ރާއްޖޭގައި ނަފްރަތު އުފެއްދުން ނައްތާލަން ބޭނުން ނަމަ އަދުލުވެރިވާންޖެހޭ ކަމަށް ކުރީގެ އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެ އެވެ.
ދީނާ ގުޅުވައިގެން ނަފްރަތު އުފެއްދުމާގުޅޭގޮތުން ދެކެވޭ ވާހަކަތަކާ ގުޅިގެން ޑރ ޝަހީމް ކުރެއްވި ޓްވީޓެއްގައި ވިދާޅުވީ، ދިވެހިރާއްޖޭގައި ދީނާ ގުޅިގެން ނަފްރަތު އުފެދޭ އެންމެ ބޮޑު އަސްލަކީ ދީނަށް ފުރައްސާރަކުރުން ކަމަށެވެ. އަދި ދީނަށް ފުރައްސާރަކުރުމުގެ އެއްވެސް ކަމެއްގައި ފިޔަވަޅު އެޅޭތަން ނުފެންނަ ކަމަށް ޑރ. ޝަހީމް ވަނީ ވިދާޅުވެފައެވެ.
އެހެންނަމަވެސް ދީނީ އިލްމުވެރިޔަކު އޭނާއަށް ފެންނަ ރައުޔެއް ހާމަކުރުމާއެކު ބިރުދައްކަން ކަންކަން ކުރާ ތަން ފެންނަމުންދާކަމަށް ޑރ. ޝަހީމް ވިދާޅުވި އެވެ.
އެހެންކަމުން ނަފްރަތު ނައްތާލަން ބޭނުންނަމަ އަދުލުވެރި ވާން ޖެހޭކަމަށް ޝަހީމް ވިދާޅުވިއެވެ.
Raajjeyga dheenaa gulhigen nafrathu ufedhhey emme bodu aslaki dheenah furasaarakurun. Ein kameh ga evves fiyavalheh neylhey. Ekamaku dheenee ilmuveriyaku eynaa ah fenna rauyeh eh buneemaa biru dhakkai kankan kuranee. Nafrathu nathaalan beynun nama ebajehey adhuluverivaan
— Mohamed Shaheem Ali Saeed (@Mohamedshaheem1) June 28, 2021
ޝަހީމް މިފަދައިން ވިދާޅުވެފައި މި ވަނީ އަންހެނުން ޚިތާނު ކުރުމާއި ގުޅޭ ގޮތުން އިސްލާމްދީނުގައި އެކަން އޮތްގޮތްކަމަށްބުނެ ދީނީ އިލްމުވެރިޔާ ޑރ. މުޙައްމަދު އިޔާޒު ދައްކަވާފައިވާ ވާހަކަތަކަކަށް ނުރުހުންފާޅުކުރަމުން ގެންދާ ދަނޑިވަޅެއްގައެވެ.
އިޔާޒް ވިދާޅުވީ އިލްމީ ހަގީގަތެއް ބަޔާންކޮށްދިނުމުގެ ސަބަބުން، އެބޭފުޅާއާއިމެދު ނަފްރަތު އުފައްދައި ރާއްޖޭގެ ރައްޔިތުންގެ މަޖިލީހަށް މައްސަލަވައްދައި އިލްމީ މުއައްސަސާއެއްކަމަށް ބުނެވޭ މުއައްސަސާއަކުން ވަޒީފާގެ ބިރުދައްކައި، އެމަނިކުފާނާ ދެކޮޅަށް ދޮގު ބުހުތާނު ހަދައި، ކާޓޫނުކުރަހާ، އަބުރަށް އަރައިގަނެ، މި ހުރިހައި ކަމެއް ވެގެންދާއިރު ދިވެހިރާއްޖޭގެ ދީނީ އިލްމުވެރިން ހަނުތިއްބަވައި، ލާދީނީ މީހުން އެމީހުން ބޭނުންހާގޮތަކަށް ދީނީ އިލްމުވެރިންގެ އަގުވައްޓާލަމުން ދާދިއުން ކުއްވެރި ކުރައްވާ ކަމަށެވެ.
އަންހެނުން ޚިތާނު ކުރުމުގެ މަޢުލޫގައި ދެއްކެވި ވާހަކައެއްގެ ސަބަބުން، އިސްލާމްދީނަކީ އަންހެނުންގެ ހައްގުތަކަށް އަރައިގަންނަ، ނުވަތަ އަނިޔާވެރިވުމަށް ގޮވާލާ ދީނެއްކަމުގެ ރަނގަޅު ނޫން ތަސައްވުރެއް ބަޔަކަށް ލިބިފައިވާނަމަ އެކަމަށް މާފަށް އެދި ވަޑައިގަންނަވާ ކަމަށްވެސް އިޔާޒް ވަނީ ވިދާޅުވެފަ އެވެ.
