މިސްރުގެ މުސްލިމް ބްރަދަރހޫޑްގެ ލީޑަރު އުމުރަށް ޖަލަށް ލާން ހުކުމް ކޮށްފި

މިސްރުގައި މަނާ ކޮށްފައިވާ ސިޔާސީ ޕާޓީ، މުސްލިމް ބްރަދަރހޫޑްގެ ސީނިއަރ ލީޑަރެއްކަމުގައިވާ، މަހުމޫދު އިއްޒަތު އުމުރަށް ޖަލަށް ލާން ހުކުމް ކޮށްފިމަކަށް، މިސްރުގެ ދައުލަތުގެ ޓީވީން ރިޕޯޓު ކޮށްފިއވެ.

މިސްރުގެ ސަރުކާރުން ކޮންޓްރޯލް ކުރާ، މިޑްލް އީސްޓް ނިއުސް އޭޖެންސީން ރިޕޯޓު ކޮށްފައިވާ ގޮތުގައި، ވެރިރަށް ކައިރޯގެ ކޯޓަކުން ހިންގި ޝަރީއަތުގައިވަނީ، މުސްލިމް ބްރަދަރހޫޑްގެ ވަގުތީ އެންމެ އިސްވެރިޔާގެ މަގާމުގައި ހުންނެވި އިއްޒަތު މަހުމޫދުގެ މައްޗަށް ޓަރަރިޒަމްގެ ކުށް ސާބިތު ވާކަމަށް ނިންމާފައެވެ.

މަހުމޫދު އިއްޒަތުގެ މައްޗަށް ޓެރަރިޒަމްގެ ކުށް ސާބިތުވާކަމަށް ނިންމާފައިވަނީ، 2013 ވަނަ އަހަރު، މިސްރުގެ އެންމެ ފުރަތަމަ ޑިމޮކްރަޓިކް ވެރިކަން ބަދަލުކޮށް، އިންތިޚާބީ ރައީސް މުހައްމަދު މުރުސީ މަގާމުން ދުރުކޮށް، އެގައުމަށް ގެނެވުނު ބަޢާވާތަށްފަހު، ހިގައިދިޔަ ހަމަނުޖެހުންތަކާ ގުޅިގެންނެވެ.

މިސްރުގެ ޝަރުއީ ދާއިރާގެ ބައެއް ފަރާތްތަކާ ހަވާލާދީ، ރޮއިޓާސްއިން ރިޕޯޓު ކޮށްފައިވާ ގޮތުގައި، އިއްޒަތުގެ މައްޗަށް ސާބިތުވެފައިވާ ކުށަކީ، ހަމަނުޖެހުން އުފެއްދުމާއި، 2013 ވަނަ އަހަރުގެ ބަޢާވާތާއި ގުޅިގެން އުފެދިގެން ދިޔަ ހަމަނުޖެހުން ތަކުގައި، މުސްލިމް ބްރަދަރހޫޑްގެ ހެޓްކުއާޓާސްގެ ކުރިމަތީގައި އެ ޕާޓީއަށް ތާއީދު ކުރާ ފަރާތްތަކާ އިދިކޮޅު ފަރާތްތަކާ ދެމެދު ހިގައިދިޔަ ހަމަ ނުޖެހުންތަކުގައި، އެޕާޓީގެ އެކްޓިވިސްޓުންނަށް ހަތިޔާރު ސަޕްލައި ކޮށްދިނުމުގެ ކުށުގެ ދައުވާއެވެ.

މިސްރުގައި އޮތް އެންމެ ދުވަސްވީ މުސްލިމް ޖަމާއަތް ކަމަށްވާ، މުސްލިމް ބްރަދަރހޫޑްގެ އެހެނިހެން އިސްވެރިންގެ މައްޗަށްވެސް މި މައްސަލާގައިވަނީ އުމުރުދުވަހުގެ ޖަލުގެ ހުކުމް އިއްވިފައެވެ.

