ހުކުރު ދުވަހަކީ މި ފަހުގެ ތާރީހެއްގައި "މުޅިމާލެ" އިން ކަރަންޓު ކެނޑި، އަނބުރާ ޚިދުމަތް ނުލިބި އެންމެ ގިނައިރު ވީ ދުވަހެވެ.
ހެނދުނު 8 ޖެހި އިރު ކެނޑުނު ކަރަންޓު، ހުރިހާ މައްސަލައެއް ހައްލުކޮށް އަލުން އަނބުރާ އިޔާދަކޮށްދިން ކަން ސްޓެލްކޯގެ ޓްވިޓަރ އެކައުންޓުން އަންގާލަދިނީ މެންދުރު 1 އެއްގެ ފަހުންނެވެ. ބަރާބަރު 5 ގަޑިއިރު ކަރަންޓުގެ ޚިދުމަތް މާލޭން ކެނޑިފައި އޮތެވެ. ޓެކްނިކަލް މައްސަލައެކޭ ބުނުން ފިޔަވާ އިތުރު ތަފްސީލެއް ސްޓެލްކޯއަކުން ނުދެއެވެ. ފަހުން ބައެއް މީޑިއާ ތަކުން އެނގުނީ ދިމާވީ ވޯލްޓޭޖް މަތިވުމުގެ މައްސަލައެއް ކަމެވެ. ސްޓެލްކޯގައި ހުންނަނީ އެފަދަ ކަމެއް ދިމާވެއްޖެނަމަ އޮޓޯއިން ޝަޓްޑައުން ވާފަދަ ސިސްޓަމެއް ޤާއިމްކޮށްފައެވެ.
ބިދޭސީންވެސް ހިމަނައިގެން ރާއްޖޭގެ އާބާދީގެ 2 ލައްކައަށް ވުރެ ގިނަ މިހުން ދިރި އުޅެނީ މާލޭގައެވެ. އެއީ ގާތްގަނޑަކަށް އާބާދީގެ 40 އިންސައްތައެވެ. ޤައުމެއްގެ އާބާދީގެ 40 އިންސައްތަ މީހުން މިހާވަގުތު ކަރަންޓާނުލައި ހޭދަކުރަންޖެހުން މިއީ ގައިމުވެސް ކުޑަ ކަމެއްނޫނެވެ. ދެން ބުނަން އޮންނާނީ "މާލެ ވީމާ ބޮޑު ކަމަކަށް ވަނީ ނޫނީ ހަދަނީއޭ" މިހެންނެވެ. އަތޮޅުތެރޭގެ ރައްރަށުގައި ދެ ދުވަސް ތިން ދުވަސް ވަންދެން ކަރަންޓާ ނުލައި އުޅެންޖެހުން ވަކި ބޮޑުކަމަކަށް ނުވަނީކީއެއް ނޫނެވެ.
ބަވަނަ ވެފައިވާ މި ޒަމާނުގައި ކިތަންމެ ކުޑަ އާބާދީއެއް ކިތަންމެ ކުޑަވަގުތުކޮޅަކަށް ކަރަންޓާނުލައި އުޅެން ޖެހުނަސް އެއީ ވަރަށް ދަތި އުދަނގޫކަމެކެވެ. ނަމަވެސް މި ދައްކަނީ ރާއްޖޭގެ އަދުގެ ހާލަތު ހުރިގޮތުން ކުރިހާ ކަމެއްގެ "މައި މުގޫ" އޮތްތަނުގެ ވާހަކައެވެ. ރާއްޖޭގެ ހުރިހާ ރަށަކަށްވެސް ފޯރުކޮށްދޭން ޖެހޭ ޒަރޫރީ ޚިދުމަތްތަކުގެ ވެސް މައި މުގޫ އަދި އޮތީ މިތަނުގައެވެ. އަޅުގަނޑުމެން ހުރިހާކަމެއް ލާމަރުކަޒީ ކުރުމުގެ ވާހަކަވެސް މިދައްކަނީ މިފަދަ ކަންކަމުން ލިބޭ ދައްޗާއި ތުރާ ކުޑަކުރުމަށެވެ.
