އަތޮޅު ކައުންސިލްތައް އުވާލައި، އަތޮޅުތަކުގެ ހިންގުން ލޯކަލް ގަވަރމަންޓް އޮތޯރިޓީ (އެލްޖީއޭ) އާ ހަވާލުކުރުމާ ގުޅިގެން، ކައުންސިލްތަކުގެ ސެކްރެޓަރީ ޖެނެރަލް (އެސްޖީ) ގެ މަގާމުގައި ތިބި ހުރިހާ ބޭފުޅުން ވަޒީފާއިން ވަކިކޮށްފިއެވެ.
ލާމަރުކަޒީ ގާނޫނަށް އެންމެ ފަހުން ގެނައި އިސްލާހުގެ ދަށުން، އަތޮޅު ކައުންސިލްތަކުގެ އެންމެ ފަހުގެ ދައުރު ހަމަވުމާއެކު އެ އިދާރާތައް ވަނީ އުވިގެން ގޮސްފައެވެ. އަދި އަތޮޅުތަކުގެ ހިންގުމުގެ ކަންކަން ބެލެހެއްޓުމަށް ކޮންމެ އަތޮޅެއްގައި އެލްޖީއޭގެ އޮފީހެއް ގާއިމުކުރުމަށް ވަނީ ނިންމާފައެވެ. މި ބަދަލާއެކު، އަތޮޅު ކައުންސިލްތަކުގައި ތިބި އާންމު އިދާރީ މުވައްޒަފުން އެލްޖީއޭގެ ދަށަށް ބަދަލުކޮށް، އެ މީހުން މެދުވެރިކޮށް ހިދުމަތްތައް ދެވޭނެ އިންތިޒާމު ހަމަޖެއްސި ނަމަވެސް، އެސްޖީން ވަނީ މަގާމުން ވަކިކޮށް އެކަމުގެ ލިޔުން ފޮނުވާފައެވެ.
ސިވިލް ސާވިސް ކޮމިޝަންގެ ކައުންސެލް ޖެނެރަލް އިބްރާހީމް ރަޝީދު ވިދާޅުވި ގޮތުގައި އެސްޖީން މަގާމުން ވަކިކުރަން ޖެހުނީ އެއީ ސީދާ އަތޮޅު ކައުންސިލެއް އިދާރީ ގޮތުން ހިންގުމަށް ވަކި ދައުރަކަށް އައްޔަންކުރާ ބަޔަކަށް ވާތީއެވެ. އެހެންކަމުން، ކައުންސިލްތައް އުވިގެން ދިއުމުން އެ އިދާރާތަކުގެ އެސްޖީންގެ މަގާމުވެސް އުވިގެންދާނެ ކަމަށް އޭނާ ވިދާޅުވިއެވެ. މި ބަދަލާ ގުޅިގެން ރިޑަންޑެންސީ އުސޫލުގެ ދަށުން އެސްޖީން ވަކިކުރަން ނިންމައި، އެ ބޭފުޅުންނަށް ރިޑަންޑެންސީ އެލަވަންސް ދީފައިވާކަމަށް ސިވިލް ސާވިސް ކޮމިޝަނުން ވަނީ ކަށަވަރުކޮށްދީފައެވެ.
ކޮމެންޓު ފޮނުވާ