މަލޭޝިއާގައި، ކޯވިޑްގެ ހާލަތު އެންމެ ގޯސް ސިޓީގައި ގާއިމް ކޮށްފައިވާ އެންމެ ބޮޑު އެއް ވެކްސިން ސެންޓަރުގައި މަސައްކަތް ކުރަމުންދިޔަ 200 މެޑިކަލް ސްޓާފަކު ކޯވިޑް19އަށް ޕޮޒިޓިވް ވުމާއި ގުޅިގެން ވެކްސިން ސެންޓަރު ބަންދު ކޮށްފިއެވެ.

މެލޭޝިއާގެ މި ވެކްސިން ސެންޓަރު ބަންދު ކޮށްފައިވާއިރު، އެގައުމުގައި ކޯވިޑް19ގެ ހާލަތު ގޯސްވެ، އަންގާރަ ދުވަހު އަލަށް ކޯވިޑަށް ޕޮޒިޓިވް މީހުންގެ އަދަދު 11،079 އަށް ވަނީ އަރާފައެވެ.

މެލޭޝިއާގެ ވެކްސިން ޖެހުމއި ހަވާލުވެހުރި އެންމެ އިސްފަރާތް ކަމުގައިވާ ޚައިރީ ޖަމާލުއްދީން ވިދާޅުވެފައިވަނީ، ސެލަންގޯރު ސްޓޭޓުގެ ސެންޓަރގައި ހުންނަ ހުންނަ އައިޑިއަލް ކޮންވެންޝަން ސެންޓަރުން ފާހަގަވި މި ކްލަސްޓަރ މިހާރު ކޮންޓްރޯލް ކޮށްފައިވާ ކަމަށެވެ.

މެލޭޝިއާގެ ނޭޝަނަލް އިމިއުނޭޝަން ޕްރޮގްރާމް ހިންގުމާއި ހަވާލުވެ ހުންނެވި ޚައިރީ ވިދާޅުވި ގޮތުގައި، ކޯވިޑް ވެކްސިން ސެންޓަރުގައި މަސައްކަތް ކުރަމުން ދިޔަ ދެ މުވައްޒިފަކު ކޯވިޑަށް ޕޮޒިޓިވް ވުމާއި ގުޅިގެން އެ ސެންޓަރުގައި މަސައްކަތް ކުރަމުން ދިޔަ 453 މުވައްޒިފަކު ކޯވިޑަށް ޓެސްޓް ކޮށްފައިވާ ކަމަށެވެ. ޚައިރީ ވިދާޅުވި ގޮތުގައި، 204 މުވައްޒިފަކު ޕޮޒިޓިވް ވި ކަމުގައިވި ނަމަވެސް، ޕޮޒިޓިވްވި މުވައްޒިފުންގެ ގައިން ފެނިފައިވަނީ ވައިރަހުގެ މަދު މިންވަރެއް ކަމުގައެވެ.

އަދި ސަބަބެއް ކަމުގައި އޭނާ ވިދާޅުވެފައިވަނީ، ބެލެވޭ ގޮތުގައި، މި ސެންޓަރުގައި މަސައްކަތް ކުރަމުން ދިޔަ 400 މުވައްޒިފުންގެ %88 ވެކްސިން ފުރިހަމަ ކޮށްފައި ވުމެވެ.

އޭނާވަނީ، މި ސެންޓަރުގައި ވެކްސިން ޖަހާފައިވާ އެންމެން 10 ދުވަހަށް އައިސޮލޭޓު ވުމަށް އެދިފައެވެ. އަދި ކޯވިޑްގެ އެއްވެސް އަލާމާތެއް ފެނިއްޖެނަމަ، ޓެސްޓުކުރުމަށް ވެސް އެނާވަނީ އެދިފައެވެ.

މި ހަފްތާގެ ހުކުރުދުވަހު މި ސެންޓަރަށް ވެކްސިން ޖެހުމަށް އައިސްފައިވަނީ ކިހާ އަދަދެއްގެ ބައެއްކަން އޭނާ ހާމަ ކުރައްވާފައެއް ނުވެއެވެ.

މި ސެންޓަރަކީ ދުވާލަކު 6،000 މީހުންނަށް ވެކްސިން ޖެހުމުގެ ގާބިލްކަން ލިބިފައިވާ ސެންޓަރެކެވެ.

މަލޭޝިއާގެ ވެރިރަށް ކުއާލާލަމްޕޫރާ އިންވެގެން އޮންނަ ސްލަންގޯރަކީ މެލޭޝިއާގައި ކޯވިޑްގެ ހާލަތު އެންމެ ގޯސް ސިޓީއެވެ.

ފާއިތުވެދިޔަ ޖޫންމަހުގެ 1ވަނަ ދުވަހުން ފެށިގެން މެލޭޝިއާ ލޮކްޑައުން ކޮށްފައި އޮތް ނަމަވެސް، މެލޭޝިއާގައި އަދިވެސް ކޯވިޑްގެ ހާލަތު ދަނީ ގޯސްވަމުންނެވެ. މިގޮތުން ފާއިތުވެދިޔަ ޖޫންމަހުގެ 1 ވަނަ ދުވަހުން ފެށިގެން ކޯވިޑަށް ޕޮޒިޓިވްވީ މީހުންގެ އަދަދުވަނީ %50 އިތުރު ވެފައެވެ. މިގޮތުން މެލޭޝިއާގައި ކޯވިޑަށް ޕޮޒިޓިވް ވެފައިވާ މީހުންގެ އަދަދު މިހާރުވަނީ 855,949 އަރާފައެވެ.

އަދި ކޯވިޑް ބަލީގައި މަރުވި މީހުންގެ އަދަދު ދެގުނަވެ މިއަދަދު ވަނީ 6,200 އަށް އަރާފައެވެ.

މެލޭޝިއާގައި މިހާތަނަށް ކޯވިޑް ވެކްސިންގެ ދެޑޯޒު ދެވިފައިވާ މީހުންގެ އަދަދު ވަނީ 11 މިލިއަނަށް އަރާފައެވެ. އަދި މުޅި ގައުމުގެ 32 މިލއަންގެ އާބާދީގެ ހަތަރުބައި ކޮށްފަ އެއްބައަށް މިހާރުވަނީ ވެކްސިން އެއް ޑޯޒް ދެވިފައެެވެ.