ގާޒާ އަލުން ބިނާކުރުމުގެ މަސައްކަތްތަކަށް ފުރަތަމަ ފިޔަވަހީގެ ގޮތުގައި 900 މިލިއަން ޔޫރޯ (ގާތްގަނޑަކަށް 1 ބިލިއަން ޑޮލަރު)ގެ ފަންޑެއް ޔޫރަޕިއަން ކޮމިޝަނުން އިއްޔެ ތައާރަފުކޮށްފި އެވެ.
'ޓީމް ގާޒާ އިނިޝިއޭޓިވް’ގެ ނަމުގައި މި ފަންޑު އިއުލާންކުރީ ބްރަސަލްސްގައި ބޭއްވި އެހީދޭ ފަރާތްތަކުގެ ހާއްސަ ކޮންފަރެންސެއްގަ އެވެ. މި ފަންޑުން ހަރަދު ކުރާނީ ފެނާއި ނަރުދަމާގެ ނިޒާމު މަރާމާތުކުރުމަށާއި، އިމާރާތްތަކުގެ ކުނިބުނި ސާފުކުރުމަށާއި، ސިއްހީ ދާއިރާ އާއި ހަކަތަ އާއި ދަނޑުވެރިކަމުގެ ދާއިރާ އަދި ކާބޯތަކެތި ފޯރުކޮށްދިނުމުގެ އޮނިގަނޑު އަލުން ބިނާކުރުމުގެ މަޝްރޫއުތަކަށެވެ.
މި ފަންޑަށް ފައިސާ ދޭ ގައުމުތަކާއި އިދާރާތަކުގެ ތެރޭގައި ސްޕެއިން، ފްރާންސް، ޖަރުމަން، އިނގިރޭސިވިލާތް، ޖަޕާން، ވޯލްޑް ބޭންކް އަދި ޔޫރަޕިއަން އިންވެސްޓްމަންޓް ބޭންކް ހިމެނެ އެވެ. މީގެ އިތުރުން، އޮސްޓްރޭލިއާ އާއި ކެނެޑާ ވެސް ފަހުން މި ފަންޑުގައި ބައިވެރިވާނެ ކަމަށް ބެލެވެ އެވެ.
މެޑިޓަރޭނިއަން ސަރަހައްދާ ބެހޭ އީޔޫގެ ކޮމިޝަނަރު ޑުބްރާވްކާ ޝުއިސާ ވިދާޅުވި ގޮތުގައި، މި އެހީގެ މައިގަނޑު މަގުސަދަކީ ފަލަސްތީނުގެ ރައްޔިތުންނަށް އުންމީދާއި ރަނގަޅު މުސްތަގުބަލެއް ހޯދައިދިނުމަށް މަގުފަހިކުރުމެވެ.
"އަޅުގަނޑުމެންގެ އަމާޒަކީ އަވަސް މުއްދަތެއްގައި ގާޒާ އަލުން އާރާސްތުކުރުން. ނަމަވެސް، މި އެހީ ގާޒާގެ ރައްޔިތުންނާ ހަމައަށް ފޯރުކޮށްދިނުމަށްޓަކައި، އެ ބިމުގައި އެކަށޭނަ މާހައުލެއް ގާއިމުކުރެވެންޖެހޭ،" އޭނާ ވިދާޅުވި އެވެ.
ހަމަހަމަކަމާއި ތައްޔާރުވެތިބުމާ އަދި ކާރިސާތައް ބެލެހެއްޓުމާ ބެހޭ އީޔޫގެ ކޮމިޝަނަރު ހަޖާ ލަހްބީބް ވިދާޅުވި ގޮތުގައި، ހަމަލާ ބަދަލުކުރުން ހުއްޓާލި ފަހުން ނުވަ މަސް ފާއިތުވެގެންދިޔައިރު ވެސް، ގާޒާއަށް ބޮންއެޅުމާއި ބަލިމަޑުކަން ފެތުރުމާއި މީހުން މަރުވުން އަދިވެސް ދަނީ ކުރިއަށެވެ. އޭނާ ސިފަކުރެއްވި ގޮތުގައި ގާޒާގެ ހާލަތު ވަނީ ކެތްނުކުރެވޭ ފަދަ ދަރަޖައަކަށް ގޮސްފަ އެވެ.
އީޔޫ އާއި އދ. އިން އަންދާޒާކުރާ ގޮތުގައި، ކުރިއަށް އޮތް 10 އަހަރުގެ ތެރޭގައި ގާޒާ އެއްކޮށް އަލުން ބިނާކުރުމަށް 71 ބިލިއަން ޑޮލަރަށް ވުރެ ގިނަ ފައިސާ ބޭނުންވާނެ އެވެ. އެގޮތުން، އަސާސީ ހިދުމަތްތައް ފޯރުކޮށްދޭން ފެށުމަށާއި މުހިންމު އޮނިގަނޑުތައް އަލުން ގާއިމުކުރުމަށް، ފުރަތަމަ 18 މަސްދުވަހުގެ ތެރޭގައި އެކަނިވެސް 26.3 ބިލިއަން ޑޮލަރު ބޭނުންވާނެ ކަމަށް އަންދާޒާކުރެވެ އެވެ.
އިޒްރޭލާއި ފަލަސްތީނުގެ ހަމާސް ޖަމާއަތާ ދެމެދު ދެ އަހަރަށް ވުރެ ގިނަ ދުވަހު ހިނގި ހަނގުރާމައިގައި، ގާޒާގެ އުމްރާނީ ބިނާތަކުގެ ބޮޑު ބައެއް ވަނީ ސުންނާފަތިވެފަ އެވެ.
ކޮމެންޓު ފޮނުވާ