މޫސާގެ ފާނުގެ ޒަމާނުގެ ފިރުއައުނުގެ ގަބުރު ހިމެނޭގޮތަށް، މިސްރުގެ މަގުތަކުގައި ފިރުއައުނުންގެ ޕެރޭޑެއް

މިސްރުގައި ގަދީމީ ޒަމާނަތަކުގައި ރަސްކަން ކޮށްފައިވާ ފިރުއައުނުންގެ ގަބުރުތައް މިހާރު ބޭތިއްބިފައި ތަނުން ނަގާ، ކުލަގަދަ ޕެރޭޑެއްގައި، ވެރިރަށް ކައިރޯގެ މަގުތަކުން ދަތުރު ކޮށްފައި، މި ގަބުރުތައް ބެއިތިއްބުމަށް، އެންމެ މަތީ ޓެކްނޮލޮޖީގެ ބޭނުން ކޮށްގެ ތައްޔާރު ކުރެވިފައިވާ ތަނަށް ގެންގޮސްފިއެވެ.

ފިލްމީ މަންޒަރެއްގެ ގޮތުގައި ސިފަ ވެގެން ދިޔަ މި ޕެރޭޑަކީ، މިސްރުގަ މުއްސަދި އަދި ކުލަގަދަ ތާރީޚު ދައްކުވައިދޭގޮތަށް، އަދި އެގައުގެ ތާރިޚީ އެންމެ މުހިންމު ތަރިކަތައް ކަމުގައިވާ، ކުރީގެ ފިރުއައުނުންގެ ގަބުރުތައް މުޅިން އާ މަންޒިލަކަށް ގެންދިއުމަށް ކުރިޔަށް ގެންދެވުނު ބޮޑު ޕްރޮޖެކްޓުގެ މުހިންމު ބައެކެވެ.

މޫސާގެފާނުގެ ފިރުއައުނު ރަމްސީސްގެ ގަބުރު ހިމެނޭގޮތަށް އިތުރު 21 ފިރުއައުނުންގެ ގަބުރުތައް ކައިރޯގެ މަގުތަކުން ދަތުރުކޮށްފައި ގެންދިއުމަށްޓަކާ، މިސްރުގެ އަސްކަރިއްޔާއާއި އަދި ފަތުރުވެރިކަމާ ބެހޭ ވުޒާރާއިން އިންތިޒާމްކުރި މި މުހިންމު އިވެންޓަށް ދީފައިވާ ނަމަކީ، "ފިއައުނުންގެ ރަން ޕެރޭޑް" އެވެ.

ފިރުއައުނުންގެ މި ގަބުރުތައް ގެންދެވިފައިވަނީ، ތަހުރީރު މައިދާން ކައިރީގައި ހުންނަ، ގަބުރުތައް މިހާތަނަށް ބޭތިއްބިފައި ތިބި، އެޖިޕްޝިއަން މިއުޒިއަމްއިން ފެށިގެން، ބޮޑެތި ބައެއް މަގުތަކުން ލާފައި، ގަބުރުތައް ބޭތިއްބުމަށް މިހާރު ތައްޔާރު ކުރެވިފައިވާ، މިސްރުގެ އެންމެ ފުރަތަމަ އިސްލާމިކް ވެރިރަށް ކަމުގައިވާ އަލް-ފުސްތާތުގައި ހުންނަ ނޭޝަނަލް މިއުޒިއަމް އޮފް އެޖިޕްޝީއަން ސިވިލައިޒޭޝަން (NMEC)އަށެވެ.

"މި ހައިބަތު ބޮޑު މަންޒަރަކީ، މި މިސްރުގެ ތާރީޚުގެ އެންމެ ފުނަށް މޫ ފައިބައިފައިވާ މި މަތިވެރި ދަރިފަސްކޮޅުތަކުގެ އަސާރީ ތަރިކަތަކުގެ ބަލަދުވެރި ފަރާތްކަމުގައިވާ، މިސްރުގެ ރައްޔިތުންގެ މަތިވެރިކަން ރަމްޒު ކޮށްދޭ، ހެކިތަކެއް،" މިސްރުގެ ރައީސް އަބުދުލް ފައްތާހު އަލް ސީސީ އޭނާގެ ޓުވިޓަރގައި ލިޔުއްވާފައި ވެއެވެ.

"އަރެން މިސްރުގެ ހުރިހާ ރައްޔިތުންނަށްވެސް، އަދި މުޅި ދުނިޔެއަށްވެސް ދައުވަތުދެން، ދެވަނައެއް ނެތްފަދަ މި އިވެންޓް ބެއްލެވުމަށް– މުޅި އިންސާނިއްޔަތު ފަޚުރުވެރިވާ ފަދަ، ދަރިފަސްކޮޅެއް ބިނާ ކޮށްދެއްވާ، އަދި އަހަރެމެންގެ މި ބިން ރައްކާތެރި ކޮށްދިން މަތިވެރި ކާބަފައިންގެ ހަދާންތައް އަލުން އާ ކުރުމަށްޓަކާ– އަދި އަހަރުމެން އެ އަސާސްތަކެއް މަތީގައި ދެމިތިބި އަސާސްތައް އެގޮތުގައި ކުރިޔަށް ގެންދިއުމަށްޓަކާ– ބިނާކުރުމާއި އިންސާނިއްޔަތު ކަމުގެ އަސާސްތައް،" ސީސީ ޓުވީޓު ކުރައްވާފައި ވެއެވެ.

