ނިމިދިޔަ ކައުންސިލް އިންތިޚާބުގައި މާލެ ސިޓީގެ މޭޔަރުގެ މަޤާމަށް އިންތިޚާބުވި ޑރ.މުހައްމަދު މުއިއްޒު އާއިއެކު މާލެ ސިޓީގެ މިހާރުގެ މޭޔަރު ބައްދަލުކޮށް އިންތިޤާލީ މަރުޙަލާއާ ގުޅޭގޮތުން މަޝްވަރާކުރައްވައިފިއެވެ.
މާލެ ސިޓީ ކައުންސިލްގައި އޮތް މިބައްދަލުވުމުގައި މޭޔަރު ސިފާ މުހައްމަދާއި، ޑެޕިއުޓީ މޭޔަރު ޝަމާއު ޝަރީފް ވެސް ބައިވެރިވެވަޑައި ގެންނެވިއެވެ. މިބައްދަލުވުމާއި ގުޅޭގޮތުން މާލެ ސިޓީ ކައުންސިލުން ކޮށްފައިވާ ޓްވީޓުގައި ބުނެފައިވަނީ މި ބައްދަލުކުރެއްވުމުގައި އިންތިހާބީ މޭޔަރާ މަގާމު ހަވާލުކުރުމުގެ ކަންކަމާ ގުޅޭ ގޮތުންނާއި، އިންތިޤާލީ މަރުހަލާގެ ކަންކަން ކުރިއަށް ގެންދާނެ ގޮތަކައި ގުޅޭގޮތުން މަޝްވަރާ ކުރެވިފައިވާކަމަށެވެ.
Malé City Mayor @SifaMohammed Deputy Mayor @schamau meets with the Mayor Elect Dr. @MMuizzu and discussed about the Transition Process. pic.twitter.com/YP4RFiqCHO
— Male' City Council (@MaleCitymv) April 25, 2021
ކައުންސިލް އިންތިޚާބުގައި މާލެ ސިޓީން ވެރިކަން ކުރާ އެމްޑީޕީގެ މައްޗަށް އިދިކޮޅު ޕީޕީއެމްއިން ވަނީ ބޮޑު ކާމިޔާބެއް ހޯދާފައެވެ. އެގޮތުން މާލެ ސިޓީގެ މޭޔަރުގެ މަޤާމާއިއެކު 12 ގޮޑިއެއް ޕީޕީއެމްއިން ވަނީ ކާމިޔާބު ކޮށްފައެވެ. ލޯކަލް ކައުންސިލް އިންތިހާބުގައި އެމްޑީޕީގެ ކެންޑިޑޭޓު، އަނަސް އަބްދުއްސައްތާރާ ވާދަކުރައްވާ ޕީޕީއެމްގެ ކެންޑިޑޭޓް، ޑރ. މުއިއްޒު މޭޔަރު ކަމަށް އިންތިހާބުވެވަޑައިގަތީ ވޯޓުލީ މީހުންގެ 61 ޕަސެންޓް ވޯޓުންނެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި، އިންތިޚާބުވި ކައުންސިލަރުން ހުވައިކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންނަ މަހުގެ މެދު ތެރޭގައިކަމަށް ލޯކަލް ގަވަރުމަންޓް އޮތޯރިޓީ (އެލްޖީއޭ)އިން ވަނީ ބުނެފައެވެ.
މުޅި އިންތިޙާބަށް ބަލާއިރު އިންތިޙާބު ކުރަންޖެހޭ ޖުމްލަ މަޤާމުތަކުގެ ތެރެއިން 43 އިންސައްތަ ކާމިޔާބުކުރީ އެމްޑީޕީއެވެ. އިދިކޮޅު ޕީޕީއެމްއަށް ކާމިޔާބު ކުރެވިފައިވަނީ %34.9 އެވެ.
ކޮމެންޓު ފޮނުވާ