ކުދި ވިޔަފާރި އާއި މެދުފަންތީގެ ވިޔަފާރިތައް ތަރައްޤީކުރުމަށް އެހީތެރިވުމަށް އިކޮނޮމިކް މިނިސްޓްރީގެ ދަށުން އުފައްދަވާފައިވާ ބިޒްނަސް ސެންޓަރ ކޯޕަރޭޝަނުން ރާއްޖޭގައި ފުރަތަމަ ފަހަރަށް 'ކޯ ވޯކް ސްޕޭސް' އެއް ހުޅުވައިފިއެވެ.
'ސީޑް ބައި ބީ.ސީ.ސީ’ގެ ނަމުގައި ހުޅުވި މިތަން ފަރުމާކޮށްފައިވަނީ އެކި އެކި މަސައްކަތްކުރާ ފަރާތްތަކަށް ބޭނުންވާ ވަސީލަތްތަކާއެކު އެކުވެރި މާހައުލެއްގައި މަސައްކަތްކުރެވޭނެ ގޮތަކަށެވެ. މިއީ މިނިސްޓްރީ އޮފް އިކޮނޮމިކް ޑިވެލޮޕްމަންޓުންގެ އިސްނެންގެވުމަކަށް ޔޫއެންޑީޕީ އާއި ޖަޕާން ސަރުކާރުގެ އެހީގައި ޤާއިމްކޮށްފައިވާ ތަނެކެވެ.
'ސީޑް ބައި ބީސީސީ' ހުޅުއްވައިދެއްވީ، އިކޮނޮމިކް މިނިސްޓަރ ފައްޔާޒް އިސްމާޢީލް އެވެ. މި ރަސްމިއްޔާތުގައި ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ރެސިޑެންޓް ރެޕްރެޒެންޓޭޓިވް މިސް. ވެރާ ހަކީމް ޖަޕާނު އެމްބަސީގެ އިކޮނޮމިކް ކޯޕަރޭޝަންގެ ހެޑް، މިސް. ނައޯކޯ ޔުޒާވާ ބައިވެރިވެރިވަޑައިގެންނެވި އެވެ.
The first of its kind co-workspace #SEEDbyBCC provides an affordable office environment equipped with a wide range of amenities. @BCC_mv @SEEDbybcc
The project was undertaken by @MoEDmv with support from @UNDP, @JapanGov and @dhiraagu. pic.twitter.com/ofBgndv1Nj
— Government of Maldives (@governmentmv) July 9, 2021
މިއީ، ގޭގައި ތިބެގެން ޢާމްދަނީ ލިބޭނެފަދަ މަސައްކަތްތައް ކުރާ ކުދި ވިޔަފާރިވެރިންނާއި، އެނޫންވެސް ކުދި ވިޔަފާރިތަކާއި، އަލަށް ވިޔަފާރިއެއް ފަށަން ބޭނުންވެގެން މަސައްކަތް ކުރާ މީހުންނަށްވެސް އެރޮނގުން ކުރިއަށްދާން އިތުރު ފުރުޞަޠުތައް ހޯދައިދިނުމުގެ ވަޢުދާއެކު، އަގުހެޔޮ މަސައްކަތުގެ މާޙައުލެއް ކޮންމެ މީހަކަށްވެސް ލިއްބައިދެވޭނެ ފަހި ފުރުޞަޠާއެކު ޤާއިމްކޮށްފައިވާ ތަނެއް ކަމަށް ބީސީސީން ބުނެއެވެ.
މިތަނުގައި މަސައްކަތުގެ މާޙައުލެއްގައި ބޭނުންވާނެ އެންމެ ޒަމާނީ ފެންވަރުގެ ވަޞީލަތްތައް ވަނީ ޤާއިމް ކޮށްފަ އެވެ. އެގޮތުން ތަނުގައި ހުރި ފަރުނީޗަރާއި، މީޓިންގ ރޫމްތަކަކީ އެފަދަ ތަނަކަށް އެންމެ އެކަށީގެންވާ ތަކެތިކަން ފާހަގަކޮށްލެވެއެވެ.
ސީޑްސް ކޯ-ވޯކްސްޕޭސްގައި މަސައްކަތްކުރަން ބޭނުންވާ ފަރާތްތަކަށް އެތަން ބުކް ކުރުމުގެ ޚިދުމަތް އޮންލައިންކޮށް ސީޑްސްގެ ވެބްސައިޓުން ލިބޭނެ ކަމަސްވެސް ބީސީސީން ބުނެއެވެ.
"ސީޑް ބައި ބީ.ސީ.ސީ"އިން ޤާއިމްކުރި ކޯ ވޯކް ސްޕޭސްގައި އެއްފަހަރާ 30 މީހުންނަށް މަސައްކަތް ކުރެވޭނެ އެވެ. އަދި އެތަނުން އިންޓަރނެޓްގެ ޚިދުމަތާއި ޕްރިންޓް ކުރުމާއި ސްކޭން ކުރުންފަދަ ޚިދުމަތްވެސް ލިބޭނެއެވެ. އެތަނުގައި މަސައްކަތްކުރަން ބޭނުންވާ ފަރާތްތަކަށް ގަޑިއިރަކަށް، ހަފްތާއަކަށް ނުވަތަ މަހުފީ ދައްކައިގެންވެސް ވޯކް ސްޕޭސް ބުކް ކުރެވޭނެކަމަށް ބީސީސީން ބުނެއެވެ.
ކޮމެންޓު ފޮނުވާ