ސަރުކާރުން ކުރިއަށްގެންދާ "ބޯހިޔާވަހިކަން އެންމެނަށް" ސިޔާސަތުގެ ދަށުން ގޯއްޗާއި ފްލެޓަށް އެދި ފޯމު ހުށަހެޅުމުގެ މުއްދަތު އަންނަ މެއި މަހުގެ 31 ވަނަ ދުވަހުގެ ނިޔަލަށް ގެދޮރުވެރިކަމާބެހޭ ވުޒާރާއިން އިތުރުކޮށްފިއެވެ.
މި ސްކީމަށް އެންމެ ފުރަތަމަ ހުޅުވާލީ މި އަހަރުގެ ޖެނުއަރީ މަހުގެ ތެރޭގައެވެ. ފުރަތަމަ އިއުލާނުކުރި ގޮތުން ގޯއްޗަށް އެދުމުގެ ސުންގަޑިއަކީ މާރިޗު 4 ކަމަށް އަދި ފްލެޓަށް އެދުމުގެ ސުންގަޑިއަކީ އޭޕްރީލް 17 ކަމަށް ކަނޑައެޅުމަށްފަހު، ފަހުން ވަނީ މި ހިނގާ މަހުގެ 30 ވަނަ ދުވަހަށް މުއްދަތު އިތުރުކޮށްފައެވެ. ނަމަވެސް، އެ ވުޒާރާއިން އެންމެ ފަހުން ނެރުނު އިއުލާނުގައި ބުނެފައިވަނީ، މާލޭގައި ދިރިއުޅޭ ފަރާތްތަކަށް ޚާއްސަކޮށްގެން ދޫކުރާ މި ބޯހިޔާވަހިކަމަށް އެދުމުގެ ފުރުސަތު މެއި 31 ގެ ރޭގަނޑު 11:59 އާ ހަމައަށް މިހާރު ލިބޭނެ ކަމަށެވެ.
މި މަޝްރޫޢުގެ ދަށުން މާލެ ސަރަހައްދާއި ރަސްމާލެ ހިމެނޭހެން ޖުމްލަ 15،000 ގޯތި ދޫކުރުމަށް ސަރުކާރުން ވަނީ ނިންމާފައެވެ. މީގެ ތެރޭގައި މާލޭގެ ރަށްވެހިންނަށް 10،000 ގޯތި، މާލޭގައި ދިރިއުޅޭ ރަށްރަށުގެ މީހުންނަށް 3،000 ގޯތި، އަދި އެކަނިވެރި މައިންނާއި ބަފައިންނަށް 500 ގޯތި ހިމެނެއެވެ. މީގެ އިތުރުން މާލޭގެ ހަނި ގޯޅިތަކުގައި ދިރިއުޅޭ ފަރާތްތަކާއި ގޯތި ބަދަލުކުރަން ބޭނުންވާ ފަރާތްތަކަށް 1،500 ގޯތި ވަނީ ކަނޑައަޅާފައެވެ. ފްލެޓްގެ ގޮތުގައި 7،900 ފްލެޓް ދޫކުރުމަށް ހަމަޖެހިފައިވާއިރު، އޭގެ ތެރެއިން 4،000 ފްލެޓް މާލޭ ރަށްވެހިންނަށް، 1،500 ފްލެޓް މާލޭގައި އުޅޭ ރަށްރަށުގެ މީހުންނަށް އަދި 2،400 ފްލެޓް ޚާއްސަ ކެޓަގަރީތަކަށް ވަނީ ރިޒާވްކޮށްފައެވެ.
މި ފިޔަވަހީގެ ދަށުން ފޯމު ހުށަހެޅުމުގެ އުސޫލުތަކަށް ވުޒާރާއިން ވަނީ ބޮޑެތި ލުއިތަކެއް ދީފައެވެ. އެގޮތުން، އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަމެއް އޮތް ނަމަވެސް އަނެއް ފަރާތަށް ގޯއްޗަށް ކުރިމަތިލެވޭނެއެވެ. އަދި ޖޮއިންޓްކޮށް ގޯތި ލިބިފައިވާ ފަރާތްތަކަށް އެ ގޯތި ދޫކޮށްލުމަށްފަހު ވަކިން ކުރިމަތިލުމުގެ ފުރުސަތާއި، ނުކުޅެދުންތެރިކަން ހުންނަ ފަރާތްތަކުގެ ޝަރުތުތަކަށް ބަދަލުގެނެސް އެ ފަރާތްތަކަށްވެސް ވަނީ ފުރުސަތު ފަހިކޮށްދީފައެވެ. މީގެ އިތުރުން، ކުރިން 1 ނުވަތަ 2 ކޮޓަރީގެ ފްލެޓް ލިބިފައިވާ ފަރާތްތަކަށް، ދަރިން ތިބި ނިސްބަތަށް ބަލައި ޝަރުތުތަކަކާއެކު 3 ކޮޓަރީގެ ފްލެޓަށް ބަދަލުވުމުގެ ފުރުސަތުވެސް ވަނީ ހުޅުވާލާފައެވެ.
މި ސްކީމްތަކުގެ އިތުރުން، ބީއެމްއެލް މެދުވެރިކޮށް ހުޅުމާލެ އަދި ވިލިމާލޭގައި އަޅާ ފްލެޓްތަކުގެ ބިންގާ މިހާރު އަޅާފައިވާއިރު، އަގުހެޔޮކޮށް ފްލެޓް ގަންނަން ބޭނުންވާ ފަރާތްތަކަށް ޚާއްސަކޮށްގެން ފްލެޓްތަކެއް އިމާރާތްކުރާނެ ބަޔަކު ހޯދުމުގެ މަސައްކަތްވެސް ސަރުކާރުން ދަނީ ކުރަމުންނެވެ.
ކޮމެންޓު ފޮނުވާ