ހޮޓާ، ކެފޭ، ރެސްޓޯރެންޓުގެ ވިޔަފާރި ކުރާ މީހުން ހާލުގައި ޖެހި އެމީހުންގެ ކަންބޮޑުވުން އިންތިހާއަށް އުފުލިފައިވާކަމަށާއި، މިހާރު މިއޮތް ލޮކްޑައުން މިހާރުން މިހާރަށް އުވާލަން ޖެހޭކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

މަޖިލިސް ރައީސް މިފަދަ ގޮތަކަށް ވިދާޅުވެފައިވަނީ އެމަނިކުފާނު އިސްކޮށް ހުންނަވައިގެން ކުރިޔަށް ގެންދަވާ "ބަރުލަމާނީ" ވަޓްސް އެޕް ގްރޫޕުގައެވެ. މި ވަޓްސްއަޕް ގުރޫޕުގައި ދެއްކެވެމުންދިޔަ ވާހަތަކާއި ގުޅިގެން ރައީސް ނަޝީދު ގެންގުޅުއްވާ އިނގިރޭސި ވިލާތުގެ ނަންބަރުން ވިދާޅުވީ މިއަދު ހޮޓާ، ކެފޭ، ރެސްޓޯރެންޓުތަކުގެ ވެރިން ވަރަށް ބޮޑަށް ހާލުގައި ޖެހިފައިވާކަމަށެވެ. މިހާލަތުން އަރައިގަތުމަށް އަދި އެބޭފުޅުންނަށް ރަނގަޅު ގޮތްތަކެއް ހޯދުމަކީ ސަރުކާރުން ކުރަންޖެހޭ ކަމެއްކަމަށެވެ. މިކަން ކުރެވޭނީ މިހާރު އޮތް ލޮކްޑައުން އުވާލައި، މިކަން ނިމުމަކަސް ގެނެސްގެންކަމަށް މަޖިލިސް ރައީސް ވިދާޅުވިއެވެ.

ސައި ހޮޓާ، ރެސްޓޯރެންޓް، ކެފޭތައް ހަމަ އާދޭސްކުރަނީ. އެމީހުންނަށް މިއިން ދުވަހަކު އަރައި ނުގަނެވޭވަރަށް މާލީ ހާލަތު ދަށްވެއްޖެ. މިކަން މިގޮތަށް ނުބޭއްވޭނެ. ލޮކްޑައުން އުވާލަންވީ.

ރައީސް ނަޝީދު ވިދާޅުވިއެވެ.

ކޯވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކުގެ ސަބަބުން ކާބޯތަކެތިގެ ޚިދުމަތްދޭ ތަންތަނުގެ ވިޔަފާރި އަށް ގެއްލުންވަމުންދާތީ އެތަންތަން ބަންދުކޮށް ހަޅުތާލު ކުރުމަށް ރެސްޓޯރަންޓް އެސޯސިއޭޝަން އޮފް މޯލްޑިވްސް އިންވެސް ވަނީ ނިންމާފައެވެ. އެ ޖަމިއްޔާއިން ބުނީ މިފަދަ ނިންމުމެއް ނިންމަންޖެހުނީ ސަރުކާރާއި ދައުލަތުގެ މުއައްސަސާތަކާ ބައްދަލު ކޮށްގެންވެސް ރެސްޓޯރަންޓް ވިޔަފާރިތަކަށް ހުރި ދަތިތަކަށް އެދެވޭ ހައްލެއް ލިބިފައި ނުވާތީ ކަމަށެވެ. އަދި މިކަމަށް އެކަށީގެންވާ ހައްލެއް ސަރުކާރުން ހޯދައިދެންދެން ހަޅުތާލު ކުރިއަށް ގެންދަން ނިންމާފައިވާކަމަށްވެސް އެޖަމިއްޔާއިން ބުނެއެވެ. ނަމަވެސް ހަޅުތާލު ފަށަން ނިންމާފައިވާ ދުވަހެއް ހާމައެއް ނުކުރެއެވެ.

މާލެ ސަރަޙައްދުގައި ކޯވިޑް-19ގެ ހާލަތު ވަރަށްބޮޑަށް ގޯސްވެފައިވާތީ މިހާރު އަޅާފައިވާ ފިޔަވަޅުތަކުގެ ތެރެއިން ކެފޭ، ހޮޓާ، ރެސްޓޯރަންޓް ތަކުން ރޭގަނޑު 20:00ގެ ފަހުން ކެއިންބުއިމުގެ ޚިދުމަތްދިނުން ވަނީ މަނާކޮށްފަ އެވެ. އަދި ޑެލިވަރީގެ ހިދުމަތް ރޭގަނޑު 10:30 އާއި ހަމައަށް ދެވޭ ގޮތަށް ވަނީ ކަނޑައަޅާފައެވެ. މިކަމުގެ ސަބަބުން ކާބޯތަކެތީގެ ޚިދުމަތްދޭ ވިޔަފާރިތަކަށް ސީދާގޮތެއްގައި ގެއްލުންވަމުން އަންނަކަމަށް އެފަރާތްތަކުން ގެންދަނީ ބުނަމުންނެވެ.

ރެސްޓޯރަންޓުތަކަށް ދިމާވެފައިވާ ދަތިތަކާ ގުޅިގެން އެ ވިޔަފާރީގައި އިސްކޮށް ހަރަކާތްތެރިވާ ބައެއް ފަރާތްތަކުންވަނީ ރައީސުލްޖުމްހޫރިއްޔާގެ އިތުރުން ރައްޔިތުންގެ މަޖިލީހުގެ ރައީސާއި އެޗްޕީއޭއާ ވެސް މަޝްވަރާ ކޮށްފައެވެ.