ގައުމީ ދާރުލްއާސާރަށް ބޮޑެތި ބަދަލުތަކެއް ގެނެސް، ޒަމާނީ ފެންވަރަށް ތަރައްގީކުރުމުގެ މަސައްކަތް މިއަހަރުގެ ތެރޭގައި ފެށުމަށް ސަރުކާރުން ނިންމައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ދިވެހިބަހާއި ސަގާފަތާއި ތަރިކައާބެހޭ މިނިސްޓަރު އާދަމް ނަޞީރު އިބްރާހީމް ވިދާޅުވީ، މިހާރު މާލޭގައި ހުރި ދާރުލްއާސާރަކީ ކުރީ ޒަމާނަށް ބަލާއިރު ވަރަށް ރަނގަޅު ތަނެއް ނަމަވެސް، ދުނިޔޭގެ އެހެން ގައުމުތަކެކޭ އެއްފަދައިން ޒަމާނީ ޓެކްނޮލޮޖީއާއެކު އެތަން މިއަދުގެ ހާލަތަށް ތަރައްގީކުރަން ޖެހިފައިވާ ކަމަށެވެ. އެގޮތުން، ޗައިނާގެ އެހީގައި ބިނާކޮށްފައިވާ މި ދާރުލްއާސާރު އިތުރަށް މަރާމާތުކޮށް ތަރައްގީކުރުމަށް ސަރުކާރުން ޗައިނާއާއެކު މަޝްވަރާކޮށް، މިއަހަރުގެ ތެރޭގައި އަމަލީ މަސައްކަތް ފެށުމަށް ވަނީ ހަމަޖެހިފައެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ އިރުޝާދުގެ ދަށުން ދާރުލްއާސާރުގެ އެތެރެއަށް ގެންނަންޖެހޭ ބަދަލުތައް ގެނައުމުގެ ކަންކަން މިހާރު ވަނީ ޕްލޭންކުރެވިފައެވެ. އަދި މާލޭގައި އަލަށް ތަރައްގީކުރާ އިންޓަރެކްޓިވް މިއުޒިއަމްގެ މަސައްކަތް ނިމުމުން، މިހާރު ހުރި ދާރުލްއާސާރާއި ފަންނީ ދާރުލްއާސާރު ގުޅިގެން މުޅިން ތަފާތު އިންގިލާބީ ބަދަލެއް ފެނިގެންދާނެކަމުގެ ޔަގީންކަން އޭނާ ދެއްވިއެވެ.
ކޮމެންޓު ފޮނުވާ