ކޯވިޑް ވެކްސިންގެ ދެ ޑޯޒް ފުރިހަމަ ކޮށްފައިވަނިކޮށް، އާޖެންޓީނާގެ ރައީސް ކޯވިޑަށް ޕޮޒިޓިވް ވެއްޖެ

ރަޝިއާއިން އުފައްދާފައިވާ ސްޕުންޓިކް V ކޯވިޑް19 ވެކްސިންގެ ދެ ޑޯޒް މިއަހަރުގެ ކުރީކޮޅު ފުރިހަމަ ކޮށްފައި ވަނިކޮށް، އާޖެންޓީނާގެ ރައީސް އަލްބާޓޯ ފެނާންޑޭޒް ކޯވިޑް19 އަށް ޕޮޒިޓިވް ވެފައިވާކަން އޭނާގެ ޑޮކްޓަރު ޔަގީން ކޮށްދީފިއެވެ.

އާޖެންޓީނާގެ ރައީސް ފެނާންޑޭޒް ވިދާޅުވެފައިވަނީ، ހެދުނު އެންޓިބޮޑި ޓެސްޓުތަކުން ކޯވިޑަށް ޕޮޒިޓިވް ވެފައިވާ ކަމަށް ދައްކާފައިވާތީ، އަމިއްލަފުޅަށް އެކަހެރި ވެވަޑައިގަތުމަށް އޭނާ ވަނީ ނިންމަވާފައެވެ.

ދިގު ޒަމާންތަކެއް ވަންދެން، ފެނާންޑޭޒްގެ ޕާސަނަލް ޑޮކްޓަރެއްގެ ގޮތުގައި ހުންނެވި، އަދި މިހާރު އޭނާގެ މެޑިކަލް ސްޓާފް ޓީމުގެ މެމްބަރެއް ކަމުގައިވާ ފެޑްރިކޯ ސާވެޑްރާ ސޮއިކުރައްވާ ނެރުއްވި ބަޔާނެގައި ބުނެފައިވަނީ، މިހާރު ހެދިފައިވާ ޕީސީއާރު ޓެސްޓުން ވަނީ، ރައީސް ފެނާންޑޭޒް ކޮވިޑަށް ޕޮޒިޓިވް ވެފައިވާކަން ޔަގީން ވެފައެވެ.

ސާވެޑްރާ ވިދާޅުވި ގޮތުގައި، ފެނާންޑޭޒްގެ ކިބައިން ކޯވިޑްގެ އަލާމާތްތައް ފެންނަމުން ދާކަމަށާއި، އެހެންނަމަވެސް އަލާމާތްތައް ހުރީ އެންމެ އާދައިގެ ހާލަތުގައި ކަމަށެވެ. އާޖެންޓީނާގެ ރައީސް ކޯވިޑަށް ޕޮޒިޓިވް ވިތޯ ބެލުމަށް ޓެސްޓު ކޮށްފައިވަނީ، މީގެ އެއް ދުވަސްކުރިން، ބޮލުގަ ރިއްސާ އަދި ހުން އަންނަން ފެށުމާއި ގުޅިގެންނެވެ.

ރައީސް ފެނާންޑޭޒްގެ ޕްރެސް އޮފީހުން ޔަގީން ކޮށްދީފައިވާ ގޮތުގައި އޭނާ ކޯވިޑް19 ވެކްސިންގެ ފުރަތަމަ ޑޯޒް ޖަހާފައިވަނީ، އާޖެންޓީނާގެ ވެރިރަށް ބޯނިސް އައިރިސްގެ ސަރުކާރު ހޮސްޕިޓަލެއްގައި މިއަހަރުގެ ޖެނުއަރީ މަހުގައެވެ. އަދި ދެވަނަ ޑޯޒް ޖަހާފައިވަނީ ޖެހިގެން އައި ފެބްރުއަރީ މަހުގެ 11 ވަނަ ދުވަހުއެވެ.

ފެނާންޑޭޒް އާޖެންޓީނާގެ ބައެއް މީޑިއާތަކަށް ވިދާޅުވެފައި ވަނީ، އޭނާގެ ހާލު ރަގަޅު ކަމަށާއި، ވެކްސިން ޖަހާފައި ނުވިނަމަ، އޭނާގެ ހާލަތު މާ ގޯސްވީސް ކަމުގައެވެ. އަދި ވިދާޅުވެފައިވަނީ، މާ ސީރިއަސް އަލާމާތްތަކެއް ފެންނާން ނެތް ކަމުގައެވެ.

ފެނާންޑޭޒްގެ އެންޓިބޮޑީ ޓެސްޓްތަކުގެ ނަތީޖާއިން ކޯވިޑަށް ޕޮޒިޓިވް ވެފައިވާކަން ހާމަކުރަމުން ކުރައްވާފައިވާ ޓުވީޓަށް ޖަވާބު ދެމުން، ރަޝިއާގެ ސްޕުންޓިކް V ވެކްސިން އުފައްދާފައިވާ ރަޝިއަން ގަމަލެޔާ އިންސްޓިޓިއުޓްއިން ބުނެފައިވަނީ، އެ ކުންފުނިން އުފައްދާފައިވާ ސްޕުންޓިކް V ވެކްސިނަކީ، %91.6 ކޯވިޑުން ރައްކާތެރި ކޮށްދޭނެ ވެކްސިނެއް ކަމަށާއި އަދި ކޯވިޑްގެ އެންމެ ނުރައްކާތެރި ހާލަތަށް ދިޔަނުދީ %100 ރައްކާތެރިކަން މިވެކްސިނުން ފޯރުކޮށްދޭނެ ކަމަށެވެ.

އާޖެންޓީނާގެ އާބާދީގެ ކޮންމެ މިލިއަނަކުނ 52,286 މީހުން ކޯވިޑަށް ޕޮޒިޓިވް ވެފައިވާއިރު، ކޮންމެ މިލިއަނަކުން 1,234 މީހުން ވަނީ މިބަލީގައި މަރުވެފައެވެ. އާޖެންޓިނާއަކީ 45 މިލިއަން މީހުންގެ ބޮޑު އާބާދީއެއް އޮންނަ ގައުމުކެވެ. ރަސްމީ ހިސާބުތައް ދައްކާގޮތުން މިހާތަނަށް އާޖެންޓީނާގައި ވެކްސިން ދެވިފައިވަނީ އެގައުމުގެ އާބާދީގެ %7.7 އަށެވެ.