އެމެރިކާގެ ރައީސް ޖޯ ބައިޑްންގެ ސަރުކާރުން އިސްރާއީލަށް 735 މިލިއަން ޑޮލަރުގެ އަގުހުރި، އަމާޒާށް ވާސިލްވުމުގެ ގާބިލްކަން ހުރި ޒަމާނީ ހަތިޔާރު ވިއްކުމުގެ ހުއްދަ ދީފައިވާ ކަމަށް، ވޮޝިންގޓަން ޕޯސްޓުން ރިޕޯޓު ކޮށްފިއެވެ.
އެމެރިކާގެ ކޮންގްރެސްގެ ސީނިއަރ ބައެއް މެމްބަރުން ބައެއް މީޑިއާތަކަށް ޔަގީން ކޮށްދީފައިވާ ގޮތުގައި، މިހާރު ފަލަސްތީނުގައި ހަމާސް ޖަމާއަތާއި އިސްރާއީލުގެ ސަރުކާރާ ދެމެދު ހިގަމުންދާ ހަމަނުޖެހުންތައް ފެށުމުގެ ހަފްތާއެއް ކުރިން، މޭމަހުގެ ކުރީކޮޅު ބައިޑްންގެ ސަރުކާރުންވަނީ، މި ހަތިޔާރުގެ މުޢާމަލާތުގެ މައުލޫމާތު ކޮންގްރެސްއާއި ހިއްސާ ކޮށްފައެވެ.
އެމެރިކާގެ ވޮޝިންޓަން ޕޯސްޓުން ރިޕޯޓު ކޮށްފައިވާ ގޮތުގައި، ބައިޑްންގެ ސަރުކާރުގެ މިނިންމުން އައިސްފައި މިވަނީ، މި ސަރުކާރުން އިސްރާއީލުގެ ބޮޑުވަޒީރު ނަތަންޔާހޫއާއި ބާއްވަމުން އަންނަ ގުޅުމާއި ގުޅޫގޮތުން ކޮންގްރެސްގެ ޑިމޮކްރަޓުންގެ މެދުގައި ކަންބޮޑުވުންތައް އުފެދިފައި ވަނިކޮށެވެ.
ވޮޝިންގޓަން ޕޯސްޓުން ރިޕޯޓު ކޮށްފައިވާ ގޮތުގައި، އެމެރިކާގެ ގާނޫނު ހަދާ މަޖިލީހުގެ ބައެއް މެމްބަރުންވަނީ، އިސްރާއީލާއެކީ، ހަތިޔާރުގެ ވިޔަފާރި ކުރުމަށް ބައިޑްންގެ ސަރުކާރުން ނިންމާފައިވާ މިވަގުތާއި ގުޅޭގޮތުން ސަރުކާ ސުވާލުތަކެއް ކުރިމަތި ކުރުވާފައެވެ. އަދި ބައެއް މެމްބަރުން ދެކެވަޑައިގަންނަވާ ގޮތުގައި، މި ދަޑިވަޅުގައި މިފަދަ ވިޔަފާރިއެއްގެ ނާޖާއިޒު ފައިދާ ވަކި ފަރާތަކުން ނެގުމުގެ ފުރުސަތު ބޮޑު ވެދާނެއެވެ.
އެމެރިކާގެ ގާނޫނު ހަދާ މަޖިލީހުގެ މެމްބަރަކު ނަން ހާމަ ނުކުރުމަށް ޝަރުތުކޮށް، ވޮޝިންގޓަން ޕޯސްޓަށް މައުލޫމާތު ދީފައިވާ ގޮތުގައި، އިސްރާއީލުން ފަލަސްތީނަށް ދެމުންދާ އުދުވާނީ ހަމަލާ ހުއްޓުވުމަށް އެގައުމަށް އެއްވެސް ޕްރެޝަރއެއް ކުރިމަތި ކުރުވުމެއް ނެތި، މި ވިޔަފާރީގެ ހުއްދަ ބައިޑްންގެ ސަރުކާރުން ދޭން ނިންމާފައިވާ ނިންމުމުގެ ސަބަބުން، މެދުއިރުމަތީގައި އުފެދިފައިވާ ނުތަނަވަސްކަން އިތުރަށް ގޯސްވެގެން ދާނެކަމަށް، އެމެރިކާގެ ގާނޫނު ހަދާ މަޖިލީހުގެ ބައެއް މެމްބަރުން ދެކެވަޑައިގަންނަވައެވެ.
ހަމާސްގެ ބާރުގެ ދަށުގައި އޮންނަ ގާޒާގެ ހެލްތު މިނިސްޓްރީން މައުލޫމާތު ދީފައިވާގޮތުގައި، އިސްރާއީލުން ގާޒާއަށް ދެމުންދާ ހަމަލާތަކުގައި މިހާތަނަށް ފަލަސްތީނުގެ 200 މީހަކު ޝަހީދުވެފައިވާއިރު، 1000 މީހުންނަށްވަނީ މި ހަމަލާތަކުގައި އަނިޔާ ވެފައެވެ.
އެމެރިކާއިން ކުރާ ހަތިޔާރުގެ ވިޔަފާރިފަދަ، ސަރުކާރުގެ މުހިންމު ނިންމުންތައް ކޮންގްރެސްއަށް ރަސްމީކޮށް ހުށަހެޅުމަށްފަހު، އެ ހުށަހެޅުމަކާމެދު ގޮތެއް ނިންމުމަށް ކޮންގްރެސްއަށް 20 ދުވަސް ލިބިގެންދާނެއެވެ. އަދި މި މިމުއްދަތުގައި، މެމްބަރުން މި ހަތިޔާރުގެ ވިޔަފާރިއާއި ދެކޮޅު ހެދިނަމަވެސް، އެއީ އެމައްޗަށް އަމަލުކުރުން ސަރުކާރަށް ލާޒިމްވެގެންދާ ކަމެއް ނޫނެވެ.
