ވ. އަތޮޅުގައި ޑައިވްކުރަން ގޮސް އުޅެނިކޮށް ގެއްލުނު އިޓަލީގެ ހަތަރު ޑައިވަރުން ހޯދުމަށް ދިވެހި ސިފައިން ކުރަމުންދާ މަސައްކަތުގައި އެހީތެރިވުމަށް، އިޓަލީ ސަރުކާރުގެ ފަންނީ މާހިރުންތަކެއް ރާއްޖެ އައުމަށް ނިންމައިފިއެވެ.
މިދިޔަ ބުރާސްފަތި ދުވަހު ހިނގި މި ހާދިސާގައި ޑައިވަށް ދިޔަ ފަސް މީހުންގެ ތެރެއިން މިހާތަނަށް ކަނޑުއަޑިން ފެނިފައިވަނީ ޑައިވިން އިންސްޓްރަކްޓަރުގެ ހަށިގަނޑު އެކަންޏެވެ. ސަރުކާރުގެ ފަރާތުން މައުލޫމާތު ދެއްވަމުން މުހައްމަދު ހުސެއިން ޝަރީފް ވިދާޅުވީ، ސިފައިންގެ ޑައިވަރުންނަށް އެހީތެރިވުމަށް އިޓަލީން ފޮނުވާ ދެ ތަޖުރިބާކާރުން ލަސްތަކެއް ނުވެ ރާއްޖެ އައިސް އޮޕަރޭޝަންގައި ބައިވެރިވާނެ ކަމަށެވެ. އަދި މިހާރު ކުރިއަށްދަނީ އެ މީހުން ރާއްޖެ އައުމުގެ އެންމެ ފަހުގެ އިންތިޒާމުތައް ހަމަޖެއްސުން ކަމަށްވެސް އޭނާ ވިދާޅުވިއެވެ.
އިއްޔެގެ ނަތީޖާއަށް ބިނާކޮށް މިއަދުވެސް ސިފައިން އަންނަނީ ގެއްލުނު މީހުން ހޯދުމުގެ މަސައްކަތް މެދުކެނޑުމެއްނެތި ކުރަމުންނެވެ. މި ހާދިސާއާ ގުޅިގެން ސީރިއަސް މައްސަލަތަކެއް ބަލަމުންދާތީ، ޓޫރިޒަމް މިނިސްޓްރީން މިހާރު ވަނީ އެ މީހުން ޑައިވަށް ގެންދިޔަ ސަފާރީ "އެމްވީ ޑޫކް އޮފް ޔޯކް"ގެ އޮޕަރޭޓިން ހުއްދަ ހިފަހައްޓާފައެވެ. މި ހާދިސާގައި ގެއްލުނު ޓޫރިސްޓުންނާއި އިންސްޓްރަކްޓަރު 60 މީޓަރަށް ފީނާފައިވާއިރު، ރާއްޖޭގައި އާންމުކޮށް ޑައިވްކުރަން ގާނޫނީގޮތުން ހުއްދަ އޮންނަނީ ގިނަވެގެން 30 މީޓަރަށެވެ.
ކޮމެންޓު ފޮނުވާ