މިހިގާ މޭމަހުގެ 31ގެ ނިޔަލަށް ޖަޕާނުގައި އިއުލާން ކޮށްފައި އޮތް ސިއްހީ ކުއްލި ނުރައްކަލުގެ ހާލަތު އަންނަ ޖޫންމަހުގެ 20 ވަނަ ދުވަހާ ހަމަޔަށް ދެމެހެއްޓުމަށް އެގައުމުގެ ބޮޑުވަޒީރު ޔޮޝިހީޑޭ ސުގާ ނިންމަވައިފިއެވެ.
ސްޓޭޓު އޮފް އެމަޖެންސީ އިިތުރު މުއްދަތަކަށް ދެމެހެއްޓުމަށް ޖަޕާނުގެ ބޮޑުވަޒީރު ސުގާ ނިންމަވާފައި މިވަނީ، މިހާރުވެސް އެއްމަހަށްވުރެ ދިގުލައިގެން ގޮސްފައިވާ މިހާރުގެ ސްޓޭޓް އޮފް އެމަޖެންސީ ޖަޕާނުގެ 9 ޕްރީފެކްޗަރއެއްގައި މޭމަހުގެ 31 ވަނަ ދުވަހު ނިމޭގޮތަށް ހަމަޖެހިފައި ވަނިކޮށެވެ. އަދި ޖަޕާން ސަރުކާރުގެ މިނިންމުން ހާމަ ކުރެއްވިއިރު، ޖަޕާނުގައި ބޭއްވުމަށް ހަމަޖެހިފައިވާ އޮލިމްޕިކްސް ކުޅިވާރު މުބާރާތް ފެށުމަށް މިހާރުވަނީ މަދު ހަފްތާތަކަކަށް ވެފައެވެ.
މިގޮތުން މިހާރުވެސް އަމަލުކުރެވެމުންދާ ސްޓޭޓް އޮފް އެމަރޖެންސީ، ދެމެހެއްޓުމަށް ނިންމާފައިވާ ސިޓީ ތަކަކީ، ވެރިރަށް ޓޯކިއޯގެ އިތުރުން އޮސާކާ، ކިޔޯޓޯ، ހިޔޯގޯ، އައިޗީ، ފުކޯކާ، އޮކިޔާމާގެ އިތުރުން ހިރާމާ ޕްރީފެކްޗަރގައެވެ.
ސުގާ ހާމަ ކުރައްވާފައިވާ ގޮތުގައި، ވެރިރަށް ޓޯކިއޯ އަދި އޮސާކާގައި ޕޮޒިޓިވް ވަމުންދާ މީހުންގެ އަދަދު ކުރިޔަށްވުރެ ދަށްވެފައިވި ނަމަވެސް، ކޯވިޑަށް ޕޮޒިޓިވްވެ ފަރުވާ ދެމުންދާ ނިސްބަތް އަދިވެސް ހުރީ މަތީގައެވެ. އަދި އޮސާކާ ޕްރީފެންޗަރގައި ފަރުވާ ދޭންޖެހޭ މީހުންގެ އަދަދު އިތުރުވެ، އެދުތައް މިހާރުވެސް ވަނީ ފުރިބާރުވެފައެވެ.
ކޯވިޑް19 މުޅި ދުނިޔޭގައި ފެތުރެންފެށިފަހުން، މިއީ ޖަޕާނުގައި ސިއްހީ ކުއްލި ނުރައްކަލުގެ ހާލަތު ގޯސްވެ، ސްޓޭޓު އޮފް އެމަޖެންސީ އިއުލާން ކުރިތާ 3 ވަނަ ފަހަރެވެ.
ޖަޕާންގައި މިހާތަނަށް 733,887 މީހުން ކޯވިޑަށް ޕޮޒިޓިވް ވެފައިވާއިރު، 12,714 މީހަކުވަނީ މި ބަލީގައި ދުނިޔެ ދޫކޮށްފައެވެ.
