އާޖެންޓީނާގެ ކުރީގެ ރައީސް ކާލޯސް މެމެން އުމުރުފުޅުން 90 އަހަރުފުޅުގައި އަވަހާރަ ވެއްޖެއެވެ.
އާޖެންޓީނާގެ މިހާރުގެ ރައީސް، އަލްބާޓީ ފާނެންޑޭޒް ޓުވީޓު ކުރައްވާފައިވާ ގޮތުގައި، ކުރީގެ ރައީސް މެމެން އަވަހާރަ ވެފައިވަނީ ވަރަށް ދިގު މުއްދަތަކަށް އާލާސްކަންފުޅާ އުޅުއްވުމަށް ފަހުގައެވެ.
މެމެންގެ ވެރިކަމުގައި އޭނާ ދިރިއުޅުއްވާފައި ވަނީ، މީޑިއާތަކަށް މަޝްހޫރު ވެރިއެއްގެ ގޮތުގައެވެ. އަދި 1989 އިން 1999 އަށް އެނާ އާޖެންޓީނާގެ ވެރިކަން ކުރެއްވިއިރު، އޭނާވަނީ އިގްތިސާދީގޮތުން އާޖެންޓީނާއަށް ބޮޑެތި ކުރިއެރުންތަކެއް ހޯއްދަވާ ދެއްވާފައެވެ. އެހެންނަމަވެސް، އޭނާގެ ދެދައުރުގެ ވެރިކަން ނިމިގެން ދިޔައިރު، ކޮރަޕްޝަނާ ފަސާދައިގެ އެތަކެއް މައްސަލަތަކެއް ވެރިކަމުގެ ތެރެއިން ފެންމަތިވެގެން ދިޔައެވެ.
އަދީ އޭނާވަނީ، އެބުރި ވެރިކަމަށް ވަޑައިގަތުމަށްޓަކާ މެދުނުކެޑި އެތަކެއް މަސައްކަތްތަކެއް ކުރައްވާފައެވެ.
ބޮލުގެ އިސްތަށިގަޑުގެ ފަހަތަށް ދިގުކޮށް އޮންނަބައި ކަޅުކޮށް، އަދި ދެފަރާތުން އަޅިކުލަ ހުންނަ އިސްތަށިގަޑެއްގެ ވެރި، މެމެން އަކީ، ވެރިކަމުގެ އެންމެ ފުރިހަމަ ދުވަސްވަރު، އިގިރޭސި މަޝްހޫރު ރޮކް ބޭންޑް ރޯލިންގ ސްޓޯން ރިޔާސީ ގަޑުވަރަށް ގެންގޮސް މަޖާކުރައްވާ އުޅުއްވި ބޭފުޅެކެވެ.
އަދި ބައިނަލް އަގުވާމީ މަސްރަހުގައި އާޖެންޓީނާގެ ދައުރު އޭނާގެ ވެރިކަމުގައި ވަރަށް ބޮޑަށް ފުޅާވެގެން ދިޔައެވެ. މިގޮތުން އެންމެ ފާހަގަކޮށްލެވޭ އެއްކަމަކީ، އޭނާވަނީ، އޭރު ދުނިޔޭގައި ކުރެވުނު އެންމެ ބޮޑު ދެ ހަގުރާމަ ކަމުގައިވާ ގަލްފު ހަގުރާމައަށާއި އަދި ބޮސްނިއާގެ ހަގުރާމައަށް އާޖެންޓީނާގެ ސިފައިން ފޮނުވާފައެވެ.
"މި ހުރިހާ ކަމެއްގެ އިތުރުން، އަހަރެން އޭނާ ފާހަގަކުރާނީ ރަގަޅު ހިތްހެޔޮ މީހެއްގެ ގޮތުގައި، އަހަރެން އޭނާގެ ހަދާން އާކުރާނީ ވަރަަށް އިހުތިރާމާއެކު،" އާޖެންޓީނާގެ ކުރީގެ ރައީސް މައުރިކޯ މަކްރީ ޓުވީޓު ކުރައްވާފައި ވެއެވެ.
މެމެން އަވަހާރަ ވެފައިވަނީ، ކުޑަކަމުދާ ނިޒާމުގެ މައްސަލަތަކާއި، ހިތުގެ މައްސަލަތައްފަދަ ތަފާތު އެތަކެއް މައްސަކަތަކުގައި، ގިނަ ދުވަސްތަކެއް ވަންދެން ހޮސްޕިޓަލުގައި އެޑްމިޓްކޮށްފައި އޮތުމަށް ފަހުގައެވެ.
އޭނާގެ ހަށިގަޑު، އާޖެންޓީނާގެ ކެޕިޓަލް ބިލްޑިންގައި ބޭއްވުމަށްފަހު ފަސްތާނުލުމަށް ހަމަޖެހިފައިވަނީ، ބޮއިނިސް އައިރިސްގެ ޕްރޮވިންސެއްގައި އޮންނަ މުލިމް ގަބުރުސްތާނެއްގައެވެ.
