ބަރަހަނާ ފޮޓޯ ހުރި ކަމަށް ބުނެ ބިރުދައްކައި، ދިވެހި ފިރިހެނެއްގެ އަތުން ތިން ލައްކައަށް ވުރެ ގިނަ ރުފިޔާ ހޯދި ކަމަށް ތުހުމަތު ކުރެވޭ މައްސަލައިގެ އަޑުއެހުންތައް ސުޕްރީމް ކޯޓުގައި ފަށައިފިއެވެ.
މި މައްސަލައިގައި ދައުލަތުން ބްލެކްމެއިލްކުރުމުގެ ދައުވާ އުފުލާފައި ވަނީ ސ. ފޭދޫ، ލިލީގަސްދޮށުގެ، މުޙައްމަދު ފަވާޒް ލުޠުފީގެ މައްޗަށެވެ. އޭނާ ހައްޔަރު ކުރީ މިދިޔަ އަހަރުއެވެ.
ފުލުހުން ކުރިން ހާމަކޮށްފައިވާ ގޮތުގައި، މި މައްސަލަ ފުލުހުންނަށް ހުށަހެޅީ 2024 ވަނަ އަހަރުގެ ޑިސެންބަރު 19 ގައެވެ. އޮރިޔާން ކާޑު ހުރި ކަމަށް ބުނެ ބިރުދައްކައި، ދިވެހި ފިރިހެނެއްގެ އަތުން އެކި ދުވަސްމަތިން ތިން ލައްކައަށް ވުރެ ގިނަ ރުފިޔާ ހޯދާފައިވާ ކަމަށް ތުހުމަތު ކުރެވެއެވެ.
އެހެންނަމަވެސް، މިދިޔަ އޭޕްރީލް މަހު ކްރިމިނަލް ކޯޓުން ނިންމީ، މައްސަލައިގެ އިބްތިދާއީ މަރުޙަލާގައި، މަދަނީ މިންގަނޑުން ބަލާއިރު އެ މައްސަލަ ކުރިއަށް ނުގެންދެވޭނެ ކަމަށެވެ. އެ ނިންމުން ދައުލަތުން ހައި ކޯޓުގައި އިސްތިއުނާފު ކުރި ނަމަވެސް، ހައި ކޯޓުން ވެސް ތާއީދު ކުރީ ދަށު ކޯޓުގެ ހުކުމަށެވެ.
ހައި ކޯޓުގައި މި މައްސަލަ ބެއްލެވި ފަނޑިޔާރުންގެ މެދުގައި ރައުޔު ތަފާތުވިއެވެ. މެޖޯރިޓީ ފަނޑިޔާރުން ކަމުގައިވާ އިސް ފަނޑިޔާރު ޢަބްދުﷲ ޖަމީލް އަދި ފަނޑިޔާރު އިސްމާޢީލް ޝަފީޢު ނިންމެވީ މައްސަލަ ކުރިއަށް ނުގެންދެވޭނެ ކަމަށެވެ. ރައުޔު ތަފާތުވި ފަނޑިޔާރު ފާޠިމަތު ފަރުހީޒާ ދެކެވަޑައިގަތީ ދަށު ކޯޓުގެ ނިންމުން ބާޠިލު ކުރަން ޖެހޭ ކަމަށެވެ. މި ދެ މަރުޙަލާގައި ވެސް ދައުލަތާ ދެކޮޅަށް ނިންމުމުން، ފަވާޒް ސަލާމަތްވިއެވެ.
އެންމެ ފަހުން ދައުލަތުން މި މައްސަލަ ހުށަހެޅީ ސުޕްރީމް ކޯޓަށެވެ. މަޢުލޫމާތު ލިބިފައިވާ ގޮތުގައި، އެ ކޯޓުގައި މައްސަލައިގެ އަޑުއެހުންތައް ކުރިއަށް ދަނީ ޢާންމުކޮށް ހުޅުވައިނުލައެވެ. ބެލެވޭ ގޮތުގައި، ގިނަވެގެން ދެ ހަފުތާއެއްހާ ދުވަހުގެ ތެރޭގައި ސުޕްރީމް ކޯޓުން މި މައްސަލައިގައި ގޮތެއް ނިންމާނެއެވެ.
ކޮމެންޓު ފޮނުވާ