ކުރީގެ ފިރުއައުނުންތަކުގެ ގަބުރުތައް ބޭތިއްބުމަށް މުޅިން އަލަށް ތައްޔާރު ކުރެވުނު ތަނަށް، މި ޚާއްސަ ޕެރޭޑުގައި ގެންދެވުނު 22 ޝާހީ ގަބުރުތަކުގެ ތެރޭގައި، ހިލައިން ހަދާ ޖަރީ ކޮށްފައިވާ ޝާހީ 17 ސަންދޯއްވެސް މިނެއެވެ. މު ހުރިހާ ތަކެއްޗެއްވެސް ގެންދެވިފައިވަނީ އަސް ގާޑިއާތަކުގެ އެހީގައި، މިސްރުގެ ނީލަ ކޯރުގެ އައްސޭރިފަށުން ދަތުރު ކޮށްފައެވެ.

ޕެރޭޑުގައި ގެންދެވުނު މިސްރުގެ ގަދީމީ ޒަމާނުގެ ރަސްރަސްކަލުންގެ ގަބުރުތަކުގެ ތެރޭގައި، މަޝްހޫރު މޫސާގެ ފާނުގެ ފިރުއައުނުގެ ގަބުރު ރަމްސީސް II، ސެޓި I، ސެކެންނެންރގެ އިތުރުން ޓުތުމޯސިސް IIIގެ ގަބުރުގެ އިތުރުން އިތުރު 4 ރާނީންގެ ގަބުރުވެސް ހިމެނެއެވެ. މީގެ ތެރޭގައި ހިމެނެނީ، އަހުމޯސް-ނެފެރެތާރީ، ޓަޔީ، މެރިތަމޫން އަދި ހެޓްޝެޕްސޫޓްގެ ގަބުރެވެ.

މި ޕެރޭޑަށް 21 ބަޑީގެ ސަލާމެއް އެރުވިފައިވާއިރު، ޕެރޭޑް ދަތުރު ކޮށްފައިވަނީ، މިސްރުގެ މިލިޓަރީ ބޭންޑާއެކުގައެވެ. ގަބުރުތައް ގެންދެވިފައި ވަނީ، ގަބުރުތަކަށް ޚާއްސަ ކޮށްގެން ޒީނަތްތެރި ކުރެވިފައިވާ އުޅަދުތަކުގައެވެ. މިއިން ކޮންމެ އުޅަދެއްގައިވެސް، އުޅަދެއްގައި އުފުލިފައިވާ ފިރުއައުނެއްގެ ނަން، ގަދީމީ ޒަމާންތަކުގައި ލިޔަން ބޭނުންކޮށްފައިވާ ކުރެހި އަހުރުތައް ބޭނުން ކޮށްގެންނާއި އަދި އަރަބި ބަހުން ލިޔެފައި ވެއެވެ.

މި ޕެރޭޑުގައި ގެންދެވުނު ގަބުރުތަކަކީ، ދެތަނަކުން ހޯދިފައިވާ ގަބުރުތަކެކެވެ. އެންމެ ފުރަތަމަ ގަބުރުތައް ފެނިގައިވަނީ، ވެސްޓް ބޭންކުގެ އަގުބޮ ސަރަހައްދެއްގައިވާ، ދައިރު އެލް-ބަހާރި ނަމަކަށް ކިޔާ ސަރަހައްދުގައި ހުރި tomb TT320ގެ ނަން ދީފައިވާ، ހޮހަޅައިންނެވެ.

މި 22 ފިރުއައުނުންވެސް ނިސްބަތްވަނީ، "ނިއު ކިންކޑަމް"ގެ ޒަމާނަށެވެ. މިޒަމާނަކީ، ގަބުރުތަކުން ވައްކަން ކުރާ މީހުންގެ ކިބައިން ރައްކާތެރި ކުރުމަށްޓަކާ، ހޮހަޅަތަކަށް ވަންނަ ދޮރު ސިއްރުވާ ގޮތަށް، ބިމު އަޑީގައި ހޮހަޅަތައް ހަދާ އުޅުނު ޒަމާނެވެ.

މި ޕެރޭޑުގެ މައިގަޑު މަގްސަދަކީ، މިސްރުގެ ގަދީމީ ޒަމާނުގެ 18 ރަސްކަލުންނާއި 4 ރާނީންގެ ގަބުރުތަކާއި، އެމީހުންގެ ޒީނަތްތެރި ކުރެވިފައިވާ ސަންދޯއް ތަކާއި، އަދި އެމީހުންނަށް ނިސްބަތްވާ ހުރިހާ ތަކެއްޗެއް، ބޭތިއްބިފައި ހުރި ދާރުލް އާސާރުން ނެރެގެން އަލަށް ބޭތިއްބުމަށް ތައްޔާރު ކުރެވިފައިވާ ދާރުލް އާސާރަށް ގެންދިއުމަށްޓަކާ ބޭއްވިގެން ދިޔަ ޚާއްސަ ޕެރޭޑެކެވެ.

މި ގަބުރުތައް ބޭތިއްބުމަށް ހަމަޖެހިފައިވާ މުޅިން އާ ޑިސްޕްލޭތަކުން، މި ގަބުރުތަކުގެ ސީޓީ ސްކޭންތައް ދައްކުވާ ދޭނެއެވެ. މީގެތެރޭގައި، ގަބުރުތަކުގެ ގައިގައި އޮޅާފައިވާ ފޮތިތަކުގެ އެތެރެވެސް ފެންނާން ހުރުމުގެ އިތުރުން، ކަށިތަކެއް ބިންދައިގެން ގޮސްފައި ވާނަމަ އޭގެ ތަފްސީލްތަކުގެ އިތުރުން، މަރުވުމުގެ ކުރިން ވަކި ޚާއްސަ ބައްޔެއް ޖެހިގައިވާނަމަ އޭގެތަފްސީލުތައްވެސް ފެންނާން ހުރުން ހިމެނެއެވެ.