ޖަޕާނުގައި ހުންނަ ދިވެހި އެމްބަސީން އިސްނަގައިގެން، ޖަޕާނުގެ މާރކެޓަށް ޚާއްސަކޮށް، ރާއްޖޭގެ ފަތުރުވެރިކަމުގެ މިހާރުގެ ހާލަތާއި އަދި، ކޯވިޑަށްފަހު ރާއްޖޭގެ އިގްތިސާދު އަލުން ކޮޅަށް ޖެހުމަށް ފަތުރުވެރިކަމުގެ ދާއިރާގައި ކުރެވެމުންދާ މަސައްކަތްތައް އަންގާދިނުމަށް ޚާއްސަ ވެބިނަރއެއް ބާއްވައިފިއެވެ.

މައުލޫމާތު ލިބިފައިވާ ގޮތުގައި މި ވެބިނަރ ޙާއްސަކޮށްފައިވަނީ، ޖަޕާނުން ރާއްޖެއަށް އެންމެ ގިނަ އަދަދަކަށް ފަތުރުވެރިން ފޮނުވާ ބޮޑެތި ޓްރަވެލް އޭޖެންސީތަކާއި އަދި ޓުއަރ އޮޕަރޭޓަރުންނަށް ޚާއްސަކޮށްގެންވެ. ރައްޖޭގެ ފަރާތުން މި ވެބިނާގައި ބައިވެރި ވެފައިވަނީ، ޓުއަރިޒމް މިނިސްޓްރީއާއި، އެމްއެމްޕީއާރުސީގެ އިތުރުން ގެސްޓްހައުސް އެސޯޝިއޭޝަން އޮފް މޯލްޑިވްސްގެ ފަރާތުންނެވެ.

ކޯވިޑް19ގެ ކާރިސާގެ ތެރޭގައިވެސް ފަތުރުވެރިން ރާއްޖެއަށް ޒިޔާރަތްކުރުމުގެ ފުރުސަތު ފަހި ކުރުމުގެ ގޮތުން އަޅާފައިވާ ފިޔަވަޅުތަކުގެ އިތުރުން، ކޮވިޑުން އަރައިގަނެވުމަށް ފަހުވެސް ރާއްޖޭގެ ފަތުރުވެރިކަމުގެ ސިނާއަތު އިތުރަށް ކުރިޔަށް ގެންދިއުމަށްޓަކާ އަޅަމުންދާ ފިޔަވަޅުތަކުގެ މައުލޫމާތު މިވެބިނަރގައި ޖަޕާނުގެ ޓްރަވެލް އޭޖެންސީތަކާއި އަދި ޓުއަރ އޮޕަރޭޓަރުންނަށް ފޯރުކޮށްދެވިފައި ވެއެވެ. އަދި މީގެއިތުރުން ޓްރަވެލް އޭޖެންސީތަކާއި އަދި ޓުއަރ އޮޕަރޭޓަރުންގެ ފަރާތުން ސާފުކުރުމަށް ބޭނުންވާ މައުލޫމާތު ސާފުކޮށް ދިނުމުގެ ގޮތުން، ސުއާލާއި ޖަބާވު ސެޝަނެއްވެސް މިވެބިނާގައި ކުރިޔަށް ގެންގޮސްފައި ވެއެވެ.

ޖަޕާނުގައި ހުންނަ ދިވެހި އެމްބަސީން އިންތިޒާމްކުރި މި ވެބިނާއަރއަކީ، ކޯވިޑް19ގެ ސަބަބުން ރާއްޖޭގެ އިގްތިސާދަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ދިވެހި ސަރުކާރުން ކުރިޔަށް ގެންދާ އިކޮނޮމިން ރިކަވަރީ ޕްރޮގްރާމަށް އެހީތެރި ވެދިނުމުގެ ގޮތުން، ރާއްޖެއިން ބޭރުގައި ހުންނަ މިޝަންތައް މެދުވެރިކޮށް ފޮރިންގ މިނިސްޓްރީން ކުރިޔަށް ގެންދާ ޕްރޮގްރާމްތަކުގެ ތެރެއިން ކުރިޔަށް ގެންދެވުނު ވެބިނަރ އެކެވެ.

މި ވެބިނަރގައި، ފޮރިންގް މިނިސްޓްރީގެ އިސް އޮފިޝަލުންގެ އިތުރުން ރާއްޖެއިން ބޭރުގައި ހުންނަށް މިޝަންތަކުގެ ބައެއް އިސްވެރިންވެސް ބައިވެރި ވެވަޑައިގަތެވެ. މިއީ ޖަޕާނުގައި ހުންނަ ދިވެހި އެމްބަސީން އިސްނަގައިގެން މިއަހަރު ބޭއްވި މިފަދަ ދެވަނަ ވެބިނަރއެވެ.