މިސާލަކަށް ބަލަނީ ނަމަ މުއާސަލާތު ކުރުމުގެ މައި މުގޫ، ޑާޓާ ސެންޓަރތައް، ސާވަރތައް، މުޅި ޤައުމަށް ޚިދުމަތްދޭ ގިނަ ކޯލް ސެންޓަރުތައް އަދި ހުރީ މިތަނުގައެވެ. މި ފަހަރުގެ މި ހާދިސާއަށްފަހު މުއާސަލާތީ ކުންފުނިތަކުން އާންމުންނަށް އަންގާލި އެންގުންތަކުން ވެސް މިކަންކަން ރަނގަޅަށް އެބަ އެނގިގެންދެއެވެ. އުރީދޫއިން މާފާއި އެކު ބުނީ ކަރަންޓު ކެނޑުމުގެ ސަބަބުން އެކުންފުނީގެ ސުޕަނެޓް ޚިދުމަތަށް ބުރޫ އަރައިދާނެ ވާހަކައެވެ. ދިރާގުން ބުނީ ކަރަންޓުގެ ޚިދުމަތް ނުލިބި ގިނައިރު ވާނަމަ ޚިދުމަތަށް ބުރޫއަރައި ދާނެކަމަށެވެ. މީގެ އިތުރުން އެޗްޕީއޭއިން ބުނީ ކޯވިޑް-19ގެ ހޮޓްލައިން ޚިދުމަތަށް ބުރޫއެރި ވާހަކައެވެ. ބޭންކުގެ އިންޓަރނެޓް ބޭންކިންގ އާއި އޭޓީއެމް ޚިދުމަތްތައްވެސް ހަމަ މިކަހަލަ ގޮތަކަށެވެ. އާސަންދަގެ ޚިދުމަތައްވެސް ކޮންމެވެސް ވަރެއްގެ ދަތި ތަކެއް އައެވެ.
މި ފަދަ ގިނަ ޚިދުމަތްތަކުގެ މައި މަރުކަޒުތައް، ޑާޓާ ސެންޓަރުތައް، ސާވަރ ތައް ހުރީ އަދިވެސް މާލޭގައި ކަމަށް ވަތީ މިކަން ވާނީވެސް ހަމަ މިހެން ތާއެވެ. މިފަދަ ތަންތަން ރާއްޖޭގެ އެކި ކަންކޮޅުތަކަށް ފަތުރާލުން މިއީ އަޅުގަނޑުގެ ޚިޔާލުގައި މިކަމަށް ލިބޭނެ އެންމެ ރަނގަޅުއެއް ހައްލެވެ. ލާމަރުކަޒު ކުރަންވީއެވެ.
އަދުގެ ސަރުކާރުން ނޭޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީ (އެންސީއައިޓީ) ގެ ޑާޓާ ސެންޓަރު ޔޫޕީއެސް ޕަވަރ ސިސްޓަމް ވަރުގަދަކޮށް ޖަނަރޭޓަރު ތަކުގެ ފެންވަރު ރަނގަޅުކޮށްފައި ވާތީ އީ-ގަވަރމެންޓް ޚިދުމަތްތައް މި ހާދިސާއާއި ގުޅިގެން ނުހުއްޓުން އެއީވެސް ހަމަ ނަސީބެވެ. އެހެން ނޫންނަމަ ބޯޑަރ ކޮންޓްރޯލް ނިޒާމާއި، އެކްސްޕެޓް އަދި ވިހާ މަރުވާ ބަލަހައްޓާ ސިސްޓަމްގެ ޚިދުމަތް ހުއްޓުނީހެވެ.
މިހާހިސާބުން ދެން އިވެންފަށާ އަނެއް ވާހަކަ އަކީ އެވެނި ސަރުކާރެއްގައި މިކަން ހައްލުކުރަން ޕްލޭން ތަކެއް، އަނެއް ސަރުކާރެއްގައި މިކަން ހައްލުކުރަން ކުރެހުންތަކެއް، ކުރެހި ވާހަކަ ތަކެކެވެ. އާދޭހެވެ. ރައީސް އަބްދުﷲ ޔާމިންގެ ދައުރުގައި ފެށި ފިފްތު ޕަވަރ ޕްރޮޖެކްޓްވެސް، ރައީސް މުޙައްމަދު ނަޝީދުގެ ދައުރުގައި އިއުލާންކުރި މުޅި މާލެ ސަރަހައްދު ގުޅުވާލައި އިޔާދަކުރަނިވި ހަކަތައިން ކަރަންޓު ފޯރުކޮށްދޭ ޕްރޮޖެކްޓަކީވެސް ހަމަ ކަރަންޓުގެ މައްސަލައަށް ހައްލު ލިބޭނެ ފަދަ ބިޔަ ބޮޑެތި ޕްރޮޖެކްޓެވެ. އެހެން ނަމަވެސް ވިސްނަންވީ އެއްކަމަކީ މިފަދަ ބިޔަ ބޮޑެތި ޕްރޮޖެކްޓާއި އެކުވެސް ޓެކްނިކަލީ ދިމާވާ މިފަދަ ކަންކަމުން ރައްޔިތުންނަށް އޭގެ ދުނދަގުލާއި ތުރާ އެންމެ ކުޑަވާނެ ގޮތްތަކެއް ހޯދުމެވެ. މީގެ އިތުރުން އެއްތަނަކަށް ދިމާވާ ހާދިސާއެއްގެ ސަބަބުން ގައުމުގެ ހުރިހާ ރައްޔިތުންނަށް އޭގެ ތަކުލީފު ނާންނާނެ ފަދަ ގޮތަކަށް މިފަދަ ކަންކަން ލާމަރުކަޒު ކުރުންވެސް އެއީ ހަމަ ކުރެވިދާނެ ކަމެކެވެ.
