ޔޫރަޕިއަން ސެންޓްރަލް ބޭންކުގެ ކުރީގެ ވެރިޔާ، މާރިއޯ ޑްރަގްހި އިޓަލީގެ އާ ބޮޑުވަޒީރުކަމުގެ ހުވާ ކުރައްވައިފިއެވެ.
ޑްރަގްހި ވަނީ، ފާއިތުވެދިޔަ މަހުގައި، ކުރީގެ ސަރުކާރު އިސްތިއުފާ ދިނުމާއި ގުޅިގެން، އިޓަލީގެ ބޮޑެތި ޕާޓީތަކާއެކު، ގައުމީ އެއްބައިވަންތަކަމުގެ ސަރުކާރެއް އެކުލަވާލާފައެވެ.
ކުރީގެ ސަރުކާރު ބަދަލުވެގެން ދިޔައީ، އީޔޫއިން ކަޑައެޅި ކޮރޯނާ ވައިރަސް ރިކަވަރީ ފަންޑުން ޚަރަދުކުރާގެ ގޮތްތަކާ ގުޅޭގޮތުން އުފެދުނު ބޮޑެތި ހަމަނުޖެހުންތަކަށް ފަހުގައެވެ.
އިޓަލީން އަދިވެސް ކޯވިޑް19 ކާރިސާއާ ހަގުރާމަކުރަމުން ދާއިރު، އެގައުމަށްވަނީ، ފާއިތުވެދިޔަ އެތަކެއް އަހަރެއްގެ ތެރޭގައި ކުރިމަތިވި އެންމެ ބޮޑު އިގްދިސާދީ ގޮންޖެހުންތަކާވެސް ކުރިމަތިލާން ޖެހިފައެވެ.
އިޓަލީގައި މިހާތަނަށް އައިއިރި، ކޯވިޑް19ގައި 93،000 މީހުން މަރުވެފައި ވާއިރު، އެގައުމު ހިމެނިގެންދަނީ މުޅި ދުނިޔެއިންވެސް 6 ވަނައަށް އެންމެ ގިނަ އަދަދަކަށް މިބަލީގައި މީހުން މަރުވި ގައުމުގެ ގޮތުގައެވެ.
އިޓްލީގެ ގާނޫނު ހަދާ މަޖުލިހުގެ އެންމެ ބޮޑު ގުރޫޕް ކަމުގައިވާ، "ދަ ފައިވް ސްޓާރ މޫވްމަންޓު"ގެ ތާއީދު ކަށްވަރު ކުރެވުމާއެކު، ޑްރަގްހިއަށް ވަނީ ބޮޑުވަޒީރުކަން ކުރެއްވުމުގައި އިޓަލީގެ ސިޔާސީ މަސްރަހުގެ ބޮޑު ތާޢީދެއް މިހާރު ލިބިވަޑައިގެންފައެވެ. އަދި ގާނޫނު ހަދާ މަޖިލީހުގައި އޭނާގެ އިސްލާހީ އެޖެންޑާތައް ކުރިޔަށް ގެންދިއުމުގައި މިހާރު ވަނީ ބޮޑު މެޖޯރިޓީއެއްވެސް ލިބިވަޑައިގެންފައެވެ.
ބޮޑުވަޒީރުކަމުގެ ހުވާ ކުރެއްވުމަށްފަހު، ޑްރަގްހި ވަނީ، ކުރިންވެސް ޚާރިޖީ ވަޒީރުކަން ކުރައްވަމުން ގެންދެވި، ގާނޫނު ހަދާ މަޖިލިހުގެ 'ފައިވް ސްޓާރ މޫވުމަންޓް"އަށް ނިސްބަތްވާ ލުއިގި ޑި މައިއޯ އަލުން އެމަގާމަށް އައްޔަން ކުރައްވާނެކަން އިއުލާން ކުރައްވާފައެވެ.
