މި އަހަރުގެ ޖުލައި 16 ވަނަ ދުވަހުގެ ނިޔަލަށް ދަޢުލަތުން ސަބްސިޑީއަށް ކުރި ޚަރަދު 3.13 ބިލިޔަން ރުފިޔާއަށް އަރައި، މިދިޔަ އަހަރުގެ މި މުއްދަތާ އަޅާ ބަލާއިރު 86 އިންސައްތަ މައްޗަށް ޖެހިލައިފިއެވެ.
މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާއިން އާންމުކުރެއްވި 'ވީކްލީ ފިސްކަލް ރިޕޯޓު’ން ހާމަވާ ގޮތުގައި، މިދިޔަ އަހަރުގެ މި މުއްދަތުގައި ސަބްސިޑީގެ ގޮތުގައި ޚަރަދުވެފައި ވަނީ އެންމެ 1.7 ބިލިޔަން ރުފިޔާއެވެ. މި ފަރަގު މިހާ ބޮޑަށް ފުޅާވެގެން ދިއުމުގެ މައިގަނޑު ސަބަބެއް ކަމުގައި އެ ވުޒާރާއިން ފާހަގަކުރައްވަނީ، ތެލާއި ކަރަންޓުގެ އަގު ހިފެހެއްޓުމަށް ކުރި ޚަރަދު ބޮޑުތަނުން މައްޗަށް ދިއުމެވެ.
ސަރުކާރުން ސަބްސިޑީ ދޫކުރަނީ، ސަރުކާރު ހިއްސާވާ ކުންފުނިތަކުން ރައްޔިތުންނަށް ކާޑާއި، ކަރަންޓާއި، ކަރަންޓު އުފެއްދުމަށް ބޭނުންވާ ތެލާއި، ކުނި މެނޭޖުކުރުން ފަދަ އަސާސީ ޚިދުމަތްތައް ފޯރުކޮށްދިނުމަށް ހިނގާ ޚަރަދާއި، ރައްޔިތުންގެ އަތުން ނަގާ ކޮންޓްރޯލް އަގާ ދެމެދު އޮންނަ ފަރަގު ފޫބައްދާދިނުމުގެ ގޮތުންނެވެ.
މި މުއްދަތުގައި ސަބްސިޑީގެ ގޮތުގައި ޚަރަދުކުރި ފައިސާގެ އެންމެ ބޮޑު ބައެއް ޚަރަދުކުރެވިފައި ވަނީ ތެލުގެ ސަބްސިޑީއަށެވެ. އެގޮތުން، ތެލުގެ ސަބްސިޑީއަށް އެކަނިވެސް 1.8 ބިލިޔަން ރުފިޔާ ޚަރަދުކޮށްފައި ވާއިރު، މިއީ މިދިޔަ އަހަރުގެ މި މުއްދަތުގައި ޚަރަދުކުރި 702.1 މިލިޔަން ރުފިޔާއާ އަޅާ ބަލާއިރު 61 އިންސައްތައިގެ އިތުރުވުމެކެވެ. މި ހޭދަ މިހާ ބޮޑަށް އުފުލިގެން ދިއުމުގެ އަސްލަކީ، މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ސާފުކުރި ތެލުގެ އަގު ބޮޑުވުން ކަމަށް މާލީ ވުޒާރާއިން ވިދާޅުވެއެވެ.
ދެން އެންމެ ބޮޑަށް ހޭދަ އިތުރުވެފައި ވަނީ ކަރަންޓުގެ ސަބްސިޑީއަށެވެ. ކުރީގެ 341.3 މިލިޔަން ރުފިޔާއިން މި ޚަރަދު މިހާރު ވަނީ 626.7 މިލިޔަން ރުފިޔާއަށް އަރާފައެވެ. ހަމައެއާއެކު، ކުނި މެނޭޖުކުރުމުގެ ސަބްސިޑީ 33.9 މިލިޔަން ރުފިޔާއިން 90.6 މިލިޔަން ރުފިޔާއަށް، ދަތުރުފަތުރުގެ ސަބްސިޑީ 128.5 މިލިޔަން ރުފިޔާއިން 201.6 މިލިޔަން ރުފިޔާއަށް، އަދި ކާބޯތަކެތީގެ ސަބްސިޑީ 199.4 މިލިޔަން ރުފިޔާއިން 243.9 މިލިޔަން ރުފިޔާއަށް އުފުލިފައި ވެއެވެ.
އެހެންނަމަވެސް، ސަބްސިޑީގެ ބައެއް ދާއިރާތަކުން ހޭދަ ދަށްވެފައިވެސް ވެއެވެ. މިގޮތުން، މަސްވެރިކަމުގެ ސަބްސިޑީއަށް ކުރި ޚަރަދު 207.4 މިލިޔަން ރުފިޔާއިން 83.1 މިލިޔަން ރުފިޔާއަށް ދަށްވެފައި ވާއިރު، ނަރުދަމާގެ ޚިދުމަތުގެ ސަބްސިޑީގެ ގޮތުގައި ޚަރަދުކުރި 67.8 މިލިޔަން ރުފިޔާއަށް ފާއިތުވި ހަފުތާގައި އެއްވެސް ބަދަލެއް އައިސްފައި ނުވާ ކަމަށްވެސް މާލީ ވުޒާރާއިން ވިދާޅުވެއެވެ.
ކޮމެންޓު ފޮނުވާ