މުޖުތަމަޢުގެ ތެރޭގައި ކޯވިޑް-19 ފެތުރި އެބަލިން ރަނގަޅުވެފައިވަނީ ކިހާ ޢަދަދެއްގެ މީހުންތޯ ދެނެގަތުމަށްޓަކައި ހަދަން ފަށާފައިވާ އެންޓިބޮޑީ ޓެސްޓުގެ ދެވަނަބުރު ފެށުމަށް ތައްޔާރުވަމުންދާކަމަށް ހެލްތު އިމަރޖެންސީ އޮޕަރޭޝަން ސެންޓަރުން ވިދާޅުވެއްޖެއެވެ.
ހެލްތު ޕްރޮޓެކްޝަން އެޖެންސީ، އެޗް.ޕީ.އޭއާއި، ދިވެހިރާއްޖޭގެ ޤައުމީ ޔުނިވަރސިޓީ ގުޅިގެން ފަށާފައިވާ ސީރޯ ޕްރިވެލަންސް ސަރވޭއަކީ، ރާއްޖޭގައި ކޯވިޑް-19 އެންމެ ބޮޑަށް ފެތުރިފައިވާ ގްރޭޓަރ މާލެ ސަރަހައްދުގައި މި ބަލި ފެތުރިފައިވާ މިންވަރު ދެނެގަނެ، އިތުރަށް ފެތުރިގެންދާ ބާރުމިނާއި، ޕޮލިސީތަކަށް އިތުރަށް ގެންނަންޖެހޭ ބަދަލުތައް ދެނެގަތުމަށް ކުރިއަށްގެންދާ ސަރވޭއެކެވެ.
މި ސަރވޭގެ ފުރަތަމަ ބުރުގައި ސާމްޕަލް ނަގާފައިވަނީ 18 އަހަރުން ދަށުގެ ކުދިންގެ އެވެ. އެޗް.އީ.އޯ.ސީން ބޭއްވި ނޫސްވެރިންގެ ބައްދަލުވުމުގައި އެޗް.ޕީ.އޭގެ އެޕިޑަމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވީ، މި ސަރވޭގެ ފުރަތަމަ ބުރުގެ މަސައްކަތް މިހާރު ނިމިފައިވާކަމަށާއި، ދެވަނަ ބުރު ފެށުމަށް ތައްޔާރުވަމުންދާކަމަށެވެ.
މި ސަރވޭގެ ދެވަނަ ބުރު ޚާއްސަކޮށްފައިވަނީ އުމުރުން 18 އަހަރުން މަތީގެ މީހުންނަށެވެ. ޑރ. އަފްޒަލް ވިދާޅުވީ، ސަރވޭގެ ދެވަނަ ބުރު ކުރިއަށްގެންދިއުމަށް ނިންމާފައިވަނީ ރެންޑަމް ސާމްޕަލް ނެގުމަށް އެކި ފަރާތްތަކަށް އެސް.އެމް.އެސް ފޮނުވައިގެންކަމަށެވެ. މިގޮތަށް އެސް.އެމް.އެސް ފޮނުވާ ފަރާތްތަކުން ސަރވޭއަށް އެއްބާރުލުން ދެއްވުމަށް ޑރ. އަފްޒަލް ވަނީ އެދިވަޑައިގެންފައެވެ.
އެސް.އެމް.އެސް ލިބުމުން އެބޭފުޅަކު ސާމްޕަލް ނެގުމަށް ހަމަޖެހިފައިވާ ތަނަކަށް ވަޑައިގަންނަވާނީ. ވަޑައިގަންނަވަން ޖެހޭނީ ހަވީރު 4 އިން ރޭގަނޑު 7 ޖެހުމާއި ދެމެދު. ސާމްޕަލް ނެގުމަށް މާލޭގައި ނަމަ ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސަސް އަދި ފެކަލްޓީ އޮފް އެޑިއުކޭޝަނަށް ދެވޭނެ. ހުޅުމާލޭގައި ޖެމްސް ޕްރީސްކޫލަށް އަދި ވިލިމާލޭގައި ނަމަ ވިލިމާލޭ ހޮސްޕިޓަލަށް ދެވޭނެ
– ޑރ. އަފްޒަލް
ސީރޯ ޕްރިވެލަންސް ސަރވޭގެ ފުރަތަމަ ބުރު ފަށާފައިވަނީ 15 އޮކްޓޫބަރ ގައެވެ. މި ސަރވޭ ކުރިއަށް ގެންދިއުމަށް ހަމަޖެހިފައިވަނީ 4 މަރުހަލާއަކަށް ބަހާލައިގެންކަމަށް އެޗްޕީއޭއިން ވަނީ ވިދާޅުވެފައެވެ. އެގޮތުން ސަރވޭގެ ފުރަތަމަ ބުރުގައި 18 އަހަރުން ދަށުގެ ކުދިންގެ ސާމްޕަލް ނަގާފައިވާއިރު އެ މަސައްކަތް ކުރިއަށްގެންގޮސްފައިވަނީ އެޑިއުކޭޝަން މިނިސްޓްރީގެ އެހީތެރިކަމާއެކުއެވެ. މި ސަރވޭގެ މަސައްކަތް 4 ހަފްތާގެ ތެރޭގައި އެއްކޮށް ނިންމާލެވޭނެކަމަށް އެޗް.އީ.އޯ.ސީން ވަނީ ވިދާޅުވެފައެވެ.
