ވެރިކަން ކުރާ ޕީއެންސީގެ އެތެރޭގެ އިންތިޚާބުގެ ވޯޓު ގުނަމުން ދަނިކޮށް ހިނގި ހަމަނުޖެހުމާ ގުޅިގެން ދެ ޒުވާނަކު ހައްޔަރުކޮށްފިއެވެ.
ހުޅުމާލެ ފޭސް ދޭއްގައި ހުންނަ ކާމިލް ދީދީ ސްކޫލްގައި ބެހެއްޓި ވޯޓު މަރުކަޒުގައި މި ހަމަނުޖެހުން ހިނގާފައި ވަނީ އިއްޔެ ވޯޓު ގުނުމުގެ މަސައްކަތް ކުރިއަށް ދަނިކޮށެވެ. މި މައްސަލައާ ގުޅިގެން ހައްޔަރުކޮށްފައި ވަނީ 23 އަހަރާއި 24 އަހަރުގެ ދިވެހި ދެ ފިރިހެނުންކަމަށާއި، އެ ދެ މީހުން ހައްޔަރުކުރީ ކޯޓު އަމުރެއްގެ ދަށުން ކަމަށް ފުލުހުން ބުނެއެވެ.
މިދިޔަ ހޮނިހިރު ދުވަހުގެ ރޭ ޕީއެންސީގެ ކެންޑިޑޭޓުންގެ މަންދޫބުންގެ މެދުގައި ދެބަސްވުމެއް އުފެދި، ހިނގި މި ހަމަނުޖެހުމުގެ ވީޑިއޯ ސޯޝަލް މީޑިއާގައި މިހާރު ވަނީ އާންމުވެފައެވެ. ވީޑިއޯއިން ފެންނަ ގޮތުގައި މަރުކަޒުގައި ތިބި މީހުން އެކަކު އަނެކަކާ ދިމާލަށް ގޮނޑިތައް އުކާ، އިންޒާރުތައް ދޭ އަޑު ވެސް އިވެއެވެ.
އެ ވަގުތު އެ ސަރަހައްދުގައި ތިބި ފުލުހުން މަސްލަހަތު ބެލެހެއްޓުމަށް މަސައްކަތް ކުރި ނަމަވެސް، ހަމަނުޖެހުންތައް މައިތިރި ނުވެ ގިނަ އިރުތަކަކަށް ދެމިގެން ގޮސްފައިވާ ކަމަށް މައުލޫމާތު ލިބެއެވެ.
ކޮމެންޓު ފޮނުވާ