ސާރާ އަލީ ޚާން އާއި ސައިފް އަލީ ޚާނާ ދެމެދުގައި ބޮލީވުޑްގެ ވާހަކަތަކަށްވުރެ ގިނައިން ދައްކަނީ ކޮންވާހަކައެއްކަން އެންގެން ބޭނުންހެއްޔެވެ؟
ސާރާ ބުނެފައިވާ ގޮތުގައި ބޮލީވުޑްގެ ފިލްމުތަކުގެ ވާހަކަ އެއީ ވަރަށް މަދުން ނޫނީ ނުދައްކާ ވާހަކަތަކެކެވެ. ބެލުންތެރިން ގަބޫލު ކުރާ ގޮތުގައި ސާރާ އާއި ސައިފްގެ މެދުގައި ވަނީ "ކޫލް އީކުއޭޝަން" އެކެވެ. އެގޮތުން އެއްފަހަރެއްގައި ސާރާ އާއި ސައިފް އެއްކޮށް "ކޮފީ ވިތު ކަރަން" ޝޯވއަށް އަރައި މިކަންވަނީ ބެލުންތެރިންނަށް ދައްކާފައެވެ.
ސާރާ ބުނެފައިވާ ގޮތުން އޭނާ ބައްޕައާއެކު ފިލްމުގެ ވާހަކައަށް ވުރެން ގިނައިން ތާރީޚީ ވާހަކަތައް ދެކެވެއެވެ. ސާރާ ބުނެފައިވަނީ އިޓަލީއަށް ކުރި ދަތުރެއްގައި ޕިއްޒާ، ޕާސްޓާ، ކަލްޗަރ، މިއުޒިއަމް އާއި މިއުޒިކްގެ ވާހަކަ ދެއްކުމުގައި އެތަށް ވެގުތެއް މި ދެބަފައިން ހޭދަކޮށްފައިވާ ކަމަށެވެ.
ސާރާ ބުނެފައިވާ ގޮތުގައި އޭނާ އަދި އޭނާގެ ބައްޕައަކީ "ހިސްޓްރީ ނާޑްސް"އެވެ. މި ލޯބި އާއިލާއަށް އިތުރު މެމްބަރަކު ދާދިފަހުންވަނީ އައިސްފައެވެ. ސައިފް އާއި ކަރިނާ ކަޕޫރުގެ ދެވަނަ ދަރިފުޅު ލިބުމާ ގުޅިގެން އާއިލާއާއި އެކުގައި ވަގުތު ހޭދަ ކުރުމަށް ސައިފް ވަނީ ޗުއްޓީނަގާފައެވެ.
ޗުއްޓީއަށް ފަހު ސައިފް ފެނިގެންދާނީ ޕްރަބާސްއާއިއެކުގައި "އަދީޕުރުޝް" އިންނެވެ. ސާރާއަށް ބަލައިލާއިރު ޒުވާން ތަރި ފެނިގެން ދާނީ "އަތުރަންގީރޭ" އިންނެވެ. މި ފިލްމުން އަކްޝޭ ކުމާރް އަދި ދަނުޝްވެސް ފެނިގެންދާނެއެވެ. މި ފިލްމު ނެރުމަށް ހަމަޖެހިފައިވަނީ 6 އޯގަސްޓު 2021 ގައެވެ.
