ސްރީލަންކާގައި މަަރަށް ހުކުމް ކޮށްފައިވާ ސިޔާސީ މީހަކަށް މާފްދީ، ޖަލުން މިނިވަންކުރުމުން، ޔޫއެން ހިއުމަންރައިޓްސް ގުރޫޕުން، ސްރީލަންކާގެ ރައީސް ގޮޓަބަޔާ ރާޖަޕަކްސާއަށް ވަރަށް ބޮޑަށް ފާޑު ކިޔައިފިއެވެ.
ޔޫއެން ހިއުމަންރައިޓްސް ގުރޫޕުން ބުނެފައިވަނީ، ގޮޓަބަޔާގެ މި ނިންމުމަކީ، ގާނޫނީ ހަމަތަކާއި ޚިލާފަށް ނިންމާފައިވާ ނިންމުމެއް ކަމުގައެވެ.
ސްރީލަންކާގެ ގާނޫނުހަދާ މަޖިލިހުގެ ކުރީގެ މެމްބަރެއް ކަމުގައިވާ ޑުމިންޑަ ސިލްވާއަކީ، 2011ވަނަ އަހަރު، ސިޔާސީ ވާދަވެރިޔަކާއި އަދި އޭނާއަށް ތާޢީދުކުރާ އިތުރު 3 މީހެއްގެ ގަޔަށް ބަޑިޖަހާ މަރާލުމުގެ ކުށް ސާބިތުވެ، 2016 ވަނަ އަހަރު ސިރީލަކްނާގެ ކޯޓުން މަރަން ހުކުމް ކޮށްފައިވާ މީހެކެވެ. އޭނާއާއެކު އިތުރު 4 މީހެއްގެ މައްޗަށްވެސް މަރުގެ ހުކުމް އިއްވާފައި ވެއެވެ.
ރައީސް ގޮޓަބަޔަ ރާޖަޕަކްސަގެ ގާތް އެކުވެރިއެއް ކަމުގައިވާ ސިލްވާއަކީ، ސްރީލަންކާގެ ރައީސް ރިޔާސީ މާފް ދެއްވާފައިވާ 94 ކުށްވެރިންގެ ތެރޭގައި ހިމެނޭ މީހެކެވެ.
ރައީސް ގޮޓަބަޔަގެ މި ނިންމެވުމުގެ ސަބަބުން، އިންސާނީ ހައްގުތަކަށް ގޮވާލާ ފަރާތްތަކުން ވަނީ ވަރަށް ބޮޑަށް ނުރުހުން ފާޅު ކޮށްފައެވެ.
"މިފެންނަނީ، ވެރިކަމުގެ ބާރުގެ ފަރާތުން، ގާނޫނީ ވެރިކަމަށް، ގާނީ އުސޫލުތަކަށް، އަދި އާންމު ރައްޔިތުންނަށް ޖަވާބުދާރީ ވުމަށް، އިހުތިރާމް ނުކުރާކަމުގެ ސާފު ހެކި،" ކޮލޮމްބޯގައި ހުންނަ އިންސާނީ ހައްގުތަކާބެހޭ ގާނޫނީ ވަކީލެއްކަމުގައިވާ އަމްބިކާ ސަތުނަނަތަން ވިދާޅުވެފައި ވެއެވެ.
2019ވަނަ އަހަރުގެ ނޮވެމްބަރު މަހު، ގޮޓަބަޔަ ރާޖަޕަކްސާ ސްރީލަންކާގެ ވެރިކަމަށް ވަޑައިގެންނެވީ، ސިންހަލަ ވަތަނީ ކެމްޕޭނެއް ކުރައްވައިގެންނެވެ. އަދި އޭނާއަކީ، އޭނާގެ ބޭބެ މަހިންދަ ރާޖަޕަކްސާގެ ވެރިކަމުގައި، 2005 އިން 2015އަށް އެގައުމުގެ ބާރުގަދަ ޑިފެންސް ސެކެޓްރީގެ މަގާމުގައި ހުންނެވި ބޭފުޅާވެސްމެއެވެ.
ރިޔާސީ މާފް ދެއްވައިގެން ޖަލުން މިނިވަންވި ކުށްވެރިންގެ ތެރޭގައި، ސްރީލަންކާގައި ވަކިވެގަތުމަށް ހަގުރާމަ ކުރި، ޓެމިލް ޓައިގަރުންނާއި ގުޅުންހުރި، ބައިމަދު ތަމަޅައިންނަށް ނިސްބަތްވާ 16 ކުށްވެރިއަކުވެސް ހިމެނެއެވެ.
ވަކިވެގަތުމަށް ހަގުރާމަކުރި ތަމަޅަ ޓައިގަރުންގެ ޖަމާއަތްވަނީ، 2009 ވަނަ އަހަރު، އަހުލީ ހަގުރާމަ ނިމުމަކަށް އައިތަނުން އެއްކޮށް އުވިގެން ގޮސްފައެވެ. އަދި މި ޖަމާއަތާ ގުޅުންހުރި ބައެއް މީހުންވަނީ، ސްރީލަންކާގައި ފާސްކޮށްފައިވާ، އަދި ޚިޔާލު ތަފާތުވުން ބޮޑުވި، "ޕްރިވެންޝަން އޮފް ޓެރަރިޒަމް އެކްޓް" (PTA)ގެ ދަށުން އެތައް އަހަރެއް ވަންދެން ހައްޔަރު ކޮށްފައި ބޭތިއްބިފައެވެ.
ރައީސް ގޮޓަބަޔަ ވަނީ، ވެރިކަމަށް ވަޑައިގެންނެވުމަށްފަހު، މަރަށް ހުކުމް ކޮށްފައިވާ ކުށްވެރިންނަށް މީގެން ކުރިންވެސް މާފްދީފައެވެ.
2020 ވަނަ އަހަރުގެ މާރޗްމަހު، ވެރިކަމަށް ވަޑައިގެންނެވުމަށްފަހު، ގޮޓަބަޔަ ރާޖަޕަކްސަވަނީ، ތަމަޅައިންގެ 8 މީހަކު މަރާލި ކަމުގެ ކުށް ސާބިތުވެ، މަރަށް ހުކުމް ކޮށްފައިވާ ސިފައިންގެ މީހެއްކަމުގައިވާ ސުނިލް ރަޓްނަޔަކެއަށްވެސް މާފްދީފަފައެވެ. ސުނިލް ރަޓްނަޔަކެ މަރާފައިވާ ތަމަޅައިންގެ ތެރޭގައި، 5 އަހަރުގެ ކުޑަކުއްޖަކާ އަދި 20 އަހަރު ނުފުރޭ އިތުރު 2 ކުދިންވެސް ހިމެނެއެވެ. ގޮޓަބަޔ އޭނާއަށް މާފް ދިނުމާއި ގުޅިގެން ޔޫއެންއިން ބުނެފައިވަނީ، އެއީ، އޭނާ މަރާލި މީހުންގެ އާއިލާތަކަށް ދިން އަނިޔާއެއް ކަމުގައެވެ.
