެކެވެ.
ސިޔާސީ މަސްރަހު އިތުރަށް ހަލަބޮލިވެ، ރައީސް ނަޝީދާއި، ރައީސް ޞާލިހުގެ ސިޔާސީ ގުޅުން އެކި ނިމިފައިވާކަން ހާމަކޮށްފައިވާ މިދަނޑިވަޅުގައި ނިޝާމާ ވިދާޅުވީ ރައީސް ޞާލިހު ރައްޔިތުންގެ ހިތްތަކުގައިވާ ލޯބި ހޯދަން ބޭނުންނަމަ، ތަރައްޤީގެ މަޝްރޫޢުތަކާއި، އެނޫންވެސް މަސައްކަތް ކުރުމުގެ ބަދަލުގައި ކުރައްވަން ޖެހޭކަމަކީ އިންސާފުން ބޭރުން އަނިޔާލިބެމުންދާ އަދި އަނިޔާ ލިބިފައިވާ މީހުންނަށް އިންސާފު ހޯދައި ދެއްވުން ކަމަށެވެ. އެކަން ނުކޮށް، ކިތަންމެ ކޮންކްރީޓް ތަރައްޤީއެއް ގެނައުމަށް މަސައްކަތް ކުރެއްވިޔަސް ރައްޔިތުންގެ ލޯބި ނުލިބޭނެކަމަށް ނިޝާމާ ވިދާޅުވިއެވެ.
I wasn't mistaken that day.
ނަމަވެސް، ރައީސް @ibusolih އަށް ދަންނަވާލަން ބޭނުންވަނީ، ހިތްތަކުގައި ލޯތްބާއި އިޙްތިރާމް ޤާއިމްކުރެވޭނީ، ތަރައްޤީގެ ކޮންކްރީޓް މަޝްރޫޢު ތަކަށްވުރެ، ކުށަކާއިނުލާ ހައްޤުތައް ނިގުޅައިގަނެވިފައިވާ އެތަށް ބަޔަކަށް އިންސާފު ޤާއިމު ކޮަށްދެއްވުމުންނޭ! pic.twitter.com/9cGnzL3xo9— Nisha_Mohamed (@Nishama_Mohamed) July 13, 2021
ނިޝާމާ އަކީ ވެންޓިލޭޓަރު ސަޕްލައިކޮށްދޭނެ ފަރާތެއް ހޯދުމަށް ކުރި އިއުލާނާ ގުޅިގެން ހުށަހެޅި ޕްރޮޕޯސަލްތައް ދިރާސާކުރި ހެލްތު މިނިސްޓްރީގެ ބިޑް ކޮމިޓީގެ ޗެއާއެވެ.
ވެންޓިލޭޓަރުގެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރުމަށްފަހު 12 މީހެއްގެ މައްޗަށް ދައުވާ ކުރަން ޕްރޮސިކިއުޓާ ޖެނެރަލް އޮފީހަށް ދެ ފަހަރަށް ފޮނުވި އެވެ. ނަމަވެސް މައްސަލަ ސާބިތު ކުރެވޭ ވަރަށް ހެކި ނެތް ކަމަށް ވިދާޅުވެ އެ މައްސަލާގައި އެއްވެސް މީހެއްގެ މައްޗަށް ޕީޖީ އަދި ދައުވާ އުފުލާފައެއް ނުވެއެވެ.
