ހައްޔަރުކުރިޔަސް، މަރާލިޔަސް ޑިސެންބަރުގައި ބަންގްލަދޭޝްއަށް އެނބުރި ދާނަން: ޝެއިޚް ހަސީނާ

ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ، ކުރިއަށް އޮތް ޑިސެންބަރު މަހުގެ ތެރޭގައި އެ ޤައުމަށް އެނބުރި ވަޑައިގެން ކޯޓަށް ހާޒިރުވެވަޑައިގަންނަވާނެ ކަމަށް ވިދާޅުވެއްޖެއެވެ.

ރޮއިޓާސްއަށް ފޯނުން ދެއްވި ގާތްގަނޑަކަށް ގަޑިއެއްހާއިރުގެ އިންޓަވިއުއެއްގައި، އުމުރުފުޅުން 78 އަހަރުގެ ހަސީނާ ވިދާޅުވީ ޤައުމަށް ވަޑައިގެންފި ނަމަ ހައްޔަރުކުރުމުގެ ފުރުޞަތު ބޮޑު ކަމަށާއި، މަރާލުމަކީވެސް ވެދާނެ ކަމެއް ކަމަށެވެ. އެހެންނަމަވެސް، އެ ކަމަނާ ވިދާޅުވީ އަވާމީ ލީގުގެ ލީޑަރުންނާއި މެންބަރުންނަށް ލިބެމުންދާ އަނިޔާތަކުގެ ސަބަބުން ދެން މަޑުކުރެއްވެން ނެތް ކަމަށެވެ.

"މަރު އަތުވެއްޖެ ނަމަ އަޅުގަނޑު ބޭނުންވަނީ އަޅުގަނޑުގެ އަމިއްލަ ބިމުގައި، މައިންބަފައިން ވަޅުލެވިފައިވާ އަދި އެ ބޭފުޅުންގެ ލޭ އޮހޮރުނު ބިމުގައި މަރުވާން،" ހަސީނާ ވިދާޅުވިއެވެ.

ބަންގްލަދޭޝްގައި އެންމެ ދިގު މުއްދަތަކަށް ވެރިކަން ކުރެއްވި ލީޑަރު ހަސީނާ، 2024 ވަނަ އަހަރު ޤައުމު ދޫކުރައްވައި އިންޑިއާއަށް ވަޑައިގެންނެވީ، ދަރިވަރުން އިސްވެ ހިންގި ބޮޑެތި މުޒާހަރާތަކާ ގުޅިގެން، ޖެހިޖެހިގެން 20 ވަރަކަށް އަހަރު ދެމިއޮތް ބޮޑުވަޒީރުކަން ދޫކޮށްލެއްވުމަށްފަހުއެވެ. އެ މުޒާހަރާތަކުގައި 1400 އެއްހާ މީހުން މަރުވި ކަމަށް އދ.ގެ ރިޕޯޓުތަކުން ދައްކައެވެ.

މުޒާހަރާ ކުރި ދަރިވަރުންނާ ދެކޮޅަށް ބާރުގެ ބޭނުންކުރުމަށް އަމުރު ކުރެއްވި ކަމުގެ ކުށުގައި، ބަންގްލަދޭޝްގެ ހަނގުރާމައިގެ ޖަރީމާތައް ބަލާ ކޯޓުން މިދިޔަ ނޮވެންބަރު މަހު ވަނީ ހަސީނާގެ ޣައިރު ޙާޟިރުގައި މަރުގެ ޙުކުމް އިއްވާފައެވެ. މީގެ އިތުރުން، ކުރީގެ ދާޚިލީ ވަޒީރު އަސަދުއްޒަމާން ޚާން ކަމާލްގެ މައްޗަށްވެސް ވަނީ މަރުގެ ޙުކުމެއް އިއްވާފައެވެ. ހަސީނާ ވަނީ އެ ޙުކުމާ ގުޅޭ ހުރިހާ ތުހުމަތުތަކެއް ދޮގުކުރައްވާފައެވެ.

މިއީ އެނބުރި ވަޑައިގަންނަވާނެ ވަކި ދުވަހެއް ހަސީނާ ކަނޑައެޅުއްވި ފުރަތަމަ ފަހަރެވެ. އަދި އަރުވާލެވިފައިވާ އެހެން އަވާމީ ލީގުގެ ލީޑަރުންވެސް އެ ކަމަނާއާ އެކު ޤައުމަށް ވަޑައިގެން، އެންމެން އެކުގައި ކޯޓަށް ހާޒިރުވާނެ ކަމަށް ވިދާޅުވި ފުރަތަމަ ފަހަރެވެ. އެހެންނަމަވެސް، ވަޑައިގަންނަވާނެ ސީދާ ތާރީޚެއް، ނުވަތަ ހާޒިރުވެވަޑައިގަންނަވާނީ ކޮން ކޯޓަކަށް ކަމެއް ހަސީނާ ހާމަކުރައްވާފައެއް ނުވެއެވެ.

