ދިވެހި ގައުމިއްޔަތު ދިރުވާ އާލާކުރުމުގެ ދުވަސް ކުލަގަދަކޮށް ފާހަގަކުރުމުގެ ގޮތުން، މާލެ ވަށާ ބާއްވާ ޚާއްސަ "އާއިލީ ފިނިބުރެއް" މާދަމާ ހަވީރު އޮންނާނެކަމަށް ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއިން ހާމަކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން މިނިސްޓަރ އާދަމް ނަސީރު އިބްރާހީމް ވިދާޅުވީ، މާދަމާއަކީ ގައުމިއްޔަތު ދިރުވާ އާލާކުރުމުގެ ދުވަސް ކަމަށްވާތީ އެކަމަށްޓަކައި ގިނަ ތައްޔާރީތަކެއް ވަމުންދާ ކަމަށެވެ. މި ދުވަހާ ގުޅުވައިގެން ބާއްވާ ފިނިބުރަކީ ދިވެހިންގެ މެދުގައި އޮންނަ ގުޅުން ބަދަހިކޮށް، އެއްބައިވަންތަކަމުގެ ރޫހު އާލާކުރުމަށް ބާއްވާ ހަރަކާތެއް ކަމަށާއި، މި ހަރަކާތުގައި ސަރުކާރުގެ ވުޒާރާތަކާއި ކުންފުނިތަކުގެ އިތުރުން ވީހާވެސް ގިނަ އާންމު ރައްޔިތުން ބައިވެރިވުމަށް މިނިސްޓަރ ވަނީ ދައުވަތު އަރުވާފައެވެ.
މި ހަރަކާތުގެ އިތުރުންވެސް، ކުރިއަށް އޮތް ދުވަސްތަކުގައި ގައުމިއްޔަތާއި ގުޅުންހުރި މުހިންމު ކަންތައްތަކެއް ރާވާފައިވާކަން މިނިސްޓަރ ފާހަގަކުރެއްވިއެވެ. އެގޮތުން މި ހިނގާ މާޗް މަހުގެ ތެރޭގައި ދިވެހި ބަހުގެ އެކަޑަމީން އިންތިޒާމުކޮށްގެން ޅެން ހަދަން ދަސްކޮށްދޭ ކޯހެއް ފެށުމާއި، ތަރިކަ ދިރާސާކުރާ މަރުކަޒުން ތަރިކައިގެ ރަސްމީ ޕޯޓަލް އިފްތިތާހުކުރުން ހިމެނެއެވެ. އަދި އޭޕްރީލް މަހު ބައިނަލްއަގުވާމީ ފެންވަރުގެ ތަރިކައިގެ ކޮންފަރެންސެއް ބޭއްވުމަށް ހަމަޖެހިފައިވާއިރު، ގައުމިއްޔަތުގެ އިސްވަރުންގެ ފަރާތުން "އައްސިދަ" އަދި "ބުރުނު" ނަކަތުގެ ޚާއްސަ ސިންތާތަކެއް ކުރިއަށް ގެންދިއުމަށްވެސް ވަނީ ހަމަޖެހިފައެވެ.
މިނިސްޓްރީގެ ހަރަކާތްތައް އިތުރަށް ފުޅާކޮށް، އަންނަ މަހު ދިވެހި ބަހުގެ ދުވަހާއި ޅެންވެރިންގެ ދުވަސް ފާހަގަކުރުމުގެ ހަރަކާތްތަކާއި، އަތުލިޔުމުގެ މުބާރާތެއް ބޭއްވުމަށް ވަނީ ތާވަލުކުރެވިފައެވެ. މީގެއިތުރުން ދަރިވަރުންނާއި ޒުވާނުންނަށް އަމާޒުކޮށްގެން މަޒުމޫނާއި ކުރުވާހަކަ ލިޔުމުގެ ހުނަރާއި، ވާހަކަ ދެއްކުމުގެ ފަންނު ދަސްކޮށްދިނުމުގެ ޕްރޮގްރާމްތަކެއްވެސް އޭޕްރީލް މަހުގެ ތެރޭގައި ކުރިއަށް ގެންދަވާނެކަމަށް މިނިސްޓަރ ވިދާޅުވިއެވެ.
ކޮމެންޓު ފޮނުވާ