އަސްލު ވައިރަހަށްވުރެ ނުރައްކާތެރި، އަދި ފަސޭހަކަމާއެކު ގައިންގަޔަށް ފެތުރޭކަމަށް ބެލެވޭ، އިގިރޭސިވިލާތާ އަދި ސައުތު އެފްރިކާއިން ފެނުނު ކޯވިޑް19 ވޭރިއަންޓާ ދެކޮޅަށް މޮޑާނާގެ ވެކްސިން މަސައްކަތްކުރާ ކަމަށް، އެކުންފުނީގެ ސައިންޓިސްޓުން ހާމަ ކޮށްފިއެވެ.
ސައިންޓިސްޓުން ވިދާޅުވެފައި ވާގޮތުގައި، މިހާތަނަށް ހެދުނު ލެބޯޓްރީ ޓެސްޓުތަކުން ދައްކާ ގޮތުގައި، ވެކްސިންއިން ހަށިގަޑަށް ދޫކޮށްލާ އެންޓި ބޮޑީތަކުން، މިއާވޭރިއަންޓުގެ ވައިރަސްތައް ދެނެގަނެ، މި ވޭރިއަންޓްތަކާ ދެކޮޅަށް ހަށިގަޑުގައި ހަގުރާމަ ކުރެއެވެ.
އެހެންނަމަވެސް، އެކުންފުނިން ހާމަކޮށްފައިވާ ގޮތުގައި، މިހާރު ވެކްސިން ދީފައިވާ ފަރާތްތަކަށް، ފުރިހަމަ ރައްކާތެރިކަން ލިބިދޭކަން ފުރިހަމައަށް ޔަގީންކުރުމަށް އަދި އިތުރު ތަހުލީލުތަކެއް ކުރަން ޖެހެއެވެ.
ކޯވިޑް19ގެ އަލަށް ފެނިފައިވާ ވޭރިއަންޓްތައް ދަނީ، ބާރުމިނުގައި ދުނިޔޭގެ އެތައް ގައުމެއްގައި ފެތުރެމުންނެވެ.
މިގޮތުން އަލަށް ފެނިފައިވާ ވޭރިއަންޓްތަކަކީ، އަސްލު ވައިރަސް މިއުޓޭޓްވެގެން އުފެދިގައިވާ، ކޯވިޑް ވައިރަހުގެ އާ ބާވަތްތަކަކަށް ވާތީ، ސިއްޙީ ކާރިސާ ފެށުނުއިރު އެންމެ ފުރަތަމަ ފެނުނު ވައިރަހަށްވުރެ ފަސޭހައިން ގައިންގަޔަށް ވާސިލްވުމުގެ ގާބިލްކަން މި އާވޭރިއަންޓްތަކަށް ލިބިފައި ވެއެވެ.
މިގޮތުން ސިއްޙީ ތަޖުރިބާކާރުން ލަފާކުރާ ގޮތުގައި، އިގިރޭސިވިލާތުން ފެނުނު ކޯވިޑް19ގެ އާ ވޭރިއަންޓަކީ، އަސްލު ވައިރަހަށްވުރެ %70 އިތުރަށް، ގައިންގަޔަށް ވާސިލްވުމުގެ ގާބިލްކަން ލިބިފައިވާ ވައިރަހެކެވެ.
ކޯވިޑް19އާއި ދެކޮޅަށް ދުނިޔޭގެ ގައުމުތަކުން މިހާރު ބޭނުން ކުރަމުންދާ ވެކްސިންތަކަކީ، ބަލީގެ ވަރަށް ކުރީކޮޅު ތައްޔާރުކުރަން ފަށާފައިވާ ވެކްސިންތަކަކަށް ވާތީ، މިވެކްސިންތައް އެންމެ ފުރިހަމަޔަށް މަސައްކަތް ކުރާކަމަށް ބެލެވެނީ، އަސްލު ވައިރަހާ ދެކޮޅަށެވެ. އެހެންނަމަވެސް، މިހާތަނަށް ހެދުނު ތަހުލީލުތަކުން ދައްކާ ގޮތުގައި، އަލަށް ފެންނަމުންދާ ކޯވިޑް19 ވައިރަކުގެ އާ ވައްތަރުތަކާ ދެކޮޅަށްވެސް މިވެކްސިންތައް މަސައްކަތް ކުރަމުންދެއެވެ. އެހެންނަމަވެސް، ވެކްސިންތައް އާ ވޭރިއަންޓްތަކާ ދެކޮޅަށް މަސައްކަތް ކުރަމުންދަނީ، ކިހާ ފުރިހަމަކޮށް ކަން، ޔަގީން ކުރެވޭ މިންވަރަށް ސައިންސްވެރިންނަށް އަދި ކަށަވަރު ކުރެވިފައެއް ނުވެއެވެ.
މޮޑާނާއިން ބުނާގޮތުގައި، އެކުންފުނިން އުފައްދާފައިވާ ވެކްސިން ދީފައިވާ، ކޯވިޑް19ގެ އާ ވޭރިއަންޓްގެ ވައިރަސް ހަށިގަޑުގައިވާ ފަރާތްތަކުގެ ލޭގެ ސާމްޕްލްތައް ޓެސްޓުކުރުމުން މިހާތަނަށް ދައްކާ ނަތީޖާތަކުން، އާ ވައިރަހާ ހަގުރާމަ ކުރުމަށް އެކަށީގެންވާ ވަރަށް، އެމީހުންގެ ލޭގެތެރޭގައި އެންޓި ބޮޑީތައް އުފައްދާފައި ވެއެވެ. އެހެންނަމަވެސް، މި ނަތީޖާތަކަކީ އަދި އިތުރަށް ދިރާސާ ކުރަންޖެހޭ ނަތީޖާތަކެއްކަމަށް އެކުންފުނިން ބުނެއެވެ.
އިގިރޭސިވިލާތުގެ ސިއްޙި އިދާރާތަކުން ވަނީ މޮޑާނާގެ ވެކްސިންވެސް އެގައުމުގައި އެމަޖެންސީކޮށް ބޭނުންކުރުމުގެ ހުއްދަ ދީފައެވެ. އެހެންނަމަވެސް، އެގައުމުން އޯޑަރު ކޮށްފައިވާ، 17 މިލިއަން ޑޯޒްގެ ވެކްސިން އަންނަ މަރޗް މަސް ފެށުމުގެ ކުރިން ލިބޭނެކަމުގެ މާބޮޑު އުއްމީދެއް އަދި ލިބިފައި ނުވާކަމަށް އިގިރޭސި ސަރުކާރުން ވަނީ ބުނެފައެވެ.
މިހާތަނަށް އައިއިރު، އިގިރޭސިވިލާތުން 6.3 މިލިއަން މީހުންނަށް، ފައިޒަރ ނުވަތަ އެސްޓްރާޒެނިކާ ވެކްސިންގެ ފުރަތަމަ ޑޯޒްވަނީ ދެވިިފައެވެ.