"އަޅުގަނޑު ޢަދުލުއިންޞާފަށް ތަބާވަން. ޝަރީޢަތް ފެށުމުން މައްސަލަ ރައްޔިތުންނަށް ސާފުވާނެ. އެކަން ސާބިތުކޮށްދޭން އަޅުގަނޑު ބޭނުން،" ހަސީނާ ވިދާޅުވިއެވެ.

ދިއްލީގައި ހުންނަވައި ދެއްވި މި އިންޓަވިއުއިން ފާހަގަވި ގޮތުގައި، އަވާމީ ލީގުގެ ގާތްގަނޑަކަށް ހުރިހާ އިސް ބޭފުޅުންގެ މައްޗަށް ދަޢުވާ ކޮށްފައިވާއިރު، ގިނަ ބޭފުޅުން އުޅުއްވަނީ ފިއްލަވައިގެންނެވެ. ޖަލަށް ދާން ޖެހިދާނެތީ ކަންބޮޑުވެވަޑައިނުގަންނަވާ ކަމަށް ހަސީނާ ވިދާޅުވިއެވެ. ސަބަބެއް ކަމަށް ވިދާޅުވީ 1981 ވަނަ އަހަރު އަރުވާލެއްވުމަށްފަހު ބަންގްލަދޭޝްއަށް އެނބުރި ވަޑައިގެންނެވި ފަހުން، ޢަސްކަރީ ވެރިކަމާ ދެކޮޅު ޙަރަކާތްތަކުގައި ތަކުރާރުކޮށް ހައްޔަރު ކުރެވި، 2007 ވަނަ އަހަރު ކޮރަޕްޝަންގެ ދަޢުވާގައި ޖަލަށްވެސް ލެވުނު ކަމުގައި ވިޔަސް، 2008 ވަނަ އަހަރު މިނިވަންވެ ވަޑައިގެން އިންތިޚާބު ކާމިޔާބު ކުރެއްވުނު ކަމަށެވެ.

ބަންގްލަދޭޝްގެ 300 ޕާލިމެންޓަރީ ދާއިރާގެ ތެރެއިން 125 ދާއިރާ ހިމެނޭ ގޮތަށް އޮންލައިން ބައްދަލުވުންތައް ބާއްވައި، އަވާމީ ލީގު އަލުން އިޢާދަކުރުމުގެ މަސައްކަތް ކުރައްވަމުން ގެންދަވާ ކަމަށްވެސް ހަސީނާ ވިދާޅުވިއެވެ. "އަޅުގަނޑުގެ މައްޗަށް ޙުކުމް އިއްވާފައި އޮތުމުން، އަޅުގަނޑަށް އިންތިޚާބުގައި ވާދަ ނުކުރެވިދާނެ. އެކަމަކު އަވާމީ ލީގު ސަސްޕެންޑް ކުރަން ޖެހޭ ސަބަބެއް ނެތް. އަޅުގަނޑުމެން ގޯސްކޮށް ކަން ކުރި ނަމަ، އެކަން ނިންމާނީ ރައްޔިތުން،" އޭނާ ވިދާޅުވިއެވެ.

ހަސީނާ އެނބުރި ބަންގްލަދޭޝްއަށް ވަޑައިގަތުމަކީ އެ ޤައުމުގެ ސިޔާސީ ބައިބައިވުންތައް އިތުރުކޮށްލާނެ ކަމެއް ކަމުގައި ބެލެވެއެވެ. ހަމައެއާއެކު، އިންޑިއާއިން ހަސީނާއަށް ހިމާޔަތް ދިނުމާ ގުޅިގެން ހީނަރުވެފައިވާ އިންޑިއާ-ބަންގްލަދޭޝް ގުޅުން ރަނގަޅުވެގެން ދިއުމުގެ ފުރުޞަތުވެސް އެބައޮތެވެ. ބަންގްލަދޭޝްއިން ވަނީ ހަސީނާ ޙަވާލުކުރުމަށް އިންޑިއާގައި ތަކުރާރުކޮށް އެދިފައެވެ. އިންޑިއާގެ ޚާރިޖީ ވުޒާރާއިން މިދިޔަ އޭޕްރީލް މަހު ބުނެފައިވަނީ އެ ރިކުއެސްޓު ބަލަމުންދާ ކަމަށާއި، ބަންގްލަދޭޝްގެ އާ ސަރުކާރާއެކު ގުޅުން ވަރުގަދަ ކުރަން ބޭނުންވާ ކަމަށެވެ.

ހަސީނާގެ މި ވާހަކަފުޅުތަކާ ގުޅިގެން ބަންގްލަދޭޝް ސަރުކާރުގެވެސް، އަދި އިންޑިއާގެ ޚާރިޖީ ވުޒާރާގެވެސް ބަހެއް އަދި ލިބިފައި ނުވާ ކަމަށް ރޮއިޓާސްއިން ބުނެއެވެ.