އިސްރާއީލާ ފަލަސްތީނުގެ ހަމާސް ޖަމާއަތާ ދެމެދު އުފެދިފައިވާ ހަމަނުޖެހުންތައް ހުއްޓުމެއް ނެތި ކުރިޔަށް ދާއިރު، ފާއިތުވި އަހަރު، އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި، އިސްރޢަީލާއެކު ގުޅުން ބަދަހިކޮށް ސުލްހަ ވުމަށް އަރަބި ބައެއް ގައުމުތަކުން ވި އެއްބަސްވުންތަކަށް ފަލަސްތީނުގެ ޚާރިޖީ ވަޒީރު ރިޔާދު އަލް-މާލިކީ ވަރަށް ބޮޑަށް ފާޑު ވިދާޅު ވެއްޖެއެވެ.
"އިސްރާއީލުން ހިފާފައިވާ އަރަބި އަދި ފލަަސްތީނުގެ ބިންތައް މިނިވަން ނުވަނީސް، މި އިސްތިއުމާރީ ގައުމު، އިސްރާއީލާއެކީ ގުޅުން ބަދަހި ކުރުމަކީ، ނަސްލީ އިމްތިޔާޒުގެ ސިޔާސަތު ދަމަހައްޓަމުންދާ މިގައުމުން ހިންގަމުންދާ ލާއިންސާނީ ޖަރީމާތަކުގައި ބައިވެރިވުން،" އާދީއްތަ ދުވަހު ބޭއްވުނުން އޯގަނިޒޭޝަން އޮފް އިސްލާމިކް ކޯޕަރޭޝަންގެ ޚާރިޖީ ވަޒީރުންގެ އެމަޖެންސީ ބައްދަލުވުމުގައި ވާހަކަ ދައްކަވަމުން މާލިކީ ވިދާޅުވެފައި ވެއެވެ.
"މި އިސްތިއުމާރީ ބާރާ ޖެހޭނީ ކުރިމަތިލާ، ބަލިކޮށް، އަދި ނައްތާލަން. މި ގައުމާއެކު ގުޅުން ބަދަހި ކުރުމަށް ވެވުނު އެއްބަސްވުންތަކަކީ، އަރަބި ދުނިޔޭގެ އިހުސާސްތަކާ އެއްވެސް ގުޅުމެއް ހުރި އެއްބަސް ވުންތަކެއް ނޫން."
އިސްރާއީލާއި ހަމާސް ޖަމާއަތާ ދެމެދު ފާއިތުވެދިޔަ ހަފްތާގެ ހޯމަދުވަހުން ފެށިގެން ކުރިޔަށްދާ ހަމަނުޖެހުންތަކުގައި، މިހާތަނަށް ފަލަސްތީނުގެ 192 މީހަކު ވަނީ ޝަހީދު ވެފައެވެ. މީގެ ތެރޭގައި 58 ކުޑަކުދިންވެސް ހިމެނެއެވެ. އަދި 1200 މީހުންނަށްވަނީ އަނިޔާވެފައެވެ. އަދި މީގެ އިތުރުން، ހިފާފައިވާ ހުޅަނގު އައްސޭރީގެ ބިންތަކުގައި އިސްރާއީލުންވަނީ، ބަޑިޖަހާ ފަލަސްތީނުތެ 13 މީހަކު ޝަހީދު ކޮށްލާފައެވެ.
އިސްރޢީލުން ގާޒާއަށް ދެމުންދާ ހަމަލާތަކުގެ ރައްދުގައި، ހަމާސް ޖަމާއަތުންނާއި އަދި ފަލަސްތީނުގެ މިނިވަންކަމަށް ޖިހާދުކުރަމުންދާ އެހެނިހެން ޖަމާއަތްތަކުން އިސްރާއީލަށް ދީފައިވާ އެތައް ހާސް ރޮކެޓް ހަމަލާތަކެއްގައި އިސްރާއީލުގެ 10 މީހަކު ވަނީ މަރުވެފައެވެ. މީގެ ތެރޭގައި 2 ކުޑަ ކުއްޖަކުވެސް ހިމެނެއެވެ.
އިސްރާރީއާލާ ފަލަސްތީނާއި ދެމެދު ހަމަނުޖެހުން އިތުރުވެގެން ގޮސްފައިވާއިރު، އިސްރާއީލުގެ ސިޓީތަކުގައިވެސް ދަނީ އިސްރާއީލުގެ ރައްޔިތުންނާއި ފަލަސްތީނުގެ ރައްޔިތުންނާ ދެމެދު ހަމަނުޖެހުންތައް ހިގަމުންނެވެ.
އިސްރާއީލާއެކީ ފާއިތުވެދިޔަ އަހަރު ގުޅުން ބަދަހިކުރި ގައުމުތައް ކަމުގައިވާ ސޫދާން، މޮރޮކޯ، ޔުނައިޓެޑް އަރަބް އެމިރޭޓް އަދި ބަހުރެއިންއިން އިސްރާއީލާއެކީ ގުޅުން ބަދަހި ކޮށްފައިވަނީ، މި އެއްބަސްވުންތަކުގެ ނަތިޖާއެއްގެ ގޮތުން ފަލަސްތީނުގެ މިނިވަންކަމަށް ކުރަމުންދާ މަސައްކަތްތަކެއް ވަރަށް ބޮޑު އެހީތެރިކަމެއް ފޯރުކޮށްދޭނެ ކަމަށް ބުނެއެވެ. އެހެންނަމަވެސް، އިސްރާއީލުން ފަލަސްތީން ރައްޔިތުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގެ ސަބަބުން، މިގައުމުތަކުން އިސްރާއިލާއެކީ ވެފައިވާ މި އެއްބަސްވުންތައް ވެގެން ގޮސްފައިވަނީ، މި ގައުމުތަކުން ލަދުވެތިވާން ޖެހިފައިވާ މަސައްކަތަކަށް ކަމަށް މަސްރަހު ދިރާސާ ކުރާ ފަރާތްތަކުން ދަނީ ބުނަމުންނެވެ.
