ކަރީނާ ކަޕޫރް ޚާން ފުރަތަމަ ފަހަރަށް އޭނާގެ ދެ ވަނަ ދަރިފުޅުގެ ފޮޓޯއެއް ހިއްސާކޮށްފި އެވެ.
އަންހެނުންގެ ދުވަހުގެ ތަހުނިޔާ ފޭނުންނަށް ފޮނުވުމަށް ކަރީނާ މިއަދު ކުރި އިންސްޓަގްރާމް ޕޯސްޓްގައި އޭނާ ވަނީ އޭނާގެ ދެވަނަ ދަރިފުޅު އުރައިގެން އިން ބްލެކްއެން ވައިޓް ސެލްފީއެއް ހިއްސާކޮށްފައެވެ. ފޮޓޯގައި ކުޑަ ދަރިފުޅު ފޮތިގަނޑެއްގައި އޮޅާލާފައި އޮތްއިރު ކުއްޖާގެ ބޮލާއި ކަންފަތާއި ކަނދުރާގެ ބައެއް ފެންނަން ހުއްޓެވެ.
View this post on Instagram
ކަރީނާ އާއި ސައިފް އަލީ ޚާނަށް ދެ ވަނަ ކުއްޖަކު ލިބިފައި ވަނީ މިދިޔަ މަހުގެ 21 ވަނަ ދުވަހުއެވެ. ދަރިފުޅު ވިހެއުމާއިއެކު އެދެމީހުންގެ ފޭނުންވެސް އިންތިޒާރުކުރަމުން ދިޔައީ ތުއްތު ދަރިފުޅުގެ ފޮޓޯ އަކާއި ދަރިފުޅަށް ކިޔާނެ ނަމަކަށެވެ. ނަމަވެސް ދެ ވަނަ ދަރިފުޅަށް ކިޔާނެ ނަމެއް އަދިވެސް ކަރީނާ އާއި ސައިފް ހާމައެއް ނުކުރެއެވެ.
އެ ދެމަފިރިންގެ ފުރަތަމަ ދަރިފުޅު ތައިމޫރް އަލީ ޚާން އުފަންވީ 2016 ވަނަ އަހަރުގެ ޑިސެމްބަރު މަހުގެ 20 ވަނަަ ދުވަހުއެވެ. 4 އަހަރުގެ ތައިމޫރް އަކީ އުފަންވީއްސުރެ މީޑިއާއާއި އާންމުންގެ ސަމާލުކަން އެންމެ ބޮޑަށް ލިބުނު އިންޑިއާގެ "ސްޓަރ ކިޑް" އެވެ. ކަރީނާ އާއި ސައިފް ވަނީ އެމީހުންގެ ފުރަތަމަ ދަރިފުޅަށް މީޑިއާއިން އެދިން ސަމާލުކަން ދެވަނަ ދަރިފުޅަށް ނުދިނުން އެދޭ ކަމަށް ދަރިފުޅު ވިހެއުމުގެ ކުރިންވެސް އެދިފައެވެ. އަދި އެމީހުންގެ އަމިއްލަ ދިރިއުޅުމަށް އިހްތިރާމް ކޮށްދިނުމަށްވެސް ކަރީނާ މީގެ ކުރިން ވަނީ އެދިފައެވެ.
މިއީ ކަރީނާ އާއި ސައިފްގެ 2 ވަނަ ދަރިފުޅަށް ވީނަމަވެސް ސައިފްގެ 4 ވަނަ ދަރިފުޅެވެ. ސައިފްގެ ފުރަތަމަ ކައިވެންޏަށް ވެސް ދެކުދިން ލިބިފައި ވެއެވެ. އެއީ ސާރާ އަލީ ޚާން އާއި އިބްރާހީމް އަލީ ޚާނެވެ.
