އެމެރެކާއިން އެގައުމާ ދެކޮޅަށް ދިމާކުރުމުގެ ސިޔާސަތެއް ގެންގުޅޭނަމަ، ހީވެސް ނުކުރާވަރުގެ ބޮޑު ކާރިސާއެއްގެ ތެރެއަށް އެމެރިކާ ވައްޓާލާނެކަމުގެ އިންޒާރު އުތުރު ކޮރެއާއިން ދީފިއެވެ.

އުތުރު ކޮރެއާއިން އެމެރިކާއަށް އިންޒާރު ދީފައި މިވަނީ، އުތުރުކޮރެއާއި އަދި އެގައުމުގެ ނިއުކުލިއަރ ހަތިރުގެ މަޝްރޫޢާ ގުޅޭގޮތުން ބައިޑްންގެ ސަރުކާރުން ގެންގުޅޭނެ ސިޔާސަތުތައް އިއުލާން ކުރެއްވުމަށް، އެމެރިކާގެ ރައީސް ޖޯ ބައިޑްން ތައްޔާރު ވެވަޑައިގަންނަވަމުން ގެންދަވަނިކޮށެވެ.

އުތުރު ކޮރެއާގެ ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ، ފަހަކަށް އައިސް ވޮޝިންގޓަންގެ ބަސްމަގު ހުރިގޮތުން، އެމެރިކާގެ މިހާރުގެ ރައީސް ޖޯ ބައިޑްން، ނޯތު ކޮރެއާއާއެކު ދިމާކުރުމުގެ ސިޔާސަތެއް ނޫނީ ގެންގުޅެން ބޭނުން ނުވާކަން ވަރަށް ބޮޑަށް ސާފުވެގެން ގޮސްފައިވާ ކަމުގައެވެ.

މި ހަފްތާގެ ކުރީކޮޅު ޖޯ ބައިންޑްން ވަނީ، އުތުރު ކޮރެއާގެ ނިއުކުލިއަރ ޕްރޮގްރާމަކީ ދުނިޔޭގެ ސުލްހައަށް އޮތް ނުރައްކަލެއް ކަމުގައި ވިދާޅުވެފައެވެ. އަދި ވައިޓްހައުސް އިން ބުނެފައިވަނީ، ޖޯ ބައިޑްން އުތުރު ކޮރެއާއާއެކު ގެންގުޅުއްވާނެ ސިޔާސަތަކީ، ހިސާބު ޖަހައިގެން، އަމަލީ ގޮތުން ފިޔަވަޅު އެޅުއްވުމުގެ މައްޗަށް ތަންފީޒު ވެގެންދާނެ ސިޔާސަތެއް ކަމުގައެވެ.

ވައިޓް ހައުސްގެ ތަރުޖަމާން ޖެން ސަކީ ހުކުރު ދުވަހު ވިދާޅުވެފައިވަނީ، އުތުރު ކޮރެއާއި ގުޅޭގޮތުން އެމެރިކާއިން ގެންގުޅޭނެ ސިޔާސަތު އަލުން ދިރާސާކޮށް މިހާރު ނިމިފައިވާ ކަމަށާއި، ފާއިތުވެދިޔަ 4 ސަރުކާރުންވެސް އުތުރު ކޮރެއާގެ ނިއުކުލިއަރ ޕްރޮގްރާމް ހުއްޓާލާތޯ ކުރި މަސައްކަތްތައް ފެއިލް ވެގެން ގޮސްފައިވާތީ، ނޯތު ކޮރެއާއިން އެގައުމުގެ ނިއުކުލިއަރ ޕްރޮގްރާމް ހުއްޓާލުމުގެ އެއްވެސް ޝައުގުވެރިކަމެއް ނުގެންގުޅޭނެކަން ޖޯ ބައިންޑްންއަށް ވަރަށް ރަގަޅަށް ސާފުކަމުގައެވެ.

