އިންޑިއާގެ ބާރުގެ ދަށުގައި އޮންނަ ކަޝްމީރުގައި، ފަލަސްތީނަށް ކާމިޔާބު ލިބުމަށް އެދި ނަމާދު ކުރި، ކަޝްމީރުގެ މަޝްހޫރު ދީނީ އިލްމުވެރިއަކާއި، ފަލަސްތީނަށް ތާއީދުކޮށް ގްރެފިޓި މެސެޖްތައް ކުރަހަމުންދިޔަ އާޓިސްޓަކު ހިމެނޭގޮތުން 20 މީހަކު އިންޑިއާ ފުލުހުން ހައްޔަރު ކޮށްފިއެވެ.
އިންޑިއާއިން ކޮންޓްރޯލް ކުރާ ކަޝްމީރުގެ މައި އެއް ސިޓީ ކަމުގައިވާ، ސްރީނަގަރުގައި ދިރިއެޅެމުންދާ، އުމުރުން 32 އަހަރުގެ އާރޓިސްޓެއް ކަމަށްވާ މުދަސިރު ގުލްގެ އާއިލާއިން ބުނެފައިވަނީ، އިންޑިއާ ފުލުހުން އޭނާ ހައްޔަރު ކޮށްފައިވަނީ އޭނާއަށް ލިބިގެންވާ ޚިޔާލު ފާޅުކުރުމުގެ މިނިވަންކަން ހިފަހައްޓާ އޭނާގެ ކުރެހުންތައް ސެންސަރު ކުރުމުގެ މަގުސަދުގައި ކަމަށެވެ.
"ކީއްވެ އޭނާ ހައްޔަރު ކުރީ؟ އޭނާ ކުރީ ކީއް؟ ސަރުކާރުން ކުރެހުން ވަނީ މިތާގައި މަނާކޮށްފަތަ؟" މުދަސިރު ގުލްގެ ދައްތަ މުޒަމިލް ފިރުދައުސް މުވައްސަސާތަކަށް އިޝާރާތްކޮށް ބުނެފައި ވެއެވެ.
"އިސްރާއީލުގެ އަނިޔާވެރިކަމާ ދެކޮޅަށް މުޅި ދުނިޔެއިން އަޑު އުފުލަމުންދާއިރު، ކީއްވެ އަހަރެމެންނަށް އެވާހަކަ ނުދެއްކެންވީ؟ ކީއްވެ އަހަރެމެންނަށް ކުރެހުމުން އަހަރެމެންގެ ޝުޢޫރު ފާޅު ނުކުރެވެންވީ؟ ކޮން ކަހަލަ ޑިމޮކްރަސީއެއް މިއީ؟ ފަލަސްތީނުގެ ރައްޔިތުންނާ ދޭތެރޭ އަހަރެމެންގެ ހިތުގަ އޮތް ހަމްދަރުދީ ކީއްވެ އަހަރެމެންނަށް ފާޅު ނުކުރެވެންވީ؟" އަލްޖަޒީރާ ނޫހާއި ވާހަކަ ދައްކަމުން އޭނާގެ ދައްތަ ސުވާލު ކޮށްފައި ވެއެވެ.
My friend, the brilliant Kashmir artist Mudasir Gul has been charged under PSA (Public Safety Act) by Indian govt for drawing art work in support of Palestine.#freemudasirgul#freedomofspeech#indiahttps://t.co/mkx9YhkUy7 pic.twitter.com/jlqiSN2R2D
— Mir Suhail (@mirsuhail) May 15, 2021
މިހަފްތާގެ ހުކުރު ނަމާދަށްފަހު، ކަޝްމީރުގެ ރައްޔިތުންވަނީ، އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ ލާއިންސާނީ އަމަލްތަކާއި ދެކޮޅަށް މަގުތަކުގައި މުޒާހިރާ ކޮށްފައެވެ. މި މުޒާހިރާތަކުގައި ފަލަސްތީނުގެ ރައްޔިތުންނަށް ތާއީދުކޮށް ތަފާތު ޝުޢޫރުތައް ފާޅުކޮށްފައި ވެއެވެ.
އިސްރާއީލުން ގާޒާއަށް ދެމުންދާ ހަމަލާތަކުގައި މިހާތަނަށް ފަލަސްތީނުގެ 174 މީހުންވަނީ ޝަހީދުވެފައެވެ. މީގެތެރޭގައި 40 ކުޑަކުދިންވެސް ހިމެނެއެވެ. އަދި އިސްރާއީލުގެ ލާއިންސާނީ އަނިޔާތަކާއި ދެކޮޅަށް ދުނިޔޭގެ އެކި ކަންކޮޅުތަކުގައި މުސްލިމުންނާ އަދި އެހެން ދީންތަކުގެ މީހުންވެސް ދަނީ އަޑު އުފުލަމުންނެވެ.
އެހެންނަމަވެސް، އިންޑިއާގެ ފުލުހުންވަނީ، ކަޝްމީރުގައި ފަލަސްތީނަށް ތާއީދުކޮށް ކުރިޔަށްދިޔަ މުޒާހިރާވެސް ބާރުގެ ބޭނުންކޮށްގެން ރޫޅާލާފައެވެ. އިންޑިއާގެ ބާރުގެ ދަށުގައި އޮންނަ ކަޝްމީރަކީ އިންޑިއާ ސަރުކާރާދެކޮޅަށް އަޑުއުފުލާ އެތަކެއް މުސްލިމުންނެއް ދިރިއެޅެމުންދާ ސަރަހައްދެކެވެ.
2019 ވަނަ އޮގަސްޓުމަހު، އިންޑިއާގައި މިހާރު ވެރިކަން ކުރަމުންދާ ހައްދުފަހަނަ އަޅާފައިވާ ހިންދޫންގެ ސަރުކާރުންވަނީ، ޒަމާނުއްސުރެ މި ސަރަހައްދަށް ލިބިދީފައި އޮންނަ މިނިވަންކަން ހަނިކޮށް، މިސަހަރައްދުގައި އިންޑިއާގެ ފުލުހުންގެ ސެކިއުރިޓީ ވަރުގަދަކޮށް، މުޒާޙިރާ ކުރުންވެސް މަނާކޮށްފައެވެ.
ހައްޔަރު ކުރެވިފައިވާ އާރޓިސްޓުގެ އާއިލާއިން ބުނެފައިވަނީ އޭނާއަކީ ސިއްޙީ މައްސަލަތައް ހުންނަ މީހެއްކަމަށާއި، ކޯވިޑް19ގެ ބިރުވެރިކަމުގައި ގިނަ ދުވަސްތަކެއް ވަންދެން އޭނާ ބަންދުގައި ބެހެއްޓުމަކީ ކުރެވިގެންވާނެ ކަމެއް ނޫންކަމުގައެވެ.
މީގެއިތުރުން ކަޝްމީރު ފުލުހުން ވަނީ، އެ ސަރަހައްދުގެ ދީނީ ލީޑަރެއް ކަމުގައިވާ ސަރްޖާން ބަރްކަޓިވެސް ހައްޔަރު ކޮށްފައެވެ. އޭނާ އާއި އަދި އިތުރު 20 މީހަކު ހައްޔަރު ކޮށްފައިވަނީ، ކަޝްމީރުގެ މިސްކިތެއްގައި ފަލަސްތީނު ރައްޔިތުންގެ ސަލާމަތަށް އެދި އޭނާ ނަމާދު ކޮށްފައިވާތީ ކަމަށް އޭނާގެ އާއިލާއިން ހާމަކޮށްފައި ވެއެވެ.