މި ހުކުމާއި ބެހޭގޮތުން މިހާތަނަށް އިއްޒަތުގެ ގާނޫނީ ވަކީލުން އެއްވެސް ކޮމެންޓެއް ކޮށްފައެއް ނުވެއެވެ. އިއްޒަތު ހައްޔަރު ކުރެވުނު އިރު، މުސްލިމް ބްރަދަރހޫޑްއިން ބުނެފައިވަނީ، އޭނާ ހައްޔަރު ކުރެވިފައިވަނީ ސިޔާސީ ތުހުމަތުތަކެއްގައި ކަމުގައެވެ.

ފާއިތުވެދިޔަ އަހަރުގެ ހޫނު މޫސުމުގައި، މިސްރުގެ ފުލުހުން އިއްޒަތު ހައްޔަރު ކޮށްފައިވަނީ، ވެރިރަށް ކައިރޯގެ ރަށް ބޭރުގައި ހުރި އެޕާރޓްމަންޓެއްގައި ފިއްލަވައިގެން ހުންނަވަނި ކޮށެވެ. އޭނާ ހައްޔަރު ކުރުން ވެގެން ދިޔައީ، މިސްރުގެ ސަރުކާރުން، ނައްތާލުމަށް މަސައްކަތް ކުރަމުންދާ މުސްލިމް ބްރަދަރހޫޑަށް ކުރިމަތިވެގެންދިޔަ ވަރަށް ބޮޑު ގޮންޖެހުމަކަށެވެ.

އޭރު އިއްޒަތު ހައްޔަރު ކުރުމަށްފަހު، ފުލުުހުން ބުނެފައިވަނީ، އޭނާ ހުންނެވި އެޕާޓްމަންޓުން، ގައުމުން ބޭރުގައި ދިރިއުޅެމުންދާ މުސްލިމް ބްރަދަހޫޑްގެ މެމްބަރުންނާ ވާހަކަ ދެއްކުމަށް ބޭނުން ކުރުމަށްޓަކާ، އެންކްރިޕްޓް ކޮށްފައިވާ ސޮފްޓްވެއަރތައް އަޅާފައިވާ ފޯނުތަކާއި ކޮމްޕިއުޓަރތައް ފެނިފައިވާ ކަމަށެވެ.

އަދި މީގެ އިތުރުންވެސް، ހަމަނުޖެހުން އުފެއްދުމަށް ހަދާފައިވާ ޕްލޭންތަކާއި ގުޅޭ އެތަކެއް ލިޔެކިއުންތައްވެސް އެ އެޕާޓުމަންޓުން ފެނިފައިވާކަމަށް ވެސް ފުލުހުން ބުނެފައި ވެއެވެ.

2013 ވަނަ އަހަރު، އޭރުގެ ރައީސް މުރުސީ މަގާމުން ދުރުކުރެވުނު ފަހުން އިއްޒަތު އުޅުއްވަމުން ގެންދެވީ ފިއްލަވައިގެންނެވެ.

އިއްޒަތުއަކީ، މުސްލިމް ބްރަދަހޫޑުގައި ނުފޫޒު ގަދަ ބޭފުޅެކެވެ. އޭނާ އެންމެ ފުރަތަމަ ހުންނެވީ، އެ ޖަމާއަތުގެ ލީޑަރ މުހައްމަދު ބަދީގެ ނާއިބެއްގެ މަގާމުގައެވެ. އަދި 2013 ވަނަ އޮގަސްޓުމަހު ބާދީ ހައްޔަރު ކުރުމާއި ގުޅިގެން އޭނާ އެ ޖަމާއަތުގެ ލީޑަރަށް ވެވަޑައިގަތެވެ. އިއްޒަތު ހިމެނިގެން ދިޔައީ މުސްލިމް ބްރަދަރހޫޑުގައި ހަރުކަށި ވިސްނުމަށް ތާޢީދު ކުރެއްވި ބޭއްފުޅެއްގެ ގޮތުގައެވެ.

މީގެކުރިންވެސް އިއްޒަތުގެ މައްޗަށް ޓެރަރިޒަމާއި ގުޅުންހުރި އެތައް ތުހުމަތެއްގައި ދައުވާކުރެވިފައި ވެއެވެ. އަދި ދެފަހަރެއްގެ މަތިން، ޢައިރު ހާޒިރުގައި އޭނާގެ މައްޗަށް މަރުގެ ހުކުމް ވެސް އިއްވިފައި ވެއެވެ.