"އަހަރުމެންގެ ސިޔާސަތު ބިނާވެގެނެއް ނުދާނެ، އާދޭސްކޮށްގެން ނުވަތަ ބަދަލުގަ އެއްޗެއް ދީގެން ނޯތު ކޮރެއާ އެއްވެސް ކަމަކަށް އެއްބަސް ކުރުވުމުގެ މައްޗަށް، ނުވަތަ ނޯތު ކޮރެއާ ކުރާހާ ކަމެއް ބަލަން ކެތްތެރިވެގެން އޮތުމުގެ މައްޗަށްވެސް،" ތަރުޖަމާން ޖެން ސަކީ ވިދާޅުވިއެވެ. އަދި ވިދާޅުވީ މީގެ ބަދަލުގައި އެމެރިކާގެ ސިޔާސަތު ބިނާ ވެގެން ދާނީ، ހިސާބު ޖަހައިގެން އަމަލީގޮތުން އަޅާނެ ފިޔަވަޅުތަކެއްގެ އިތުރުން، ޑިޕްލޮމަސީގެ ހައްލު ހޯދުމުގެ މައްޗަށް ކަމަށާއި، އުތުރު ކޮރެއާއާ ދެކޮޅަށް އަޅާ ފިޔަވަޅުތައް އަޅަމުންދާނީ، އެމެރިކާއާއި އެކުވެރި ގައުމުތަކުގެ ސަލާމަތާއި ރައްކާތެރިކަންވެސް ޔަގީން ކުރަމުން ކަމަށެވެ.

މިހާރު އަލުން ދިރާސާ ކޮށްފައިވާ، އެމެރިކާއިން އުތުރު ކޮރެއާއާމެދު ގެންގުޅޭނެ ސިޔާސަތުތަކާއި ގުޅޭގޮތުން މަޝްވަރާކުރުމަށް، ޖަޕާންއާއި ދެކުނު ކޮރެއާގެ ނޭޝަނަލް ސެކިއުރިޓީ އެޑްވައިޒަރުންނާއެކު ބާއްވާ ޚާއްސަ ބައްދަލުވުންތަކެއް އެމެރިކާގައި ވަރަށް އަވަހަށް ބޭއްވުމަށް ވަނީ ހަމަޖެހިފައެވެ.

އުތުރު ކޮރެއާގެ ދައުލަތުގެ މީޑިއާއިން ދުރަށް ފޮނުވި، އެގައުމުގެ ފޮރިންގ މިނިސްޓަރުގެ ބަޔާނުގައި ބުނެފައިވަނީ، އެމެރިކާގެ ރައީސް ޖޯ ބައިޑްން މި ހަފްތާގަ އެގައުމުގެ ކޮންގްރެސްއަށް އިއްވެވި ރިޔާސީ ބަޔާނުގައި، އުތުރު ކޮރެއާގެ ނިއުކުލިއަރ ޕްރޮގްރާމާ ގުޅޭގޮތުން ދައްކަވާފައިވާ ވާހަކަތަކަކީ، އެގައުމުން "ތަހައްމަލް ނުކުރާނެ" އަދި އެމެރިކާއިން ހަދާފައިވާ "ވަރަށް ބޮޑު ގޯހެއް" ކަމުގައެވެ.

"އޭނާގެ ވާހަކަތަކުން ވަރަށް ރަގަޅަށް ރަމްޒު ކޮށްދޭ، އެމެރިކާއިން އުތުރު ކޮރެއާއިމެދު ގެންގުޅޭނީ، ދިމާކުރުމުގެ ސިޔާސަތެއްކަން، އަދި މިއީ ފާއިތުވެދިޔަ ބައި ގަރުނެއްހާ ދުވަހުގެ ތެރޭގައިވެސް އެމެރިކާއިން އުތުރު ކޮރެއާއާ މެދު ގެންގުޅެމުން އައިސްފާއިވާ ސިޔާސަތު،" ބައިޑްން އެމެރިކާގެ ކޮންގްރެސްއަށް އިއްވެވި ރިޔާސީ ބަޔާނަށް އިޝާރާތް ކުރައްވާ އުތުރު ކޮރެއާގެ ފޮރިންގ މިނިސްޓަރު ވިދާޅުވެފައި ވެއެވެ.

