ދިވެހި ސިނަމާއަށް އިންގިލާބް ގެނުވި ފިލްމު "ދެރިޔާ"ގެ ދެވަނަ ބައެއް ގެނެސްދޭން ޕްރޮޑިއުސަރު އަބްދުލް މުހައިމިން ތައްޔާރުވާން ފަށައިފި އެވެ.
ދައުލަތުގެ މީޑިއާގެ ދިވެހި އެފްއެމްގެ ޝޯވ އެއްގައި ވާހަކަ ދައްކަމުން މުހައިމިން ބުނީ "ދެރިޔާ"ގެ ދެވަނަ ބައިގެ ސްކްރީންޕްލޭގެ މަސައްކަތް ކުރަމުން އަންނަ ކަމަށާއި ފިލްމުގެ ލަވަތަކުގެ ތެރެއިން ދެ ލަވައެއްގެ ރެކޯޑިން ވެސް ހަދާފައިވާ ކަމަށެވެ. ފިލްމުގެ މިއުޒިކް ހަދަނީ އިބްރާހީމް އާމިރާއި އަޙްމަދު އާމިރެވެ. އެއީ މުހައިމިންގެ ދެ ބޭފުޅުންނެވެ. "ދެރިޔާ"ގެ ފުރަތަމަ ފިލްމުގައި ވެސް މިއުޒިކް ޑައިރެކްޓަރގެ ގޮތުގައި މަސައްކަތް ކުރީ އަޙްމަދު އާމިރުއެވެ.
1994 ވަނަ އަހަރު ބެލުންތެރިންނާ ހަމައަށް އައި "ދެރިޔާ" އަކީ މުޙައްމަދު ނިޔާޒް (ޓެޑްރީ) ޑައިރެކްޝަނެކެވެ. އަދި މި ފިލްމުގެ ދެވަނަ ބައެއްގެ މަސައްކަތަށް ތައްޔާރުވާއިރު ޓެޑްރީގެ ޚިޔާލުވެސް ހޯދާފައި ވާކަމަށް މުހައިމިން ވަނީ ބުނެފައެވެ.
"ޓެޑްރީ ވެސް އެބަހުރި ބައެއް ހިޔާލު ދެއްވާފައި. ދެރިޔާ އާއި މި ފިލްމާ ގުޅުވާލުމުން ހުރިހާ ގޮތަކުން ފައިދާވާނެ ކަމަށް މި ބަލަނީ. އެކަމަކު ދެރިޔާގެ ޝޮޓަކަށް ޝޮޓެއް ނޫން،"
– މުހައިމިން
"ދެރިޔާ" އާއި ގުޅުވާލި ނަމަވެސް ގެނެސްދިނުމަށް މަސައްކަތް ކުރަމުންދަނީ އަމިއްލަ ސްކްރީންޕްލޭއަކަށް ހަދާ މުޅިން ތަފާތު ފިލްމެއްކަމަށް ޕްރޮޑިއުސަރ މުހައިމިން ވަނީ ބުނެފައެވެ.
"ދެރިޔާ"ގެ ކާސްޓުންގެ ތެރެއިން ގިނަ ފަންނާނުން މިހާރު ވަނީ ފިލްމީ ދާއިރާއާއި ދުރަށް ޖެހިލާފައެވެ. އޭގެ ތެރޭގައި ފިލްމުގެ ލީޑް ރޯލް ކުޅުނު އަލީ ޚާލިދާއި ހައްވާ ޒާހިރާ ހިމެނެއެވެ. "ދެރިޔާ" އަށް ފަހު، އަލީ ޚާލިދު 2 ފިލްމަކުން ފެނުނު ނަމަވެސް ހައްވާ ޒާހިރާ "ދެރިޔާ" ނޫން ފިލްމެއް ނުކުޅެ އެވެ.
މީގެ އިތުރުން ފިލްމުގެ މުހިންމު ރޯލްތަކަކުން ފެނުނު ކޮއްޔަ ހަސަން މަނިކާއި ހައްވާ ރިޔާޒާ މިހާރު ދުނިޔެއަކު ނެތެވެ. ވާހަކަ ލިއުންތެރިޔާ ބިންމާ އިބްރާހީމް ވަހީދާއި އާރިފާ އިބްރާހީމާއި މަރިޔަމް ވަހީދާ ވެސް މި ފިލްމުގައި މުހިންމު ރޯލުތަކުން ފެނިގެންދިޔައެވެ.
ދެރިޔާގެ ދެވަނަ ބަޔަށް ތަރިން ނެގުމާމެދު އަދި ނުވިސްނާ ކަމަށާއި ނަމަވެސް ފުރަތަމަ ފިލްމުގެ ބައެއް ތަރިން ބޭނުން ކުރަން ކުރިންވެސް ވިސްނާފައި ވާނެކަމަށްވެސް މުހައިމިން ބުންޏެވެ.
ބޭވަފާތެރި ފިރިއެއްގެ ސަބަބުން އާއިލާއަކަށް ކުރިމަތިވާ ހިތްދަތި ހާދިސާތަކެއް ދައްކުވައިދިން "ދެރިޔާ" އަކީ ރާއްޖޭގައި ބޭއްވި ފުރަތަމަ ގައުމީ ފިލްމު އެވޯޑްސްގައި 7 އެވޯޑް ހޯދި ފިލްމެކެވެ. އަދި އޮލިމްޕަހުން ފިލްމު ނަގާފައި ވަނީ ވެސް ހައުސްފުލް 30 ޝޯވް އަށް ފަހުއެވެ.
