ބައިޑްންގެ އޯޑަރަށް، އިރާނުން ތާއީދުކުރާ ސީރިއާގެ ހަގުރާމަ ވެރިންގެ މަގާމްތަކަށް އެމެރިކާއިން ހަމަލާ ދީފި

އިރުމަތީ ސީރިއާގައި ހަރަކާތްތެރިވާ، އިރާނުން ތާއީދުކުރާ ހަގުރާމަވެރިންގެ އަމާޒުތަކަށް އެމެރިކާއިން އަސްކަރީ ހަމަލާތަކެއް ދީފިއެވެ. ޕެންޓަގަންއިން ބުނާ ގޮތުގައި، އެމެރިކާއިން ސީރިއާއަށް ދިން މިހަމަލާތަކަކީ، އިރާގުގައި ތިބޭ އެމެރިކާގެ ސިފައިންގެ މަގާމްތަކަށް ދާދިފަހުން ދީފައިވާ ރޮކެޓް ހަމަކާތަކުގެ ބަދަލު ހިފުމުގެ ގޮތުން ދީފައިވާ ހަމަލާތަކެކެވެ.

"ރައީސް ބައިޑްންގެ އޯޑަރަށް، މިއަދުގެ ހަވީރުގެ ވަގުތެއްގައި އެމެރިކާގެ އަސްކަރިއްޔާއިން ވަނީ، އިރުމަތީ ސީރިއާގައި ހަރަކާތްތެރިވާ، އިރާނުން އެހީތެރިކަން ފޯރުކޮށްދޭ ހަގުރާމަވެރިންގެ އަމާޒުތަކަށް، އަސްކަރީ ހަމަލާތަކެއް ދީފަ،" ޕެންޓަގަންއިން ނެރެފައިވާ ބަޔާނުގައި، ތަރުޖަމާން ޖޯން ކިރްބީ ވިދާޅުވެފައި ވެއެވެ.

"މިހަމަލާތައް ދިނުމުގެ ހުއްދަ ދެވިފައިވަނީ، އިރާގުގައި ތިބި އެމެރިކާއާއި އަދި ކޯލިޝަންގެ ސިފައިންނަށާއި މީހުންނަށް އަމާޒުކޮށް ދެމުންދާ ހަމަލާތަކުގެ ބަދަލު ހިފުމުގެ ގޮތުން، އަދި މިހާރުވެސް ކުރިމަތިވަމުންދާ ނުރައްކާތަކަށް ކުޑަކުރުމަށްޓަކާ،" މި ބަޔާނުގައި އޭނާ ވިދާޅުވެފައި ވެއެވެ.

ޕެންޓަގަންއިން ބުނެފައިވާ ގޮތުގައި، އެމެރިކާގެ ފައިޓަރ ޖެޓްތަކުން ވަނީ،  500-lbގެ ޖޮއިންޓް ޑިރެކްޓް އެޓޭކް މިއުނިޝަން ގައިޑެޑް ޕްރެސިޝަން ބޮމުގެ 7 ބޮން، ހަގުރާމަވެރިންގެ 7 އަމާޒަކަށް ވާސިލްވާގޮތަށް ވާއްޓާލާފައެވެ. މީގެ ތެރޭގައި ހަގުރާމަވެރިން ހަތިޔާރުތައް އެތެރެކުރުމަށް، ސީރީއާގެ ބޯޑަރ ސަރަހައްދުގައި ބޭނުންކުރާ ޗެނެލްތައްވެސް ހިމެނޭކަމަށް އެމެރިކާގެ އަސްކަރިއްޔާއިން ބުނެފައި ވެއެވެ.

ޕެންޓަގަންގެ ތަރުޖަމާން ތަރުޖަމާން ޖޯން ކިރްބީ ވިދާޅުވި ގޮތުގައި، މި ހަމަލާތަކުގައި، އިރާނުން އެއްބާރުލުން ދޭ ހަގުރާމަވެރި ގްރޫޕްތަކެއް ކަމުގައިވާ، ޚަތައިބް ހިޒްބުއްﷲ (KH)އާއި، ޚަތައިބް ސައްޔިތު އަލް- ޝުހާދާ (KSS) އަދި މީގެ އިތުރުންވެސް އިރާނުން އެހީތެރިކަން ފޯރުކޮށް އެތަކެއް ހަގުރާމަވެރި ޖަމާއަތްތަކުގެ ހަގުރަމަވެރިންގެ ބޯޑަރ ކޮންޓްރޯލް ޕޮއިންޓްތަކުގައި ބޭނުންކުރާ އެތަކެއް އިމާރާތްތަކާ އަދި ތަކެއްޗައް ގެއްލުން ދެވިފައި ވެއެވެ.

ސީރިއަން އޮބްޒަވޭޓޮރީ ފޮރ ހިއުމަން ރައިޓްސް އާ ހަވާލާދީ ރޮއިޓާސްއިން ބުނެފައިވާ ގޮތުގައި މި ހަމަލާތަކުގައި އިރާނަށް ތާއީދުކުރާ 17 ހަގުރާމަވެރިއަކު ވަނީ މަރުވެފައެވެ.

"މި ހަމަލާތަކުގައި، ހަތިޔާރު އުފުލަމުންދިޔަ 3 ލޮރީއެއްވަނީ ގޮއްވާލާފަ.. ވަރަށް ގިނަ މީހުންނަށް އަނިޔާވެފައިވޭ. މިހާތަނަށް ލިބިފައިވާ މައުލޫމާތުތަކަށް ބަލާއިރު، 17 ހަގުރާމަވެރިއަކު ވަނީ މަރުވެފަ، މިހުރިހާ ހަގުރާމަވެރިންނަކީވެސް ޕޮޕިއިލާރ މޮބިލައިޒޭޝަން ފޯސްއަށް ނިސްބަތްވާ ހަގުރާމަވެރިން،" ސީރިއަން އޮބްޒަވޭޓޮރީ ފޮރ ހިއުމަން ރައިޓްސްގެ ޑިރެކްޓަރ ރާމި އަބުދުއްރަހުމާން ވިދާޅުވެފައި ވެއެވެ.

ސީރިއާގައި ހަރަކާތްތެރިވާ ހަގުރާމަވެރިންގެ އަމާޒުތަކަށް އެމެރިކާގެ އަސްކަރިއްޔާއިން ހަމަލާ ދީފައި މިވަނީ، މީގެ 3 ހަފްތާކުރިން، އިރާގުގެ އިރްބިލް އެއަރޕޯޓުގައި ހުންނަ އެމެރިކާ ސިފައިންގެ މިލިޓަރީ ބޭސްއަށް އަމާޒުކޮށް ރޮކެޓް ހަމަލާތަކެއް ދެވިފައި ވަނިކޮށެވެ. މިހަމަލާތަކުގައި، މި ބޭސްގައި މަސައްކަތް ކުރަމުން ދިޔަ ސިވިލް ކޮންޓްރެޓަރަކު މަރުވެ އިތުރު 9 މީހަކު ޒަޚަމް ވެފައި ވެއެވެ. މީގެތެރޭގައި އެމެރިކާގެ ސިފައިންވެސް ހިމެއެވެ.

މިއީ ބައިޑްން ރައީސްކަމުގެ ހުވާ ކުރެއްވުމަށްފަހު، އެގައުމުގެ އަސްކަރިއްޔާއިން ބޭރުގެ އަމާޒުތަކަށް ހަމަލާދިނުމަށް އަމުރު ކުރެއްވި ފުރަތަމަ ފަހަރެވެ.