މީގެ އިތުރުން، ކަނާތު ފިޔައިގެ ޕާޓީއެއް ކަމުގައިވާ، ޕޮޕިއުލިސްޓް ލީގު ޕާޓީގެ އިސް މެމްބަރެއްކަމުގައިވާ، ގިއަންކާލޯ ގޮއޯރގެއްޓި އިންޑަސްޓްރީ މިނިސްޓަރަކަށް އައްޔަން ކުރުމަށް ހަމަޖައްސަވާފައިވާއިރު، ވާތުފިޔައިގެ މެދުމިނުގެ ޕާޓީއެއްކަމުގައިވާ، ޑިމޮކްރަޓިކް ޕާޓީގެ އަންޑްރިއާ އޮލާންޑޯ ލޭބަރ މިނިސްޓަރަކަށް އައްޔަން ކުރެއްވުމަށްވެސް، ޑްރަގްހި ވަނީ ހަމަޖައްސަވާފައެވެ.
އަންނަ ހަފްތާގައި އިޓަލީގެ ގާނޫނު ހަދާ މަޖިލިހުގައި، ޑްރަގްހިގެ ސަރުކާރަށް އިތުބާރު އޮތްތޯ ބެލުމަށް ވޯޓުނެގުމަށް ވަނީ ހަމަޖެހިފައެވެ. ބެލެވޭ ގޮތުގައި މި ވޯޓު ވެގެންދާނީ ރަމްޒީ ވޯޓަކަށެވެ.
ޔޫރަޕިއަން ޔޫނިއަންގެ އެންމެ މަތީ ފަންތީގައި އިކޮނިމިސްޓެއްގެ ގޮތުގައި މަސައްކަތް ކުރައްވުމާއިއެކު، އަދި ބޭންކް އޮފް އިޓަލީގެ ގަވަރުނަރުކަންވެސް ކުރައްވާފައިވާ ޑްރަގްހި ބެލެވިފައިވަނީ، މިދަނޑިވަޅުގައި އިޓަލީގެ ބޮޑިވަޒީރުކަމަށް އެންމެ އެކަށީގެންވާ ބޭފުޅާގެ ގޮތުގައެވެ.
"މާރިއޯ ޑްރަގްހީއަކީ، ޔޫރަޕް ސަލާމަތް ކޮށްދެއްވި އިޓަލީގެ ރައްޔިތެއް، އަދި އަހަރެން ގަބޫލުކުރަނީ، މިހާރު އޭނާ ވެވަޑައިގަންނަވާނީ، އިޓަލީ ސަލާމަތް ކޮށްދެއްވާނެ ޔޫރަޕްގެ ރައްޔިތަކަށް،" އިޓަލީގެ ކުރީގެ ބޮޑުވަޒީރު މަޓިއޯ ރެންޒީ، ބީބީސީގެ ނިއުސް އަވަރ ޕްރޮގްރާމްގައި ވާހަކަދައްކަވަމުން ވިދާޅުވެފައި ވެއެވެ.
އިޓަލީގެ ކުރީގެ ބޮޑުވަޒީރު، ގިއުސެއްޕެ ކޯންޓެ ފާއިތުވެދިޔަ މަހު އިސްތިއުފާ ދެއްވާފައިވަނީ، ކޯލިޝަން ސަރުކާރެއްގައި ވެރިކަން ކުރަމުންއައި އޭނާގެ ޕާޓީއަށް، އީޔޫއިން ކަޑައަޅާފައިވާ ކޯވިޑް ރިކަވަރީ ބަޖެޓުން ހޭދަކުރާނެ ގޮތުގެ ޕްލޭންތަކާ ގުޅިގެން އުފެދުނު ހިންހަމަ ނުޖެހުންތަކުގައި، ގާނޫނު ހަދާ މަޖިލިހުގައި އޮތް ތާއީދު ގެއްލިގެން ދިއުމާގުޅިގެންނެވެ.
