ގިނަ ބައެއްގެ ހިތްތައް ކަތިލާފައިވާ ބޮލީވުޑްގެ އެކްޓަރ ޓައިގާ ޝްރޮފްއަށް މިއަދު 31 އަހަރު ވަނީ ފުރިފަ އެވެ.
މިއަދު ފާހަގަކުރާ ޓައިގާގެ 31 ވަނަ އުފަންދުވަހާ ގުޅިގެން އޭނާ ވަނީ ސަޕޯޓަރުންނަށް ހަދިޔާއެއް ދޫކޮށްލާފަ އެވެ. އެގޮތުން އޭނާ ވަނީ އޭނާ ބޮލީވުޑަަށް ނެރެދިން ފިލްމު "ހީރޯޕަންތީ"ގެ ދެވަނަ ފިލްމް ބެލުންތެރިންނާ ހަމައަށް އަންނާނެ ދުވަސް ހާމަކޮށްފައެވެ.
2014 ވަނަ އަހަރު ޓައިގާ ބޮލީވުޑަށް ނެރެދިން ފިލްމް "ހީރޯޕަންތީ" އަކީ ޑައިރެކްޓަރ ސައްބިރް ޚާންގެ ހިޓެކެވެ. މި ފިލްމުގައި ޓައިގާ ފެނިގެންދިޔައީ ކްރިތީ ސެނޮން އާއެކުއެވެ.
"ހީރޯޕަންތީ2″ ސިނަމާއަށް އަންނާނެ ދުވަސް ހާމަކުރަމުން ކުރި އިންސްޓަގްރާމް ޕޯސްޓެއްގައި ޓައިގާ ބުނީ "މަގޭ ފުރަތަމަ ލޯބި އަލުން އަނބުރާ އަންނަނީ.. މީގެ ކުރިން ނުފެންނަ ފަދަ އެކްޝަން ތުރިލާ." މިހެންނެވެ. އަދި މިއަހަރުގެ ޑިސެމްބަރު މަހު 3 ވަނަ ދުވަހު ސިނަމާތަކަށް ފިލްމް އަންނާނެ ކަމަށް ބުނެފައި ވެއެވެ.
View this post on Instagram
"ހީރޯޕަންތީ" އަކީ ލޯބީގެ ކަންތައްތަކާއި ހެއްވާމަޖާ ކަންކަންވެސް ފެނިގެންދާ އެކްޝަން ވަރުގަދަ ފިލްމެކެވެ.
މޮޅު ނެށުންތެރިއެއްގެ އިތުރުން ޓައިގާ މަޝްހޫރުވެފައި ވަނީ އެކްޝަން ސީކުއެންސްތައް އަމިއްލައަށް ކުޅެން ބޭނުންވާ ތަރިއެއްގެ ގޮތުގައެވެ. އެގޮތުން ގިނަ ތަރިން ބޮޑީ ޑަބަލްއެއް ބޭނުންކޮށްގެން ކުޅޭފަދަ އެކްޝަން މަންޒަރިތައް އަމިއްލައަށް ކުޅޭތަރިއެއްގެ ގޮތުގައި ގިނަ ޑައިރެކްޓަރުން ޓައިގާ ޝްރޮފް ފާހަގަކުރެއެވެ.