އުތުރު ކޮރެއާގެ ފޮރިންގ މިނިސްޓްރީން ނެރުނު އެހެން ބަޔާނެއްގައި ބުނެފައިވަނީ، މީގެ ކުރިން އެމެރިކާއިން އުތުރު ކޮރެއާގެ އިންސާނީ ހައްގުތަކުގެ ހާލަތާއި ގުޅޭގޮތުން ދައްކާފައިވާ ވާހަކަތަކުގެ ސަބަބުން އެގައުމުގެ ލީޑަރ ކިމް ޖޮންގ އަންގގެ ޝަރަފާއި ގަދަރަށް އުނިކަން އައިސްފައިވާ ކަމަށާއި، އެމެރިކާގެ މިވާހަކަތަކުން، އެގައުމުން ބޭނުންވަނީ ހަމައެކަނި ކުރިމަތި ލުމަކަށް ދިއުންކަން ވަރަށް ރަގަޅަށް ސާފުވެގެން ގޮސްފައިވާ ކަމަށެވެ.

އެމެރިކާގެ މިހާރުގެ ރައީސް ޖޯބައިޑްން ވެރިކަމުގެ ހުވާ ކުރެއްވިތަނާ ކަހަލަ ގޮތަކަށް، އުތުރު ކޮރެއާގެ ރައީސް ކިމް ޖޮންގ އަންގ ދެއްވި ޚިތާބެއްގައި ވިދާޅުވެފައިވަނީ، އެމެރިކާއަކީ އުތުރު ކޮރެއާގެ އެންމެ ބޮޑު ދުޝަމަންގެ ގޮތުގައި ސިފަ ކޮށްފައެވެ. އަދި ވަނީ އެގައުމުގެ ނިއުކުލިއަރ ހަތިޔާރުގެ ޕްރޮގްރާމް އިތުރަށް ތަރައްގީ ކުރައްވަމުން ގެންދިއުމަށްވެސް ވައުދު ވެފައެވެ. އެހެންނަމަވެސް، ޑިޕްލޮމަސީގެ އުސޫލުތަކަށް ފުރުސަތު ދެއްވާނެ ކަމަށްވެސް ވަނީ ވިދާޅު ވެފައެވެ.

އެމެރިކާގެ ރިޔާސީ ކެމްޕޭންގެ ތެރޭގައި ޖޯ ބައިޑް ވިދާޅުވެފައިވަނީ، އުތުރު ކޮރެއާގެ ރައީސްއަކީ، ވަރަށް ނުބައި ނުލަފާ އިންސާނެއް ކަމުގައެވެ.

އެެރިކާގެ ކުރީގެ ރައީސް ޑޮނަލްޑް ޓްރަމްޕް ވެވަޑައިގަތީ، އުތުރު ކޮރެއާގެ މިހާރުގެ ރައީސް ކިމްއާއި ބައްދަލު ކުރެއްވި އެމެރިކާގެ ފުރަތަމަ ރައީސް ކަމުގައެވެ. ޓްރަމްޕް ވަނީ 3 ފަހަރެއްގެ މަތިން ކިމްއާ ބައްދަލު ކުރައްވާފައެވެ. އެހެންނަމަވެސް، އުތުރު ކޮރެއާގެ ނިއުކުލިއަރ ޕްރޮގްރާމް ހުއްޓާލުމަށްވެސް، އަދި އުތުރު ކޮރެއާއާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ނައްތާލާނެ ގޮތަކާމެދު މިދެބޭފުޅުންނަށް އެއްބަސް ވުމަކަށް އާދެވިފައެއް ނުވެއެވެ.