އާމްދަނީގެ ހަމަހަމަ ކަމާއި ގުޅޭގޮތުން ދެބަސްވުންތަކަކީ ބޮލީވުޑްގައި އާންމުކަމެކެވެ. ބައެއް އަންހެން ފަންނާނުން ބުނާގޮތުގައި އެމީހުންނަށް ދޭ އުޖޫރަ ފިރިހެން ފަންނާނުން ނަށްވުރެ މާކުޑަ އެވެ. ހަމަ މިފަދައިން ބުނާ ފިރިހެން ފަންނާނުންވެސް އުޅެއެވެ. ހަމަހަމަ އުޖޫރައެއް ދިނުމުގައި އަބަދުވެސް ބޮލީވުޑް ނުކުޅެދިފައި އޮންނަކަމަށް ތަރިން ގަބޫލު ކުރެއެވެ.
ބޮލީވުޑްގައި ގިނަ ދުވަސްތަކެއް ހޭދަކޮށްފައިވާ އަބީޝެކް ބައްޗަން ވަނީ މިފަދަ ވާހަކައެއް 2018 ވަނަ އަހަރު ކިޔައިދީފަ އެވެ. އޭނާ ބުނެފައިވާ ގޮތުގައި އައިޝްވަރިޔާ ރާއީ އާއި އޭނަ އެކުގައި ކުޅެފައިވަނީ 9 ފިލްމެއެވެ. ނަމަވެސް މި ނުވަ ފިލްމުގެ ތެރެއިން 8 ފިލްމަށް އެންމެ ބޮޑު އުޖޫރައެއް ދިނީ އައިޝްވަރިޔާ އަށްކަމަށް އޭނާ ބުނެއެވެ.
އަބީޝޭކް ބުނާގޮތުގައި ބޮލީވުޑަކީ ބިޒްނަސް އެކެވެ. ގިނައިން ފިލްމު ވިއްކޭ އެކްޓަރެއްގެ އުޖޫރު އިތުރުވަމުން ދާކަމަށް އޭނާ ބުނެއެވެ. އެއީ ފިލްމު ހިނގާ މިންވަރު ކަމަށް ގަބޫލު ކުރެވެއެވެ. އަދި އިންޑަސްޓްރީއާއި އަލަށް ގުޅޭ އެކްޓަރަކަށް ސުޕަސްޓާރަކަށް ލިބޭ އުޖޫރު ނުލިބޭނެ ކަމަށް ގަބޫލުކުރާ ކަމަށްވެސް އަބީޝެކް ބުނެއެވެ.
View this post on Instagram
އައިޝްވަރިޔާ ފިލްމް އިންޑަސްޓްރީ އަށް ނުކުމެފައިވަނީ 1997 ވަނަ އަހަރުގެ ޓަމިލް ފިލްމް "އިރްވަރް" އިންނެވެ. އަދި އަބީޝެކް ފިލްމީ ދާއިރާ އަށް ނުކުމެފައިވަނީ އޭގެ ތިން އަހަރު ފަހުން ޖޭޕީ ދަތުގެ "ރެފިއުޖީ" އިންނެވެ.
މިދެ ތަރިން ކައިވެނި ކޮށްފައިވަނީ 2007 ވަނަ އަހަރު އެއެވެ. އަދި މި ކައިވެންޏަށް ވަނީ 2011 ވަނަ އަހަރު އަންހެން ކުއްޖަކު ލިބިފައެވެ.
