އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގައި، ބިންލާދިން މަރާލުމަށް އަފްއާނިސްތާންގެ އޮބޮޓަބާދުގައި އެމެރިކާގެ ނޭވީ ސީލްއިން ރޭގަޑުގެ ދަންވަރުގެ ވަގުތުގައި ހިންގި އޮޕަރޭޝަނަށް 10 އަހަރު ފުރުން އެމެރިކާގެ ރައީސް ޖޯ ބައިޑްން ފާހަގަ ކޮށްފިއެވެ.

މި ހާދިސާއަށް 10 އަހަރު ފާހަގަ ކުރަމުން ޖޯ ބައިޑްން ވިދާޅުވެފައިވަނީ، "އެއީ ދުވަހަކުވެސް ހަނދާނުން ފޮނުލެވޭނެ ހިނދުކޮޅެއް" ކަމުގައެވެ. އަދި މި މުނާސަބަތާ ދިމާކޮށް ބައިޑްންވަނީ 20 އަހަރަށްފަހު، އެމެރިކާ ސިފައިން އަފްއާނިސްތާނުން ބޭލުމަށް ނިންމާފައިވާ ނިންމުން އަލުން ދިފާޢު ކުރައްވާފައެވެ.

އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގައި، އޭރު އެމެރިކާއިން އެންމެ ބޮޑަށް ބޭނުންވެފައިވާ ބިންލާދިން މަރާލެވުނުއިރު، ޖޯބައިޑްއަކީ އެމެރިކާގެ ނާއިބު ރައީސްއެވެ.

"އަހަރެމެން، ނަރަކައިގެ ދޮރުތަކާ ހަމައަށް ބިންލާދިންއަށް ފާރަލަމުން ދިޔައިން. އެންމެ ފަހުން އަހަރެމެންނަށް އޭނާ ހޯދުނު،" ބިންލާދިން މަރާލެވުނު ހާދިސާއަށް 10 އަހަރު ފުރުނު މުނާސަބަތާއި ދިމާކޮށް ވައިޓް ހައުސްއިން ނެރުނު ބަޔާނެއްގައި ބުނެފައި ވެއެވެ.

"9/11ގައި ދުނިޔެ ދޫކުރި ހުރިހާ އާއިލާތަކަށްވެސް އަހަރެމެން ވީވައުދު ދެމެހެއްޓިން: އެއީ އަހަރެމެންނާ ވަކިވެދިޔަ ލޯބިވާ އެންމެންގެ ހަނދާންތައް އަހަރެމެން ނައްތާ ނުލާނެކަމުގެ ވައުދު، އަދި އެފަދަ ދެވަނަ ހަމަލަމާއެއް އަހަރެމެންގެ މި ފަސްގަޑުގައި ހިގައިދިޔަ ނުދިނުމަށް އަހަރެމެން ވީ ވައުދު."

ސެޕްޓެމްބަރ 11އަށްފަހު އެމެރިކާއިން ފެށި ހަގުރާމަތަކުގެ ތެރެއިން، އެންމެ ދިގުލައިގެން ގޮސްފައިވާ ހަގުރާމަ ކަމުގައިވާ، އަފްއާނިސްތާނުގައި އެމެރިކާ ސިފައިން ކުރިޔަށް ގެންދާ ހަގުރާމައިގެ ހުރިހާ އޮޕްރޭޝަނެއް ނިންމާ އެގައުމުން އެމެރިކާ ސިފައިން ސެޕްޓެމްބަރ 11ގެ ކުރިން ބޭލުމަށް ނިންމާފައިވާ ޖޯ ބައިޑްން ވަނީ، 2011 ވަނަ އަހަރު، ބިންލާދިން މަރާލުމަށް އެމެރިކާގެ ނޭވީ ސީލްއިން ހިންގި ސިއްރު އޮޕަރޭޝަން ކުރިޔަށް ގެންދިއުމަށް އެމެރިކާގެ އޭރުގެ ރައީސް ބަރަކް އޮބާމާ ހުއްދަ ދެއްވި ދިނުމަށް ތައުރީފް ކުރައްވާ، އޮބާމާއަށް ޝުކުރު އަދާ ކުރައްވާފައެވެ. އަދި ބައިޑްންވަނީ، ޕާކިސްތާނުގައި އެ އޮޕަރޭޝން ކުރިޔަށް ގެންދިޔަ އެމެރިކާގެ ސްޕެޝަން ފޯސަސްއަށްވެސް ޝުކުރު އަދާ ކުރައްވާފައެވެ.

ބިންލާދިން މަރާލުމަށް ކުރިޔަށް ގެންދެވުނު އެ އޮޕަރޭޝަން ވައިޓް ހައުސްގެ ސިޓުއޭޝަން ރޫމުން ވަގުތުން ބައްލަވަމުން ގެންދެވިކަމަށް ވިދާޅުވަމުން ބައިޑްން ވިދާޅުވެފައި ވަނީ، "އެއީ އަހަރެންގެ ހަދާނުން ފޮހެ ނުލެވޭނެ ހިނދުކޮޅެއް- އޭނާ ހުރިތަނެއް ފަރުވާތެރިކަމާ އެކީ ބަލާ ހޯދިގޮތް؛ އަދި އެ އޮޕަރޭޝަނަށް ހުއްދަ ދެއްވުމުގައި ރައީސް އޮބާ ގެންގުޅުއްވި ހިކުމަތު އަމަލީ، އަދި މައިދާނުގައި ހަރަކާތްތެރި ވަމުންދިޔަ އެމެރިކާގެ ސިފައިންގެ ހިތްވަރު،" ވައިޓް ހައުސްއިން ނެރުނު ބަޔާނުގައި ބައިޑްން ވިދާޅުވެފައި ވެއެވެ.

އަފްއާއިންސްތާނުގައި މިހާރު ތިބި ސިފައިން އެގައުމުން ބޭލުމާއި ގުޅޭގޮތުން މި ބަޔާނުގައި ބައިޑްން ވިދާޅުވެފައިވަނީ، އަފްއާނިސްތާނުގައި މިހާރު ހުރިހާ ގޮތަކުންވެސް އަލްގައިދާ ބަލި ކުރެވިފައިވާ ކަމަށާއި އެހެންނަމަވެސް، ދުނިޔޭގެ އެކި ކަންކޮޅުތަކުގައި އަދިވެސް ހަރަކާތްތެރި ވަމުންދާ ޓެރަރިސްޓް ގްރޫޕަތަކުން ކުރިމަތިވެދާނެ ނުރައްކަލަކަށް އަދިވެސް އެމެރިކާ އޮންނާނީ ހޭލާ ބަލަން ކަމަށެވެ.

"އަފްއާނިސްތާނުން އަހަރެމެންނަށް ކުރިމަތިވެދާނެ ކޮންމެ ނުރައްކަލެއް މޮނިޓަރކޮށް އަދި އެ ނުރައްކަލެއް ނައްތާލުމަށް އަހަރެމެން ތިބޭނީ ތައްޔާރަށް. އަދި އެމެރިކާއަށް އަތުވެދާނެ ޓެރަރިސްޓް ހަމަލާއަކުން ސަލާމަތްވުމަށްޓަކާ އަބަދުވެސް އަހަރުމެންގެ އެކުވެރިންނާއެކު މަސައްކަތް ކުރުންމަތީ އަހަރެމެން ދެމި ތިބޭނަން."