އިންޑިއާގެ ފިލްމީ ދާއިރާގައި ގާތްގަނޑަކަށް ފަންސާސް އަހަރު ވަންދެން ޚިދުމަތްކުރި، ބޮލީވުޑްގެ މަޝްހޫރު އެކްޓަރު ނާނާ ޕާޓެކަރު މަރުވެއްޖެއެވެ. މަރުވިއިރު އޭނާގެ އުމުރަކީ 75 އަހަރެވެ.
މަނިޕާލް ހޮސްޕިޓަލްގެ އޮންކޮލޮޖީ ޑިޕާޓްމަންޓްގެ ޗީފް، ޑރ. ޝެކަރް ސަލްކަރު ބުނީ ނާނާ ޕާޓެކަރު ހޮސްޕިޓަލަށް ގެނައީ ފަތިހު 4:20 ހާއިރު ކަމަށެވެ. އެވަގުތު އޭނާގެ ހޭވެރިކަމެއް ނެތްކަމަށް ޑރ. ސަލްކަރު ބުންޏެވެ. ޑޮކްޓަރުން އޭނާއަށް ސީޕީއާރު ދީ، އޭނާ ދިރުވުމަށް މަސައްކަތްކުރިއެވެ. ނަމަވެސް އެ މަސައްކަތް ކާމިޔާބު ނުވެ، ފަތިހު 5:20 ގައި އޭނާ މަރުވެފައިވާކަން ހާމަކުރިއެވެ. މަރުވި ސަބަބެއް އަދި ރަސްމީކޮށް ހާމައެއް ނުކުރެއެވެ.
ނާނާ ޕާޓެކަރުގެ އަސްލު ނަމަކީ ވިޝްވަނާތު ޕާޓެކަރެވެ. އޭނާ އުފަންވީ 1951 ވަނަ އަހަރުގެ ޖަނަވަރީ 1 ގައި، މަހާރާޝްޓްރާގެ މުރުޑް-ޖަންޖީރާގައެވެ. އޭނާ ފިލްމީ ދާއިރާއަށް ނިކުތީ 1978 ވަނަ އަހަރު "ގަމަން" ފިލްމުންނެވެ. ފަހުން ހިންދީ އަދި މަރާޓީ ފިލްމުތަކުގައި ގިނަ ބައިވަރު ރޯލުތައް ކުޅެ ފިލްމީ ދާއިރާގެ ބޮޑު ނަމަކަށް ވެވަޑައިގަތެވެ.
"ޕަރިންދާ"، "ކްރާންތިވީރު"، "ވެލްކަމް"، އަދި "ރާޖްނީތި" ފަދަ ފިލްމުތަކުން އޭނާ ވަރަށް މަޝްހޫރުވިއެވެ. ނޭޝަނަލް ފިލްމް އެވޯޑް ވެސް އޭނާއަށް ތިން ފަހަރު ލިބިފައިވެއެވެ. ފިލްމްފެއާ އެވޯޑުގެ ބެސްޓް އެކްޓަރު، ބެސްޓް ސަޕޯޓިންގ އެކްޓަރު، އަދި ބެސްޓް ވިލަން، މި ތިން ކެޓަގަރީން ވެސް އެވޯޑް ހޯދި ހަމައެކަނި އެކްޓަރަކީ އޭނާއެވެ. 2013 ވަނަ އަހަރު، އިންޑިއާގެ ސަރުކާރުން އޭނާއަށް ޕަދްމާ ޝްރީ އެވޯޑު ދީފައި ވެއެވެ.
ފިލްމީ ދާއިރާއިން ބޭރުގައި ވެސް ނާނާ ޕާޓެކަރު ގިނަ ޚިދުމަތްތައް ކުރެއްވިއެވެ. 1999 ވަނަ އަހަރުގެ ކާގިލް ހަނގުރާމައިގައި އިންޑިއާގެ ޓެރިޓޯރިއަލް އާމީގެ ފަރާތުން އޭނާ ޚިދުމަތްކުރެއްވިއެވެ. އަދި "ނާމް ފައުންޑޭޝަން" މެދުވެރިކޮށް، މަހާރާޝްޓްރާގެ ދަނޑުވެރިންނަށް އެހީތެރިވުމުގެ މަސައްކަތްތައް ވެސް ކުރެއްވިއެވެ. އޭނާގެ ސާދާ ދިރިއުޅުމުގެ ސަބަބުން ވެސް އޭނާ ވަރަށް ގިނަ މީހުންގެ ލޯބި ހޯދިއެވެ.
ނާނާ ޕާޓެކަރުގެ އެންމެ ފަހުގެ ފިލްމުތަކުގެ ތެރޭގައި، 2026 ވަނަ އަހަރު ރިލީޒްވި "ސޫބޭދާރު" ހިމެނެއެވެ.
ނާނާ ޕާޓެކަރު ނިޔާވިއިރު، އޭނާގެ އަނބިކަނބަލުން ނީލްކަންތީ ޕާޓެކަރާއި، ދަރިފުޅު މަލްހާރު ޕާޓެކަރު ދުނިޔޭގައި އެބަ ތިއްބެވެ.
ކޮމެންޓު ފޮނުވާ