ކެފޭ ރެސްޓޯރަންޓް ހުޅުވާފައި ބެހެއްޓޭ ގަޑިއަށް އަނެއްކާވެސް ބަދަލުގެނެސްފި

ކެފޭ، ރެސްޓޯރަންޓް، ސައި ހޮޓާތައްފަދަ ކަބާތަކެތީގެ ޚިދުމަތްދޭ ތަންތަން ހުޅުވާފައި ބެހެއްޓޭނެ ގަޑިއަށް އަނެއްކާވެސް ބަދަލު ގެނެސްފިއެވެ.

ރާއްޖޭގައި ކޯވިޑް-19އަށް ޕޮޒިޓިވްވާ މީހުންގެ ޢަދަދު އިތުރުވެފައިވާރު، ކާފިޢު އިޢުޅާންކޮށް، ފިޔަވަޅުތައް ވަނީ އަނެއްކާވެސް ވަރުގަދަކޮށްފައެވެ. ކެފޭ ރެސްޓޯރަންޓްފަދަ ކާބޯ ތަކެތީގެ ޚިދުމަތްދޭ ތަންތަން ހުޅުވާފައި ބެހެއްޓޭނެ ގަޑިއަށް ބަދަލުގެނެސް އިކޮނޮމިކް މިނިސްޓަރީން ބުނީ، ކޯވިޑް-19އއިން ރައްކާތެރިވުމަށް އަޅާފައިވާ ޚާއްޞަ ފިޔަވަޅުތަކަށް ބަދަލު ގެނައުމާގުޅިގެން، މިއަދުން ސައިހޮޓާ، ކެންޓީން، ކެފޭ، ރެސްޓޯރަންޓް ފަދަ ކާބޯތަކެތީގެ ޚިދުމަތްދޭ ތަންތަން ހުޅުވާފައި ބެހެއްޓޭނެ ގަޑިއަކީ ފަތިހު 4:30 އިން ރޭގަނޑު 11:30އަށް ކަމަށެވެ.

މިފަދަ ބަދަލެއް އިކޮނޮމިކް މިނިސްޓޤރީން ގެނެސްފައިވާއިރު އެޗް.ޕީ.އޭއިން ބުނެފައިވަނީ ކޯވިޑް-19 އިން ރައްކާތެރިވުމަށް ޚާއްޞަ ފިޔަވަޅުތަކެއް އަޅުއްވާފައިވާކަމަށެވެ. އެގޮތުން މިއަދުން ފެށިގެން މާލެއާއި ހުޅުމާލެއާއި، ވިލިމާލޭގައި ޕާޓީތަކާ، ޙަފްލާތަކާއި ރަސްމިއްޔާތުތައް ބޭއްވުން މަނާކަމަށާއި، މިމަހުގެ 27 ވަނަ ދުވަހުގެ ރޭ ދަންވަރު 12 އިން ފެށިގެން ފަތިހު 4 އަކަށް މާލެއާއި، ހުޅުމާލެއާއި، ވިލިމާލޭގައި އެއްގަމު އުޅަނދުފަހަރު ދުއްވުމާއި، މަގުމައްޗާއި އާއްމު ތަންތަނަށް މީހުން ނުކުތުން މަނާކަމަށް އެޗްޕީއޭގެ އެންގުމުގައިވެއެވެ. އަދި މާލެ، ހުޅުމާލެ، އަދި ވިލިމާލޭއިން ރާއްޖޭގެ އެހެން ރަށްރަށަށް ދަތުރުކުރާ ފަރާތްތައް ކަރަންޓީންވާން ޖެހޭނެކަމަށާއި، މިމަހުގެ 29 ވަނަ ދުވަހުން ފެށިގެން ފަތުރުވެރިން ފިޔަވައި ރާއްޖެއިން ބޭރުން އަންނަ ފަރާތްތައް 10 ދުވަހުގެ މުއްދަތަކަށް ކަރަންޓީންވާންޖެހޭނެކަމަށްވެސް އެޗްޕީއޭއިން އެޅި ފިޔަވަޅުތަކުގެ ތެރޭގައި ހިމެނެއެވެ.

މާލެ ސަރަހައްދުގައި ކާފިއު އިޢުލާންކޮށް ފިޔަވަޅުތައް ވަރުގަދަކުރިނަމަވެސް ބައެއް ފަރާތްތައް ވަނީ އިސްތިސްނާކޮށްފައެވެ. އޭގެތެރޭގައި ސިފައިންނާއި، ފުލުހުންނާއި، ޞިއްޙީ ޙިދުމަތްދޭ އިދާރާތަކުގެ މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރު ހިމެނެއެވެ. އަދި އެމްބިއުލާންސާއި، ހެލްތު އިމަރޖެންސީ އޮޕަރޭޝަން ސެންޓަރުގެ ފާސް ލިބިފައިވާ ފަރާތްތަކާއި، ފަތިސް ނަމާދަށް މިސްކިތަށްދާ ފަރާތްތަކާއި، ބޭރަށް ނުކުތުން މަނާކޮށްފައިވާ ވަގުތަކުގައި އެމެޖެންސީކޮށް ޞިއްޙީ ޙިދުމަތް ހޯދަންޖެހޭ ފަރާތްތައް މިކަމުން އިސްތިސްނާވާނެކަމަށް އެޗްޕީއޭގެ އެންގުމުގައިވެއެވެ.

އައު އަހަރު ފެށުމާއެކު ރާއްޖޭގައި ކޯވިޑަށް ޕޮޒިޓިވްވާ މީހުންގެ ޢަދަދު އިތުރުވެފައިވާއިރު، ފާއިތުވި ތިން ދުވަހު ޕޮޒިޓިވްވި މީހުންގެ ޢަދަދު ކޮންމެ ދުވަހަކުވެސް އުޅޭނީ 100 އިން މަތީގައެވެ. އެގޮތުން އެންމެ ފަހުން 145 މީހަކު ޕޮޒިޓިވްވެފައިވާއިރު، ރާއްޖެއިން މިހާތަނަށް 15،000 ވުރެ ގިނަ މީހުން ވަނީ ޕޮޒިޓިވްވެފައެވެ. އަދި ބައްޔަށް ފަރުވާދެމުން އަންނަ މީހުންގެ ޢަދަދު 1200 އަށްވުރެ މައްޗަށް އަރާފައިވާއިރު، ހޮސްޕިޓަލުގައި ފަރުވާދޭ މީހުންގެ ޢަދަދުވެސް ވަނީ އިތުރުވާން ފަށާފައެވެ. އެގޮތުން މިހާރުވެސް 93 މީހަކަށް ހޮސްޕިޓަލުގައި އެޑްމިޓްކޮށްގެން ދަނީ ފަރުވާދެމުންނެވެ.

މީގެ ކުރިންވެސް ކޯވިޑްގެ ޕޮޒިޓިވް ކޭސްތައް އިތުރުވެ މާލެ ސަރަހައްދުގައި ކާފިޢު ހިންގާފައިވެއެވެ. އަދި ފިޔަވަޅުތައް ވަރުގަދަކޮށްފައިވެއެވެ. އަދި އެ ކާފިއު އުވާލާ ފިޔަވަޅުތަކަށް ލުއިދީފައިވަނީ ކޭސްތައް މަދުވާން ފެށުމުންނެވެ.