ނޭޕާލަށް ކުރިމަތިވި ބޮޑު ފެންބޮޑުވުމުގެ ކާރިސާގައި ލިބުނު ގެއްލުންތައް އިއާދަކުރުމަށް އެތައް ބިލިއަން ޑޮލަރެއް ޚަރަދުވާނެ ކަމަށާއި، މި މަސައްކަތުގައި ބައިނަލްއަޤްވާމީ އެހީ ބޭނުންވާ ކަމަށް އެ ޤައުމުގެ ފޮރިން މިނިސްޓަރު ޝިޝިރު ޚަނާލް ވިދާޅުވެއްޖެއެވެ.
ކާރިސާ ހިނގިތާ ތިން ދުވަސް ފާއިތުވެފައިވާއިރު، ކަތުމަންޑޫގައި ނޫސްވެރިންނާ ވާހަކަދައްކަވަމުން މިނިސްޓަރު ވިދާޅުވީ، މިވަގުތު އެންމެ ބޮޑު އިސްކަމެއް ދެނީ މީހުން ސަލާމަތްކުރުމުގެ މަސައްކަތަށް ކަމަށާއި، ނަމަވެސް ގެއްލުމުގެ ބޮޑުކަމުން ސަރުކާރުގެ ޤާބިލުކަމަށްވުރެ ބުރަ ބޮޑުވެފައިވާ ކަމަށެވެ.
މިހާތަނަށް 675 މީހެއްގެ ހަށިގަނޑު ފެނިފައިވާއިރު، 2،426 އަށްވުރެ ގިނަ މީހުން ވީނުވީއެއް ނޭނގި ގެއްލިފައިވާ ކަމަށް ރެސްކިއު ޓީމުތަކުން ބުނެއެވެ. ކޯރުތަކުގެ ތިރީ ސަރަޙައްދުތަކުން ފެންނަމުންދާ ހަށިގަނޑުތައް، ގިނަ ވަގުތު ފެނުގައި އޮތުމުގެ ސަބަބުން އަވަހަށް ކުނިވުމުގެ ބިރު ބޮޑުވެފައިވާ ކަމަށާއި، އެ ހަށިގަނޑުތައް ދެނެގަނެ ރައްކާކުރުމަށް ޚާއްޞަ ފަންނީ އެހީ ބޭނުންވާ ކަމަށްވެސް މިނިސްޓަރު ވިދާޅުވިއެވެ.
ޚަނާލް ފާހަގަކުރެއްވި ގޮތުގައި، ގިނަ އަދަދެއްގެ ހަށިގަނޑު ގަނޑުކޮށްފައި ބެހެއްޓޭ ވަރުގެ ޤާބިލުކަމެއް ނޭޕާލްގެ ސިއްޙީ ނިޒާމުގައި ނެތުމުން، ޢާއިލާތަކާ ހަވާލުކުރެވެންދެން ހަށިގަނޑުތައް ރައްކާކުރެވޭނެ ފްރިޖާއި ފްރީޒަރު ހަރުކޮށްފައިވާ ޓްރަކް ހޯދުމުގެ މަސައްކަތް ދަނީ ކުރެވެމުންނެވެ. މީގެ އިތުރުން، ޑީއެންއޭ ޓެސްޓް ފަދަ ފޮރެންސިކް ޤާބިލުކަން ދަށްވުމުން، މަރުވި މީހުންގެ ކާކުވަންތަކަން ކަށަވަރުކުރުމަކީވެސް ބޮޑު ގޮންޖެހުމެއް ކަމަށް އޭނާ ވިދާޅުވިއެވެ.
ކޮމެންޓު ފޮނުވާ